Yasuu'a Beetaanyaay Imeeshimaat
12
Ubaaskaay w'iidii asagwit yina hooy mhiyaat iiktiini door,
Yasuu'a Beetaanyaab L'aasiriib indhiwa ibi.
L'aasir ootak baruuh tooyatii ishidhhaneebu.
2 Baraah bariiyooh dehaay beentooy diraar isoomirna.
Oodraar Maarta shagaamta.
L'aasir aree baliin tum'ariitiit tarabeesaati kehii Yasuu'i geeb iist'a oodehayiib gaalu.
3 Malya Maryam shakwiintiit karoora winneet alyaat naradii shagaamamaat Yasuu'iib iragadaayi kehii tifif tid'i.
Malya tehamooteesooh tiysis.
Tushakwiinti baraam oogaw kassooh itib.
4 Yasuu'iib ikwiriyaatayee gaal Yahuuda W'iskaaryuuti iidneeb,
malya Yasuu'a nuuni iid,
5 <<Tuun tushakwiin mhay shi ashteeti mhallagaayeeb naanhooy dalaabt kitti?
Imhallaga aree oodehay w'aniw naanhooy attiyeewiyaab kiikeen?>>
idi.
6 Baruuh een ibhali haay iideeb usabab,
oodehay w'aniwnaay dehaay n'akwmanaatiib kiiki.
Laakiin baruuh gwiharaabuuyt bak iid.
Imhallagaayeet nafi itfiyik,
laakiin baruuh uukna batiisooh iigwhiri.
7 Laakiin Yasuu'a,
<<Batooh isha d'iya,
tushakwiintiib mhiyaat toona aree ani atoobiiseet tooyintii dehaay danbiyeet toonaati.
8 Uudehay w'aniw diimaab geebookna daayi indi.
Laakiin ani diimaab geebookna daayi kaadi.>>
idi.
Ifagiiriyaayi suurkina L'aasiri Madar Yhariwna
9 Gwida dehay Yasuu'a Beetaanyaay eefiyeet toona imaasiwna.
Aflaay baraah beentooy ibeen.
Laakiin Yasuu'i sabab oobhaat kiiki.
Laakiin Yasuu'a tooyatii ishidhhaneeb L'aasiri shibuub yhiriwna.
10 Aflaay Ifagiiriyaayi suurkina L'aasir han madar hooy niyaamiyaan.
11 Bariiyooh sabbii aree gwida Yahuudi bareeh iribniit,
Yasuu'aab aamaniyaan.
Tinasraati Shuumti
12 Tooyin tumalya gwida dehay Ubaaskaay w'iidii dehaay y'aab iiktiin,
Yasuu'a Algudus beeti y'iini diyee imaasiwna.
13 Baraah akaay biir yakisiyaaniit bariiyooh ashuushi jillaay ifr'ana.
Baraah <<Hoosaana!
Hoosaana!
W'ankwanaay oosmii y'iiniib been baarakamaabu!
Israa'iileeb Whad'a baarakamaabu!>>
idiin.
14 Yasuu'a halkwiib imriit kehii y'am,
uuktaab diyaab ikatiyeet toonaatiit,
15 << Yaa Sihiyooniit oot biirakwii!
Shibibii,
whad'aayuuk
halkwi kehii amaa y'iini.>>
indi.
16 Been oodoor ikwiriyaatayaah een ibhali afhamaab kiikeen.
Laakiin Yasuu'a umatuunii dehaay yakamiyanihoob,
uuktaab bariiyooh diyaab iiktiyeet toona sh'iyaan.
Bariiyooh jilla aree baraah d'iyaab ikatiineet toona sh'iyaan.
17 L'aasir umiimashii waliikiyaayt tooyatii yakisiyanihoob rhiyaan uudehay Yasuu'i geeb iifiin,
toona tutikeet kastooh hadiidiyaan.
18 Been uudehay ugwida aree beet tum'uujisa kwaasaabuuyt barooh y'ashishna.
19 Ifariisi taktakee dehaay,
<<Shibibna,
hinin ansirami kindi!
Kassuuh uudehay barooh eetriimna.>>
idiin.
Yoonaani Gwadi Yasuu'aab Yhariwna
20 Yoonaani gwadi w'iidi door y'ibidni jillaay Algudus bayaa iifiin,
been oodehayi bitik iifiin.
21 Baraah Fiilibus ibeeniit,
<<Duuruun,
Yasuu'i shibuub nhariw.>>
idiin.
Fiilibus Jaliileeb teefeet Beetsaydaay iikti.
22 Fiilibus giigiyaayt Andraawoos toon toona sooya.
Mhallaah aree giigiyaaniit Yasuu'aab sooyaan.
23 Yasuu'a igwibi,
<<W'aadami Oor umatuun hooy iiwin indiyeet tuus'a t'a y'aatu.
24 Oosdik andi hookna:
gamhi harrooyt habba whaashiib dhibeetiit iyyi bitdiiyeek,
harrooyt habba akeetiit tingadi.
Laakiin tiyaayyeek,
gwidaat habba farri.
