Eeshuuk Imugaddasa
16
Yasuu'a bareeh sooyi,
<<Een ibhali haay andiyeeb usabab;
w'iimaanookna bitkwidhsayni jillaay ikati.
2 Udiini gawii iifir'a hookna iyadna.
Damaan aree y'iini,
bareekna indiirka Ukwaasanaay jillaay toon toona shagaamiiniyeeb hiisiini.
3 Uudehay Ubaabaawwa aneebwa biikaanneet toonaatii,
teen teena kehookna iid'a iyadna.
4 Laakiin ani toon toona sooyan hookna.
Aflaay uudoor y'iit teen teena id'anihoob,
ani sooyaneet toona baraak sh'i tiyadna.
Ani geebookna iifiyi sabbii,
suur een sooyaayookna kaaki.
Eeshuuk Imugaddasaayi shaga
5 Laakiin oont'a ani beeb aneeb diigwatiyaab beeti iibi andi.
Masi aree naad iibi andiyeeb bareesookna gaal han,
<Nhooh teebiya?>
diyaab kiiki.
6 Oont'a teen teena sooyan hooknayt,
igin'aayaakna gadab itabna.
7 Laakiin oosdik andi hookna:
ani giiganiyeet tuuna dehookna hanyiis.
Ani baagiigayeek,
ishamaamiiga y'i hookna kiidi.
Laakiin ani giiganiyeek,
malya barooh dehookna diigwati andi.
8 Aashuuk y'eenihoob,
tuduniyaati dehay amag gwabab ibariineet toona sooyi iyadna.
Masi tooshbu sooyi iyadna,
Ukwaasanaay hukwim han sooyi iyadna.
9 Baraah aneeb aamanaab kiikeenayt,
maagnaayt sakeen.
10 Ani Ubaaba iibi andi,
aree baraak shaawti rhiheeb kitdiinayt,
baraah Ukwaasanaay w'adliib shhagwaaba.
11 Toon tuduniyaati haakim suur akay haakamamaabuuyt,
baraah whukwimiib shhagwaaba.
12 Ani masi gwidaana andiyeetookna abari.
Laakiin oont'a baraak afhamteenee dehaay gwidaata.
13 Aashuuk y'eenihoob,
Ukwaasanaay oosdik rhisi iyadna.
Kassooh oosdik ookiik rhisi hookna iyadna.
Baraah iknaayeet had'aayeetii hadiidi kiidiin.
Laakiin baraah toona t'eemsiiwneet hadiideena,
teena har'ook y'eent aree sooyi hookna iyadna.
14 Baraah ani andiyeet toona abkiit bareek sooyeenayt,
aneeb matuun iyawnaheeb.
15 Baabu ibariyeet tuuna kastuuh aniitu.
Oon usabbii aree Aashuuk ani aniiweet toona abkiit bareekna sooyeenayt een andi hookna.
Tifirhaawwa Igadabwa
16 Shalik door shaawti rhi kitdiinaheeb,
laakiin malya shalik doori har'ii rhi tiyadnaheeb.>>
idi.
17 Ikwiriyaatay gwadi taktak sakanaayaana,
<<Uun naa miyaad ikati?
Shalik door rhi kindi indi,
malya shalik doori har'ii barooh rhi niyad indi.
Baruuh masi,
<Ani Ubaaba iibi andiyayt tuun tikati.>
indi.
18 Uun shalik door naan ikati?
Baruuh indiyeet toona kanaab kinki.>>
idiin.
19 Baraah naan raataa iidneeb Yasuu'a iktiin.
Aflaay bareeyooh dehaay,
<<Shalik door rhi kitdiinaheeb adi hookna,
malya shalik doori har'ii rhi tiyadnaheeb adi hookna.
Baraak taktak sakanaateeneet toon toona kitti han?
20 Oosdik andi hookna:
baraak waawi tiyadna,
milooti tiyadna.
Laakiin uudehay afirhi iyadna,
aree baraak gadabi tiyadna.
Laakiin igadabaakna firhaat iikti iyadna.
21 Takat firaay danwiilihoob,
udooruuh y'aabuuyt lhamtini.
Laakiin w'oor itfariyihoob baruuh tuduniyaatiib faraay ikatiyi sabbii batuuh afirhitni,
tilhanayteeh aree teebdhiin.
22 Baraakna han bak tikatiina:
oont'a gadabteena,
laakiin malya masi rhi hookna andi,
aree afirhi tiyadna.
Baliit tifirha aree gaal han hookna iniinee dehaay ka'adgiriya.
23 Been uumb'i y'iiniyihoob,
baraak naat han raati kitdiinaheeb.
Oosdik andi hookna:
aniib oosmii Ubaabaay tehariwneet toona kastooh iyaaw hookna indi.
24 Oont'a ookiik baraak aniib oosmii naat han raataab kitteen.
Raataana imaar tiyadna,
aflaay tifirhaataakna timmiimi iyadna.>>
idi.
Tuduniyaati Kehii Tinasra
25 Yasuu'a bareeh sooya,
<<Ani teen teena mitaalee sooyan hookna.
Laakiin ani mitaalee baahadiidayi door y'i indi.
Ubaabaay oosdik gw'agwuuyt sooyi hookna andi.
26 Been uumb'i y'iiniyihoob,
aniib oosmii barooh raati tiyadna.
Ani bareeyookna dehaay Ubaaba raati andi kaadi hookna.
27 Ubaaba uukna areeyiini hookna.
Baraak aneeb areetaani sabbiiwwa,
ani Ukwaasanaay y'aab akatiyeet toona aamantaani sabbiiwwa,
baruuh han areeyiini hookna.
28 Awooh ani Ubaabaay y'aabu,
aree tuduniyaatii dehaay y'an.
Oont'a aree tuduniya ishtiit Ubaaba beeti it'igir andi.>>
idi.
29 Malya ikwiriyaatayaah bariiyooh dehaay,
<<Oont'a baruuk gw'agwuuyt hadiidtiniya,
mitaalee hadiidaab kitta.
30 Oont'a baruuk naatka tikteeniyeet toona nikan.
Gaal naat raatiiniyeet toona kitehariwa.
Tuun tuuna aree baruuk Ukwaasanaay y'aab tikatiyeet toona aamansitni hoon.>>
idiin.
31 Yasuu'a <<Oont'a aamantaana han?
32 Damaan y'i hookna indi,
suur akay aree y'aabu,
kassaakna aree itbirir tiyadna.
Gaalka whaashookna ookna iidif tiyadna,
ani aree ood'u ituu'ish andi.
Laakiin ani sidik ood'u kaaki,
Ubaaba geebu eefi.
33 Ani bareek een haay andiyeetookna toona,
aflaay aniib amshawwaaytiit m'asig imaar tiyadna.
Tuduniya lhasi hookna tindi.
Laakiin fagaramaana!
Ani tuduniya agrib!>>
idi.