Yasuu'a L'aasir Ishidhhan
11
L'aasir iidni tak Beetaanyaay ikwiir lhaa iifi.
Beetaanya Maryamwa tuukwa Maartaawwa hooy ikwiirneet gariyaatu.
2 Beet tishakwiin Yasuu'i iragadaayi kehii tifif tid'iit malya tehamooyteesooh tiiysis batuuh Maryamtu.
Uun L'aasir uulhaab aree batiiyooh sanu.
3 Bariitaah taakwa Yasuu'ii dehaay diigwatiyaaniit,
<<W'ankwanaay,
w'araawuuk w'areetiniyi lhaabu.>>
idiin.
4 Yasuu'a toon imaasiwihoob,
<<Toon tulhanaay w'aakharuuh L'aasiriit yat bitkaayeet toonaatu.
Tuun aree Ukwaasana matuun tiniiwi jillaay iikti tindi.
Masi aree Ukwaasanaay Oor matuun imaar miyaadiib iikti tindi.>>
idi.
5 Yasuu'a Maartaawwa tukwaatoohwa,
L'aasirwa areeya.
6 L'aasiriit tulhanaayti sakana imaasiwihoob,
oomhiin baruuh iifiyeeb masi maloot yina hooy yhagit.
7 Malya ikwiriyaatayeeh dehaay,
<<Yakaana,
Yahuudaab beeti nit'igir!>>
idi.
8 Baraah <<Seedna,
shalik doori hankaay uudehay beentooy rajamootiyook yhariwna.
Baruuk beentooy m'ageert niyaamtiniya han?>>
idiin.
9 Yasuu'a <<Oomb'i tamna maloot saa'aat hooy kiihaayna han?
Aflaay oomb'ii hiireeriiniibka iigaf kiidi.
Baruuh toon tuduniyaati nuur rhiini.
10 Laakiin baruuh whawaad hiireeriiniyihoob,
thibintuuyt eetgiif.>>
idi.
11 Malya een ibhali idiit har'ii,
masi <<W'araawuun L'aasir n'ariitiib dhibaabu,
laakiin ani difiit isib'ir andi.>>
idi.
12 Ikwiriyaatayaah igwibiina,
<<Seedna,
baruuh diwiiniyeek,
shabhami indi.>>
idiin.
13 Yasuu'a L'aasiriit tooyat mitiyaaya.
Laakiin baraah sidkiit n'ari hiisiyaan.
14 Aflaay Yasuu'a oosdik ugw'agwaab bareeh sooya,
<<L'aasir ayaabu,
15 laakiin bareeyookna jillaay ani bariiyooh geeb daayaab baakaayeet toonaatiib afirhaabu.
Shaawti baraak aamani tiyadna.
Yakaana barooh niibi.>>
idi.
16 Toomaas,
<<Utiita>> iidni,
ikwiriyaatay irawee dehaay,
<<Yakaana hinin han niidif,
aflaay bariiyooh geeb niiyyi!>>
idi.
17 Yasuu'a eeyanihoob,
L'aasir fadhigt yinaati suurii atoobsa yhagit.
18 Beetaanya Algudusee mhay kiiloomitir kit'aki.
19 Gwida Yahuudi dehay Maartaawwa Maryamii dehaay oosaniit yattiib allaayrahamooyiini jillaay y'aaba.
20 Maarta Yasuu'iib w'aay timaasiwihoob,
bariiyooh ashuushi jillaay tifir'a.
Laakiin Maryam ugawiib timhi.
21 Maarta Yasuu'ii dehaay,
<<W'ankwanaay,
baruuk tooy tiifiyeek,
usanuun yaayi kiidi!
22 Laakiin oont'a han Ukwaasana raattiniyeenaaka iniiweetook toona akteen.>>
tidi.
23 Yasuu'a batiiyooh dehaay,
<<Usanuuk tooyat hooy iidhhan indi.>>
idi.
24 Batuuh <<Baruuh t'aakharaatiit yin iidhhan indiyeet toona akteen.>>
tidi.
25 Yasuu'a batiiyooh dehaay,
<<Ani ooyaku,
ani umidhhanu.
Aneeb aamaneen baliin iyaayiineek han,
iidhhan iyadna.
26 Baliin aneeb aamaniit eedhhaniin,
door han iiyyi kiidiin.
Toon toona aamantinii?>>
idi.
27 Maarta <<Awooh han W'ankwanaay!
Baruuk Umasiih tikatiyeet toona aamanani.
Ukwaasanaay Oor oodehayii dehaay y'iiniib barook tikatiyeet toona aamanani.>>
tidi.
28 Maarta een ibhali tidiit har'ii,
t'agaraayt tookwa Maryam waliiktaayt haay titfal.
Malya <<Seedna tooy eefi,
aree batiisook raatiini.>>
tidi.
29 Maryam een ibhali timaasiwihoob,
asti yaktaayt willa barooh ashuush tehariw.
30 Oont'a Yasuu'a masi tugariya shuumaab kiiki,
laakiin masi Maarta hooy t'ashsheeb oomhiin iifi.
