Yasuu'a Ikwiriyaatayeeh Ragada Ishaagwidh
13
Oont'a w'iid lhayt iikti.
Yasuu'a toon tuduniya ishtiit Ubaaba hooy iibiyeet tuus'a y'aat tiiktiyeet toona iktiin.
Baliib barooh ooknaay iiktiin,
toon tuduniyaatiib iifiin,
diimaab areeya.
Winneet ureerooh aree rhisiya.
2 Yasuu'aawwa ikwiriyaatayaahwa diraari kehii is'ana.
Uubliis aree suur akay Yahuudaab W'iskaaryuuti Siimooni oori gin'iib shuumaa iifi.
Barooh Yasuu'i nuunti isookwin.
3 Yasuu'a Ubaaba timmiima akrir hiiyyaab iiktiyeet toona iktiin.
Baruuh Ukwaasanaay y'aab iiktiyeet toona iktiin,
Ukwaasana eebiyeet toona han iktiin.
4 Baruuh oodiraar hooy yakiyaayt,
ugamiisooh ifr'a,
aree bashkiir ilbab.
5 Yasuu'a shalik yam tashiib id'iit ikwiriyaatayi ragada ishaagwidhaayt,
ubashkiir ulabaab iiktiyeeb iyhaayt bareeh iragada dehaay balamisiya.
6 Malya Yasuu'a Siimoon Bitrusii dehaay eeya.
Bitrus <<W'ankwanaay,
aniib iragada iishgwadh tindiya han?>>
idi.
7 Yasuu'a bariiyooh dehaay,
<<Ani adan'iyeet toona oont'a ka'afhamta,
laakiin malya afhami tindiya.>>
idi.
8 Bitrus <<Abadan,
aniib iragada iishgwadh kitdiya!>>
idi.
Yasuu'a igwibi,
<<Iragadaayeek baashaagwiidheek,
shaawti anii kwiriyaataayi iikti kitdiya.>>
idi.
9 Siimoon Bitrus,
<<W'ankwanaay,
aflaay aniib iragada eebhat baashaagwiidha,
laakiin aniib y'ayeewwa ugirmaawwa han shaagwidha!>>
idi.
10 Yasuu'a <<Baliin ishagwadh winneet nhasa,
iragada nuun shagwadh masi kiihariwna.
Kassaakna nhasaana gaal nuun.>>
idi.
11 Yasuu'a barooh tiltiit nuuni indiib ootak iktiinayt een ibhali hadiidiya,
<<Kassaakna nhasaana gaal nuun.>>
iid.
12 Yasuu'a bareeh iragada ishaagwidhaayt har'ii,
ugamiisooh ikwaayt oodiraari kehii umhiinooh beeti y'agar.
Bareeh raatiya,
<<Oont'a dehookna ad'iyeet toona afhamtaana?
13 Seednaab waliikteenheeb,
W'ankwana waliikteenheeb,
bak aree daayiib teefeena.
Ani aree baku.
14 Ani W'ankwanaayuukna,
Seednaayuukna,
hallaay iragadaayeekna ashaagwidh.
Baraak aree gaal uraawi ragada tishagwidhneet toonaati.
15 Toon toona ani sakaneet t'iiteena baraak han sakteeneet toona hookna aharriiw.
16 Oosdik andi hookna:
ikishiya w'ankwanaayiisoohka winkaab kiikeen.
Udiigwatama han barooh diigwataanaayka winkaab kiiki.
17 Oont'a baraak teen teena tikteenna,
bateeh haay shagaamteeneek baarakami tiyadna.
18 Ani kasseekna kaadi,
ani waasaab akatiyeeb baliib akteen.
Laakiin uuktaab ibakii sidik ikati,
<Uutak tim'ariitu geebu tamiyaab ashoosamiyaheeb.>
indi.
19 Tuun tuuna baa'akaay ani oont'a sooyani hookna,
aflaay tikatiyihoob,
Ani Barooh akatiyeet toona aamani tiyadna.