25 Eeknaayi midhhan areeyeen baliin imaar kiidiin.
Baliin toon tuduniyaatiib umidhhanoohna eerib umidhhan udaayim imaar iyadna.
26 Aneeb shagaamiiniibka ibakii eetriimheeb.
Aflaay aniib ushagaamana han ani daayi andiyeeb oomhiin daayi indi.
Baabu aree aneeb shagaamiiniibka areeyi indi.
27 Oont'a ugin'u gwirhaayeeb eefi,
naan iyaad andi?
Baabu,
toon toos'a haay baam'aaheeb?
Laakiin ani oon usabbii y'aabu.
Shaawti toon igwirhaayeet toos'a ibakii haay hasami andi.
28 Baabu,
oosmook soowina!>>
idi.
Malya tibreetee hiss hadiidiya,
<<Ani matuun haay y'an,
aree toon masi iiwari andi.>>
idi.
29 Uudehay beentooy iifiin whiss imaasiwna.
Gwadi bareesooh,
<<Thiwtu>> iidna,
wari aree <<Malak bariiyooh geeb hadiidiya!>>
idiin.
30 Laakiin Yasuu'a bareeyooh dehaay,
<<Uun whiss anii jillaay hadiidaab kiiki,
laakiin bareeyookna jillaay hadiidiya.
31 Oont'a toon tuduniyaati haakamti dooru.
Oont'a toon tuduniyaati haakim fidnaab ituugid indi.
32 Ani tubuutii asti yakamaniyihoob,
oodehay kassooh aneeb beeti iisikw andi.>>
idi.
33 Baruuh een ibhali hooy lhamaa iideet tooyat mitiyaayi.
34 Uudehay hadiidiyaana,
<<Whagguun Umasiih diimaab ikwaar indiyeet toona sooyiini hoon.
Aflaay baruuk W'aadami Oor ibakii asti yakami indi kak tindiya?
Uun W'aadami Oor aree aabu?>>
idiin.
35 Yasuu'a bareeyooh dehaay,
<<Uunuur masi shalik door geebookna daayi indi.
Aflaay uuthibin dehookna akaab baakaay,
unuuri door usalalookna soorarimna.
Uthibniib sakiiniib nhooh eebiyeeb kiikan.
36 Oonuur masi tibariinihoob,
bariiyooh aamanaana.
Shaawti nuuri dehay iikti tiyadna.>>
idi.
Een ibhali idiit har'ii,
Yasuu'a giigiyaayt bareesooh ugarooyooh ikwibis.
Oodehayi W'aamanti Naaw
37 Yasuu'a teen tim'uujisa kasteeh suurii ikwaaseek han,
baraah barooh aamanaab kiikeen.
38 Aflaay Unabi Isyaas diyaab iiktiyeet tuuna sidik tiikti,
<<W'ankwanaay,
hinin soonaneet tudiigwat aamaniyaab aabu?
W'ankwana y'akrireeh aab rhisiya?>>
idi.
39 Baraah Yasuu'iib w'aamanti adgiraab kiikeena,
Isyaas han bak diyaabuuyt:
40 <<Ukwaasana igw'adeehna hamasheesiya,
igin'aayeehna assiya.
Shaawti igw'adaahna karhiyaana,
igin'aayaahna ka'afhamiyaan.
Baraah anii dehaay agartiit mheelami kiidiin.>>
diyaabi.
41 Isyaas een ibhali haay iideeb usabab,
Yasuu'iib umatuun rhiyaayt bariiyooh hadiidiya.
42 Beenhoob han Iyahuudi suurkinaayee gwida barooh aamaniyaan.
Laakiin Ifariisi sabbii w'iimaanoohna lawsaab kiikeen.
Baraah Ifariisi Iyahuudi diini gawii isfar'aneet toona irkwiin.
43 Baraah Ukwaasanaay hamaadiika dehayi hamaad areeyaan.
44 Malya Yasuu'a win hissii,
<<Aneeb aamaniiniib,
aneeb oobhaat aamanaab kiiki,
laakiin aneeb diigwatiyaab han aamaniini.
45 Aneeb rhiiniib,
aneeb diigwatiyaab han rhiini.
46 Tuduniya oonuur t'iiteeb akay y'an.
Aflaay aneeb aamaniiniib thibniib daayi kiidi.
47 Aniit tudiigwat maasiwtiit baaraamka,
ani barooh haakami kaadi.
Ani tuduniya haakamti jillaay y'aab kaaki,
laakiin ashidhhiini jillaay y'aabu.
48 Baliin aneeb eerib,
tudiigwattu baagabbalamaya aree bareeh gaal haakami indi.
Ani hadiidaneet tikalma t'aakharaatiib bareeh gaadiyoohna iikti iyadna.
49 Uun baruuh sidiku,
ani uknaayiitu had'aayeetii hadiidaab kaaki.
Laakiin Ubaaba aneeb diigwatiyaab sooyaneetu toona ibakii andiyeet toonaatu,
hadiidaniyeet toonaatu.
50 Bariiyaah ibhali aree umidhhan udaayim haay y'eeneet toona akteen.
Ani andiyeet toona,
Ubaaba sooyaa diyaayu ikatiyeet toonaatu.>>
idi.