31 Iyahuudi Maartaay allaayrahamootiib oogaw y'aa iifiin,
batooh ashshigee rhiyaanihoob,
iramna.
Baraah batuuh waawtii dehaay umiimash tiibiyeeb hiisiyaan.
32 Maryam Yasuu'a iifiyeeb oomhiin tiktim,
aree barooh rhita.
Batuuh bariiyeeh iragadaayi whii dhibtaayt,
<<W'ankwanaay,
baruuk tooy tiifiyeek,
usanu yaayi kiidi!>>
tidi.
33 Yasuu'a batooh waawee rhiya,
masi uudehay batiiyooh geeb iifiin han kak waawiineeb rhiya.
Barooh ugin'uuh iribaayt winneet gadabiya.
34 Yasuu'a <<Barooh naad tibisna?>>
idi.
Baraah <<W'ankwanaay,
m'aa shibiba>> idiin.
35 Yasuu'a milootiya.
36 Malya Iyahuudi,
<<Kak barooh areeyaneeb shibibna!>>
idiin.
37 Laakiin gwadi bareesooh,
<<Ootak whamashay rhisiya.
L'aasir tooyatii naanhooy habiyaab kiiki?>>
idiin.
38 Yasuu'a masi t'a han winneet gadabiyaayt,
umiimash ibi.
Umiimashi dheefaay kehii amar iikti iifi.
39 Yasuu'a <<W'awi hooy giigsaana!>>
idi.
Maarta ootak w'ayaanaayt tuukwa <<W'ankwanaay,
baruuh itoobaaseekka fadhigt yina d'iyaabuuyt,
dhimiyaayt hoon baraami tindi.!>>
tidi.
40 Yasuu'a batiiyooh dehaay,
<<Batuuk aamantiniyeek Ukwaasanaay umatuun rhi tindii diyaayook kaaki han?>>
idi.
41 W'awi hooy giigisiyaan.
Yasuu'a asti ishbibaayt,
<<Ahammiid hook Baabu,
tisnaakirheeba.
42 Baruuk diimaab tisnaakiireetu toona akteen.
Laakiin een ibhali tooy oon oodehayi jillaay adi.
Shaawti baruuk diigwataayu tikatiyeet toona aamani iyadna.>>
idi.
43 Yasuu'a een ibhali idiit har'ii,
win hissii,
<<L'aasir,
fir'a m'aa!>>
idi.
44 Uutak w'aya ifr'a eeya,
iragadaayeehwa y'ayeehwa kafani halakii amhakwiraaba,
eefiir han halak kehii iifi.
Yasuu'a <<Ootak umiimashi halaka hooy giigsaana,
aree bagiigi.>>
idi.
Yasuu'i Madari Harawa
45 Gwida dehay Maryami rheesamtiib y'aa iifiin,
Yasuu'a id'iyeet toona rhiyaaniit barooh aamaniyaan.
46 Laakiin gwadi bareesooh Ifariisi ibeeniit Yasuu'a id'iyeet toona sooyaan.
47 Malya Ifariisiiwwa ifagiiriyaayi suurkinaawwa Iyahuudi majlis waliikiyaaniit,
<<Kak niwari?
Uun uutak ikwaaseet tim'uujisa kasteeh shibibna!
48 Barooh bak nee'isheek,
kassuuh uudehay barooh aamani iyadna.
Iroomaani y'iit udiiniyoon gawwa whaashoonwa kat'i iyadna.>>
idiin.
49 Gaal bareesooh Kayaafaas iidna,
been whawiliib baruuh win fagiiri iiktiib hadiidiya,
<<Baraak naat kitkanna!
50 Kassooh whaashi kwidhiika,
oodehayi jillaay gaal takiit yat hanyiiseet toona kitkanna han?>>
idi.
51 Kayaafaas een ibhali uukna diyaab kiiki.
Laakiin baruuh been whawil win fagiiriibuuyt,
Yasuu'a Iyahuudi dehayi jillaay iiyyi indiyeet toona iisrid.
52 Laakiin bareeh eebhat kiikeena,
masi kassooh Ukwaasanaay dehay ibarar gaal garooy shaawawiyooyti jillaay ikati.
53 Beet tooyintii fidnaab Iyahuudi suurkina bariiyeeh madar niyaamiyaan.
54 Aflaay Yasuu'a Yahuudaay bitik gw'agwuuyt hiireeraab kiiki.
Laakiin idifaayt umingaay dawil mhiin,
Afraayim iidneet tumadiina ibi.
Beentooy aree ikwiriyaatayi geeb is'a.
55 Ubaaskaay iid iidwilihoob,
gwida dehay w'iidi hankaay nhisuuyti jillaay whaash Algudus ibeen.
56 Baraah Yasuu'aab yhiriwna.
Ukwaasanaay gawiib immarraayniit gaal uraawii dehaay,
<<Naan teekwinna?
Baruuh sidik w'iidii dehaay y'i kiidi,
bak kiiki?>>
idiin.
57 Ifagiiriyaayi suurkinaawwa Ifariisiiwwa amir hassiyaan.
Yasuu'aab marriibka dehaay sooyiiniyeet toonaatu.
Aflaay baraah bariiyooh abuuk yhariwna.