Yasuu'a Sidki Inabu
15
Yasuu'a <<Ani sidki inabu,
Baabu aree dir'aat kinaabu.
2 Baruuh firaay baayaksay ool'iidka hoosu kant'i.
Firaay haay y'iiniib ool'iidka inwiik,
aflaay nhasiit gwida firaay haay y'iini.
3 Baraakna ani allamaneetookna toonaatii suur akay nhasaana.
4 Baraak aniib daayaana,
ani han hookna daayi andi.
Uul'iid uukna firaay haay ka'eeya,
laakiin w'inabi hindiib daayiiniyeek,
firaay haay y'iini.
Baraak han bak aniib daayi bitdiineek,
firaay haay y'i kitdiina.
5 Ani w'inabu,
baraak aree ool'iidaana.
Baliin aniib daayeen,
aree ani bareeyooh daayaniyeeb,
gwida firaay haay y'i iyadna.
Aneeb anu aree naat han tid'aneet toona ka'adgirtaana.
6 Aniib baadaayayka,
ool'iidiit atoogdiit balami indi.
Baliin aal'id dibaltiit n'eetiib itoogiidna,
beentooy aree itooliiwna.
7 Baraak aniib daateeneek,
aniib ibhali aree hookna daayeeneek,
aflaay toona tutehariwneet kastooh raati tiyadna,
aree imaar tiyadna.
8 Baabiyu umatuun,
baraak gwida firaay tid'anihoob lawiini.
Toon tehay'aatii aree anii kwiriyaatay tikatiina.
9 Baabu aneeb areeyiini,
ani han bak areeyani hookna.
Aniib ooreeriib daayaana.
10 Ani Baabiiti tiwasi asnaakiraayt ureeriyooh daayaneet toonaatiit,
baraak aniit tiwasi tisnaakiirneek,
aniib ooreeriib daayi tiyadna.
11 Aniit tifirha diimaab geebookna daayeeni jillaay ani een ibhali sooyan hookna.
Tifirhaataakna han timmiimaat ikatiin.
12 Taan bataah aniit tiwasi ikatiin:
Ani areeyani hookna,
baraak han taktak areeyaana.
13 Tak y'araweeyooh jillaay umidhhanooh iniiwihoob,
oonaayka winka reer kiihaay.
14 Ani sooyaneet teena tid'aneek baraak arawi tikatiina.
15 Ishagaamana w'ankwanaayuuhna dan'iyeet toona kiikannayt,
shaawti ishagaamana iyaad hookna kaadi.
Ani Baabiisu amaasiweet toona kastooh sooyan hookna,
shaawti y'araw iyaad hookna andi.
16 Aneeb baraak waasaayi kitteena.
Laakiin ani bareek waasanaayt difiit gwida firaay baanhiid haay eeteeni jillaay afdig hookna.
Aflaay Ubaaba aniib oosmii tehariwneet toona kastooh iyaaw hookna indi.
17 Tuun batuuh aniit waseetu:
taktak areeyaana.
Uudehay ikwiriyaatay iribna
18 Uudehay eeribnuukna,
baraah hankaab aneeb iribneet toona sh'aana.
19 Baraak tuduniyaatiib tikatiineek,
tuduniya tuknaatiit areeyi hookna tindi.
Laakiin ani toon tuduniyaatii waasan hookna,
batiiyeeh aree kitteena.
Oon usabbii aree uudehay eeribna hookna.
20 Ani sooyaneet toona,
<Ikishiya y'ankwanaayeeka wawinkaab kiikeen.>
sh'aana!
Uudehay aneeb amaag weeraab ikatiineek,
bareek han amaag waraayeen hookna.
Aniib ut'aliim isnaakiirneek,
bareek han isnaakiirna hookna.
21 Laakiin baraah aneeb diigwatiyaab kiikanna aree baraak aniib tikatiineet toonaati sabbii,
baraah toon toona kastooh sakeen.
22 Ani bareeyooh dehaay y'anaayt bhaliisamaab baakaayeek,
baraah maagti gwabab kiid'iin.
Laakiin oont'a baraah tumaagtoohna afoomi kiidiin.
23 Aneeb inriibka Baabu han inriib.
24 Suur gaal han kwaasaab biikaayeet teena ani bareeyooh bitik kwaasaab baakaayeek,
maagti gwabab iibriineet toona kit'atookkaan.
Laakiin oont'a baraah ani ad'iyeet tim'uujisa rhiyaana,
masi aree aneebwa Baaboowwa mhalleen iribna.
25 Laakiin whaggiyoohna kataabt tuuna ibakii tikatiyeet toonaatu:
<Sabab anu iribnaheeb.>
indi uuktaab.