Yasuu'a Ubaaba Eebiib Usalalu
14
Yasuu'a bareeyooh dehaay,
<<Baahasiikna,
Ukwaasana aamanaana,
aneeb han aamanaana.
2 Baabiyu oogaw gwidaat gurfa hooy eefeen.
Ani aree bareek mhiin dehookna isuumir andi.
Bak biikaayeek aree ani kasooyan hookna.
3 Ani difiit mhiin dehookna asoomiiri har'ii,
agartiit aneeb beeti iyaay hookna andi.
Shaawti ani eefiyeeb oomhiin iikti tiyadna.
4 Ani iibi andiyeeb oomhiin istoobiib usalal baraak tikteenna.>>
idi.
5 Toomaas bariiyooh dehaay,
<<W'ankwanaay,
baruuk naad teebiyeeb kinkan,
aflaay been usalal kak nikteen?>>
idi.
6 Yasuu'a bariiyooh dehaay,
<<Ani usalalu,
oosdiku,
aree umidhhanu.
Aneeb anu Ubaaba eebi gaal han kiihaay.
7 Baraak sidik aneeb tiktiinneek,
Baabu han tiktiinna.
Amseenee fidnaab barooh tikteenna aree rhaabaana.>>
idi.
8 Fiilibus <<W'ankwanaay,
Ubaaba rhisaa hoon,
beet toona winneet nhariw.>>
idi.
9 Yasuu'a <<Fiilibus bareek kasseekna gwida door geebookna iifi,
masi aneeb kanaab kitteena han?
Aneeb rhiyaabka,
Ubaaba han rhaabu.
Aflaay naanhooy Ubaaba rhisaa hoon tindiya?
10 Fiilibus,
ani Ubaabaay eefiyeet toonaawwa,
Ubaaba aniib eefiyeet toonaawwa aamanaab kitta han?
Ibhali ani dehookna bhaliiyaneeb uknaayiisu y'aab kiikeen.
Ubaaba aniib kwarriib been ooknaay shaga daayiini.
11 Ani Ubaabaay eefi,
Ubaaba aniib eefi andiyihoob aamanaanheeb.
Bak biikaayeek aree ani akwasiyeet tim'uujisaati sabbii aamanaanheeb.
12 Oosdik andi hookna:
aneeb aamaneen baliin,
ani adan'iyeet teena iid'a iyadna.
Ani Ubaaba iibi andiyayt,
baraah masi winnayt han iid'a iyadna.
13 Aniib oosmii tehariwneenaaka dehookna iid'i andi.
Aflaay Ubaabaay umatuun W'oorii lawi indi.
14 Aniib oosmii naatka tehariwneek,
ani iid'i andi.
Eeshuuk Imugadasaayi Waadiya
15 Baraak aneeb areeteeneek,
aniit tiwasi tisnaakiirna.
16 Ani Ubaaba raati andi.
Baruuh aree weer shamaamiiga diimaab geebookna daayiiniib iyaaw hookna indi.
17 Baruuh Ukwaasanaay oosdik lawseen Eeshuuku.
Tuduniya barooh rhi kitdi tari iikan kitdiyayt,
barooh ishish kitdi.
Laakiin baruuh geebookna eefi,
aree hookna ikwaar indiyayt,
barooh tikteenna.
18 Ani giiganiyihoob,
baraak ood'ookna itoo'ish kitdiina,
ani agarti y'i hookna andi.
19 Shalikt middaati har'ii,
tuduniya shaawti rhiheeb kitdi.
Laakiin ani dhhaniibu,
baraak han iidhhan tiyadnayt,
baraak rhiheeb tiyadna.
20 Been oomb'i ani Baabiyu eefiyeet toonaawwa,
baraak aniib teefeeneet toonaawwa iikan tiyadna.
Oont'aaneet ani hookna eefi.
21 Baliin aniit tiwasi gabbalamiit isnaakiir,
aneeb areeyeen bareeh ikatiin.
Baabu aneeb areeyeen baliib areeyi indi.
Ani han bareeh areeyani,
ugarooyu aree dehaay lawsi andi.>>
idi.
22 Malya Yahuuda (Yahuudaab W'iskaaryuuti kiiki) Yasuu'ii dehaay,
<<W'ankwanaay,
baruuk ugarooyook naanhooy hinee dehaay lawisitiib niyaamtiniya?
Naanhooy tuduniyaatii dehaay lawsi kitdiya?>>
idi.
23 Yasuu'a bariiyooh dehaay,
<<Aneeb areeyiiniibka aniib ut'aliim isnaakiir.
Baabu barooh areeyi indi,
Baabuuwwa aneebwa barooh beeti y'iit geeb nikwaar niyad.
24 Aneeb baa'areeyayka,
aniib ut'aliim han kiisinaakir.
Ut'aliim baraak timaasiwneeb aree aniib kiiki,
laakiin Ubaaba aneeb diigwatiyaanaayu.
25 Toon toona ani masi geebookna iifiyi door sooyan hookna.
26 Aashuuk Itageega ishamaamiiga Ubaaba aniib oosmii iifdig indiyeeb,
naatka allami hookna iyadna.
Aree ani sooyaneetookna toona kastooh sh'asi hookna iyadna.
27 M'asig geebookna an'iish,
um'asig w'aniib aniiw hookna.
Tuduniya tiniiweet toonaatiit iyaaw hookna kaadi.
Baahasiikna,
aree baarakwiina!
28 Baraakna aneeb,
<Giigani,
laakiin agarti y'i hookna andi.>
diyee timaasiwnaheeb.
Ubaaba aniika winkaabuuyt,
baraak aneeb areetiineek,
ani Ubaaba beeti andiifeet toonaatiib afirhitiina.
29 Tuun tuuna akaat baakaay oont'a sooyan hookna.
Shaawti batuuh tikatiyihoob,
baraak aamani tiyadna.
30 Ani geebookna gwidaana hadiidi kaadi.
Shaawti toon tuduniyaati haakim y'iini.
Laakiin baruuh anii kehii akrir kiibari.
31 Ani Ubaaba areeyaniyeet toona tuduniya ibakii tikteen.
Oon usabbii aree baruuh sooyiiniyeetu toona kastooh adan'i.>>
idi.
Yasuu'a <<Oont'a m'aana,
niidif.>>
idi.