Yasuu'a Ugarooyooh Dehaay Siileeliya
17
Yasuu'a een ibhali idiit har'ii,
teebri ishbibaayt siileeliya:
<<Baaba,
tuus'a y'aatu,
W'oorook soowina,
aflaay W'oor han isoowiin hook.
2 Baruuk barooh kassooh oodehayi kehii had'aayeet tehiiyya.
Aflaay baliib kasseeh baruuk barooh tehiiyyeeb aree bareeh umidhhan udaayim iniiw ikati.
3 Umidhhan udaayim bariitook kanaant ikati.
Ukwaasana usidkiib oongaal,
masi ubaruuk diigwattaneeb Yasuu'a Umasiihiit kanaant ikati.
4 Ani toobuuti kehii umatuunook rhisan.
Ishanha baruuk aneeb tehiiyyeeb faaysan.
5 Baaba,
tuduniya daamaat baakaay geebook iibriyeeb umatuun t'iiteena,
oont'a han suurook soowinaheeb.
6 Tuduniyaatiib eefeen baliib baruuk aneeb tehiiyyeeb bareeh asookin hook.
Baraah bariiyeeka,
aree aneeb tehiiyyaheeb.
Baraah ibhaliyeek isnaakirna.
7 Oont'a aree baraah kastooh toona baruuk tehiiyyeetu bariisook y'aat tikatiyeet toona ikteenna.
8 Ani baruuk tehiiyyeetu tudiigwat askatim,
baraah han gabbalamiyaan.
Ani sidik bariisook y'aab akatiyeet toona ikteenna.
Baruuk diigwataayu tikatiyeet toona han aamaniyaan.
9 Ani bareeyooh dehaay siileelan eefi.
Tuduniyaati dehayii dehaay kasiileelan,
laakiin baliib baruuk tehiiyyeeyu dehaay siileelani.
Baraah bariiyeek ikatiin.
10 Abariyeena kastuuh bariitooktu,
aree baruuk tibariyeena kastuuh aniitu.
Aniib umatuun aree bareesooh lawiini.
11 Oont'a ani marook y'ani,
shaawti tuduniyaatiib daayi kaadi.
Laakiin baraah tuduniyaatiib daayeen.
Ubaaba Umugaddas!
Oosmook w'akraab aneeb tehiiyyeenaay simii bareeh s'asiga.
Aflaay baraah aniitwa bariitookwa gal ikatiin.
12 Ani bareeyooh geeb iifiyi door,
oosmook w'akraab been oosim aneeb tehiiyyeenaay bareeh as'asig aree agw'ad.
Ootak ookwidh yhayid nuun bareeh gaal han hooy kwidhaab kiiki.
Shaawti uuktaab sidik ikati.
13 Oont'a ani y'ani hook,
aree een ibhali ani masi tuduniyaatiib haayee hadiidani.
Aflaay baraah timmiimaat firha aniit igin'aayeeb ibariin ikatiin.
14 Tudiigwattook bareeh sooyan.
Ani tuduniyaatii baakaayeet toonaatiit,
baraah han tuduniyaatii kiikeenayt,
uudehay bareeh iribna.
15 Bareeh tuduniyaatii sifar'ooyt hook kaahariw.
Laakiin bareeh y'amag dehayii tis'asiigeet toona hook aharriiw.
16 Ani tuduniyaatii baakaayeet toonaatiit,
baraah han tuduniyaatiib kiikeen.
17 Bareeh usidkii marook abika,
ibhaliyaak sidika.
18 Baruuk aneeb tuduniya beeti tifdigeenaayt,
ani han bareeh tuduniya beeti afandiig.
19 Bareeyooh jillaay aree ugarooyu nuunan.
Aflaay baraah han sidik igarooyeehna barook nuuneen.
20 Bareeh eebhatni jillaay dehook kasiileelan.
Laakiin baliib bareetoohna tudiigwat maasiwtiit aneeb aamaneen han dehaay siileelani.
21 Baraah gal ikatiini jillaay dehaay siileelani.
Baaba!
Baruuk aniib teefiya,
ani bariiyook eefiyeenaayt,
baraah han hoon daayeen ikatiin.
Baraah gal ikatiin,
shaawti uudehay aneeb baruuk diigwataayu tikatiyeet toona aamani iyadna.
22 Baruuk tehiiyyeeyu umatuun beeb ani bareeh ahii.
Aflaay baraah aniitwa bariitookwa gal ikatiin.
23 Ani bareeyooh eefi,
baruuk aniib tehaya.
Aflaay baraah han winneet gal ikatiin.
Shaawti tuduniyaati dehay aneeb baruuk diigwataayu tikatiyeet toona iikan iyadna.
Aneeb areetaneet toonaatiit bareeh han areetiniyeet toona iikan iyadna.
24 Baaba,
bareeh aneeb tehiiyyaheeba,
ani daayaniyeeb oomhiin aree geebu daayeeneet toona aharriiw.
Shaawti umatuun baruuk aneeb tehiiyyeeb,
aniib umatuun rhi iyadna.
Baruuk tuduniya kwaasaab baakaay areetaheeb.