20 Oosdik andi hookna:
ani diigwataniyeeb gabbalamiiniibka,
aneeb han gabbalamiiniheeb.
Aneeb gabbalamiiniibka aree,
aneeb diigwatiyaab han gabbalamiini.>>
idi.
Yasuu'a Bitrusiit Titaali Isrid
21 Yasuu'a een ibhali idiit har'ii,
winneet gwirhaayeeb daayaayt gw'agwuuyt hadiidiya,
<<Oosdik andi hookna:
bareesookna gaal iitilheeb indi.>>
idi.
22 Ikwiriyaatay taktakeeb nakamiyaana,
aree aab isehiriweeb igamna.
23 Gaal ikwiriyaatayee Yasuu'a areeyaab iiktiyi,
baruuh Yasuu'i daraag iist'a.
24 Siimoon Bitrus barooh beeti tuuliyaayt,
<<Aab haay isehariiweeb barooh raata?>>
idi.
25 Uun ukwiriyaataayi Yasuu'aab beeti ikilasaayt,
<<W'ankwanaay,
uun baruuh aabu?>>
idi.
26 Yasuu'a <<Ani hadhiib gaal tulamtiib amistiit aniiweeb been barooh ikati.>>
idi.
Malya hadhiib yakisiyaayt y'amisaayt Yahuudaab Siimoon W'iskaaryuuti oor yhii.
27 Yahuuda willa yhadhi yakisiyanihoob,
uubliis barooh shuumiya.
Yasuu'a bariiyooh dehaay,
<<Toona iid'a tindiyeet willa d'iya!>>
idi.
28 oodraari kehii iifiin aaraw een ibhali Yasuu'a bariiyooh dehaay iideeb gaal han afhamaab kiikeen.
29 Laakiin imhallaga bariiyooh geeb iifiinayt,
Yasuu'a barooh difiit w'iidii dehaay yhariwneet toona haay dilibti miyaay sooyaneeb hiisiyaan.
Tari oodehay w'aniw naat iniiweet toona sooyaneeb hiisiyaan.
30 Yahuuda yhadhi iyhaayt gaal door barraab ifr'a.
Aree uudoor hawaadamaabu.
Tiwasi Tigayiit
31 Yahuuda ifir'a har'ii,
Yasuu'a <<Oont'a W'aadami Oori matuun lawi indi,
aree Ukwaasanaay matuun bariiyooh lawi indi.
32 Ukwaasanaay matuun bariiyooh lawiiniyeek,
Ukwaasana aree W'aadami Oori matuun barooh ooknaay lawsi indi.
Toon toona aree gaal door iid'a indi.
33 Y'araan,
ani shalikt midda geebookna daayi andi.
Baraak aneeb tehariwna,
laakiin Iyahuudi sooyaneet toonaatiit,
aflaay oont'a bareek sooyani:
Ani eebiyeeb oomhiin baraak kitbeena.
34 Oont'a bareek gayiit wasi aniiw hookna:
taktak areeyaana.
Ani bareekna areeyaneet toonaatiit,
aflaay baraakna han ibakii taktak areeyaana.
35 Baraak taktak areeteeneek,
aflaay uudehay kassuuh anii kwiriyaatay tikatiineet toona iikan iyadna.>>
idi.
36 Siimoon Bitrus barooh raatiya,
<<W'ankwanaay,
naad iibi tindiya?>>
idi.
Yasuu'a <<Oont'a ani eebiyeeb oomhiin beeti teetriimeetu toona ka'adgirta.
Laakiin malya iitramheeb tindiya!>>
idi.
37 Bitrus raatiya,
<<W'ankwanaay,
oont'a naanhooy kaaram hook?
Ani bariiyook jillaay tooyatii dehaay amaaru.>>
idi.
38 Yasuu'a <<Anii jillaay tooyat sidik dehaay amaarwa?
Ani oosdik andi hook:
baruuk uujiik baakuukillaayi mhay doora ittiwheeb tindiya.>>
idi.