Ushakwaawwa Ureewoohwa
10
Yasuu'a <<Oosdik andi hookna:
t'anooti kaleeb udheefaay shuumaab baakaay uutak,
laakiin weer darii shuumiiniib gwiharaabu aree maraayanaabu.
2 Uutak udheefaay shuumiiniib baruuh t'anooti shakwa ikati.
3 Udheefaay gw'aadiiga bariiyooh dehaay udheefa fandiig,
aree t'anu han bariiyooh whiss eemsiiwna.
Baruuh t'anooteeh gaatka simiisooh waliikiit bateeh dabaamiini.
4 Baruuh t'anu isfar'ihoob,
bateeh suuriimiini,
aree t'anu whissooh ikteennayt,
bariiyooh har'ii sakeen.
5 Laakiin t'anu weer taki har'ii kasakiyaan.
Oon barooh whissooh kiikannayt,
bariisooh fidnaab dhaabeen.>>
idi.
6 Yasuu'a een eemtaal bareeh sooya.
Laakiin baruuh naan haay isehirweeb kanaab kiikeen.
7 Aflaay Yasuu'a masi,
<<Oosdik andi hookna:
ani t'anooti dheefa akati.
8 Anii hankaay y'aab baliin kassaah gwiharaawwa maraayanaawwa ikatiin.
Laakiin t'anu bareeh sinaakraat kiikeen.
9 Ani udheefa akati,
anii geebii shuumiiniibka iidhhan indi.
Baruuh anii shuumi indi,
aree anii itfir'a indi,
aree m'ariit imaar indi.
10 Ugwihara gwihartwa,
madarwa,
kwidhsitiiwwa harwee oobhaat y'iini.
Baraak midhhan - timmiima midhhan timeerni jillaay ani y'aabu.
11 Ani ushakwa udaayiibu.
Ushakwa udaayi t'anooti jillaay iyaayiibu.
12 Ukiraayi tak shakwaab baakaaywa,
t'anooti kina baakaaywa,
b'ashoot y'ee rhiiniyihoob,
t'anu ishtiit dhaabi iniin.
Malya tub'ashu t'anu tataftini,
bateeh birirti dan'i.
13 Ukiraay kina kiraayii shaakwaabuuyt t'anu ishtiit dhaabiini aree t'anooteeb kiihalag.
14 Ani fagar shakwa akati,
t'anooti akteen,
t'anooti han ikteennaheeb.
15 Oont'aaneet,
Ubaaba aneeb ikteeniyeet toonaatiit,
ani han Ubaaba akteen.
Aree ani t'anooti jillaay ayaayi.
16 Oon t'anooti kaleebiib baahaayiit anoot warit abari.
Ibakii bateeh han haay y'i andi.
Bataah han aniib whiss isniikar iyadna,
aree beentooy gaal reewwa gaal shakwaawwa daayi iyadna.
17 Ani umidhhanu aniiwayt,
Baabu aneeb areeyiini.
Malya aree masi agarti umidhhan nuunami andi.
18 Aniib umidhhan iniin gaal han kiihaay.
Ani uknaayiitu fadaagt niyaatii aniiw.
Ani barooh aniiwee dehaay hag abari,
aree barooh aniinee dehaay han hag abari.
Toon toonaati d'uuy aree Baabu waseeyaheeb.>>
idi.
19 T'a han masi een ibhaliyi sabbii Iyahuudi malu mhiin y'adhadhna.
20 Gwida bareesooh,
<<Jin hooy eefeen!
Haalayu!
Naanhooy tisnaakiirna?>>
idiin.
21 Laakiin wari aree,
<<Jin hooy eefeeni tak bak kahadiidiya!
Aajin kak hamashay dehay rhiseen?>>
idiin.
Iyahuudi Yasuu'aab Iribna
22 Wiyaay door,
udiini gawi iidiib Alguduseeb iidsamiin.
23 Suleemaaniib oogaw oowin iidneenaay Ukwaasanaay gawiib Yasuu'a hiireeri.
24 Uudehay barooh ikwilalni immarraayniit raatiyaan,
<<Naadoor ookiik baruuk tisoogiim hoon?
Oosdik unagweegwi sooyaa hoon,
baruuk Umasiihwa?>>
idiin.
25 Yasuu'a <<Ani suur akay sooyan hookna,
laakiin aamanaab kitteen.
Baabiyu oosmii adan'iyeet tim'uujisa anii dehaay ibadehana.
26 Laakiin baraak aniit anu kitteenayt ka'aamantaana.
27 Aniit t'anu whissu isnaakiirna.
Ani bateeh akteen,
aree bataah eetriimnaheeb.
28 Ani bateeh umidhhan udaayim aniiw,
door han aree kwidhi kiidiin.
Aree gaal han bateeh hoosu tafi kiidi.
29 Baabu aneeb yhiiyyeet tuuna naatiika gwidaakaatu.
Bateeh Baabiyu w'ayii taftiib gaal han ka'adgiriya.
30 Aneebwa Ubaabaawwa gala.>>
idi.
31 Malya uudehay barooh geediini jillaay aweeb tatafiyaan.
32 Laakiin Yasuu'a bareeyooh dehaay,
<<Baabu ishagaamtiyooh sooyaneeti gwidaat wawint m'uujisa suurookna ad'i.
Teen bateesooh keetaanaati sabbii geedteenheeb?>>
idi.
33 Baraah <<Teen bateesooh gaanaati sabbii han kageednay hook.
Laakiin ookfuuri sabbii geednay hook.
Baruuk aadamiib oobhaatwa,
laakiin ugarooyook Kwaasanaab tikwasiya!>>
idiin.
34 Yasuu'a <<Whaggiyookna kataabtu,
Ukwaasana <Baraakna kwaasanaabaana adi hookna.>
diyaabu.
35 Aaktab diyaab ikatiineet toona diimaab sidik tikatiyeet toona nikteen.
Ukwaasana aree been oodehay tudiigwattuuh tittiyeewaayeeb oodehay kwaasanaab isim.
36 Ani aree Ubaaba waasiyaheeb,
malya tuduniyaatii dehaay ifdigheeb.
Aflaay baraak been kifuuru kak tiyadna?
Ani Ukwaasanaay Ooru adiyeet toonaati sabbii han?
37 Aflaay Baabu dan'iyeet teena baad'iyeek,
baa'aamanaanaheeb.
38 Laakiin bateeh adan'iyeek,
baraak aneeb bit'aamanayneek han,
tim'uujisa aamanaana.
Malya baraak Ubaaba aniib eefiyeet toonaawwa,
ani Ubaabaay eefiyeet toonaawwa iikan tiyadna.>>
idi.
39 Baraah masi t'a han Yasuu'i abuuk jarrabiyaan.
Laakiin baruuh bareeyeeh y'ayee ifr'a iyhi.