Yasuu'iit T'abuuki
18
Yasuu'a toon toosileel idiit har'ii,
abaat Gadruun iidneet ookiik ikwiriyaatayi geeb giigiya.
Been oomhiin aree dir'aat tiifi,
Yasuu'aawwa ikwiriyaatayaahwa batooh shuumiyaan.
2 Gwida doora Yasuu'a ikwiriyaatayeeh geeb beentooy ammarriyaabuuyt,
Yahuuda itoolana beet tudir'aati mhiin iktiin.
3 Aflaay Yahuuda tudir'a shuumiya.
Roomaani kajar gwadibwa,
Ifagiiriyaayi suurkinaawwa Ifariisiiwwa fidgaab iiktiini udiini gawi gw'aadiiga gwadibwa geeb iifiin.
Baraah n'eeti sigwidwa,
faanuusaabwa,
gadh'aawwa yaksaaba.
4 Yasuu'a toona dehaay iikti tiid kastooh whankaay iktiin.
Aflaay bareeh beeti hantaayaayt,
<<Aab tehariwna?>>
idi.
5 Baraah <<Yasuu'aab W'annaasiraayi>> idiin.
Baruuh <<Ani barooh akati.>>
idi.
Yahuuda itoolana bareeyooh geeb beentooy ingid.
6 Yasuu'a <<Ani barooh akati.>>
idiyihoob,
baraah har'a y'agarniit whaashi kehii dhibiyaan.
7 Yasuu'a masi bareeh raatiya,
<<Baraakna aab tehariwna?>>
idi.
Baraah <<Yasuu'aab W'annaasiraayi>> idiin.
8 Yasuu'a <<Ani barooh akatiyeet toona sooyan hookna.
Aneeb tehariwneek aflaay een eenda eeraw giigsaana.>>
idi.
9 Aflaay Yasuu'a diyaab iiktiyeet tuuna sidik tiiktiyi jillaay,
baruuh een idi.
Baruuh <<Baaba!
Een baruuk aneeb tehiiyyeeb gaal han hooy kwidhsaab kaaki.>>
diyaabu.
10 Siimoon Bitrus b'adhadh iibri aree barooh il'ibaayt Ifagiiriyaayi oowinnaay kishiyaay w'angwiil umaygwadiib hooy ikit'a.
Been ukishiya Maalkoos iidna.
11 Yasuu'a Bitrusii dehaay,
<<B'adhdhook umhiinooh shuumsa!
Baabu hiiyyaayu ikatiyeeb tilhanayti kaas gw'i baadiyeeb hiistiniya han?>>
idi.
Yasuu'a Hannaasi Suurii
12 Malya Iroomaani kajar daabtiisoohnaawwa,
Yahuudi gw'aadiigaawwa Yasuu'aab y'abikna,
aree barooh yhaakwirna.
13 Barooh hankaab Hannaas haay ibeen.
Hannaas Kayaafaasi ham iikti,
been whawil aree Ifagiiriyaayi suurkina akay iifi.
14 Kayaafaas Iyahuudi suurkina waseeyaab been barooh ikati,
baruuh <<Uun uutak uungaal kassooh oodehayi jillaay iyaayyeet tuuna hanyiis.>>
diyaabu.
Bitrus Yasuu'aab Itwi
15 Siimoon Bitruswa weer kwiriyaataayiiwwa Yasuu'aab iramna.
Been ukwiriyaataayi uuraaw Ifagiiriyaayi suurkina barooh daayiib iktiin.
Aflaay baruuh Yasuu'i geeb Ifagiiriyaayi suurkinaay gawi hoosh shuumiya.
16 Laakiin Bitrus udheefaayt mifr'atiib ingad.
Malya ukwiriyaataayi uuraaw Ifagiiriyaayi suurkina iktiinneeb har'a ifir'aayt,
udheefaay tiifiit oot bhaliisamiya.
Malya Bitrus shuumisiya.
17 T'oor udheefaay tiifiit Bitrusii dehaay,
<<Baruuk been ootaki kwiriyaatayeeb gaalwa han?>>
tidi.
Bitrus <<Abadan,
ani kaaki.>>
idi.
18 Uudoor mikw'araabuuyt ikishiyaawwa ikajarwa n'eet talawsaa kwilalti gadaaba,
aree toon'i iifishna.
Bitrus han bareeh ibaayt geeb ingadaayt toon'i ifish.
Ifagiiriyaayi Suurkina Yasuu'aab Sakanaayiini
19 Ifagiiriyaayi suurkina ikwiriyaataywa ut'aliimiisoohwa Yasuu'aab sakanaaya.
20 Yasuu'a <<Ani diimaab oodehayi suurii hadiidan,
aniib ut'aliim kassuuh Iyahuudi diini gawiib iikti,
tari Ukwaasanaay gawiib iikti.
Aree uudehay kassaah beentooy itdibilna.
Ani naat han kwibsaab kaaki.
21 Aflaay naanhooy raattiniyaheeb?
Oodehay aneeb imaasiw raata.
Ani sooyaneet toona bareeh raata,
ani adiyeet toona baraah ikteenna.>>
idi.
22 Yasuu'a een ibhali idiyihoob,
ikajaree gaal bariiyeeh eefiir iith'aayt,
<<Ifagiiriyaayi suurkina kak bak tinfariida?>>
idi.
23 Yasuu'a bariiyooh dehaay,
<<Ani naat han maagnaayt diyaab akatiyeek,
batuuh naan tikatiyeeb oodehay kassooh tooy eefeeb sooya.
Laakiin ani adiyeet tuuna sidik tikatiyeek,
naanhooy tith'aheeb?>>
idi.
24 Hannaas masi barooh amhakwira Kayaafaas Ifagiiriyaayi suurkina istoob.
Bitrus Masi Yasuu'aab Itwi
25 Siimoon Bitrus masi beentooy ingid n'eet iifish.
Aflaay dehay weer bariiyooh dehaay,
<<Baruuk been ootaki kwiriyaatayee gaal kittaa han?>>
idiin.
Laakiin Bitrus itwi,
<<Abadan,
ani kaaki.>>
idi.
26 Ifagiiriyaayi suurkinaayi kishiyaayee gaal,
Bitrus w'angwiil ikit'eeb ootaki ayaay tak iikti hadiidiya,
<<Tudir'aatiib bariiyooh geeb rhaayook kaaki han?>>
idi.
27 Bitrus masi itwi,
<<Abadan>> idi.
Gaal door uujiik kuukillaaya.
Yasuu'a Biilaatoos Istoobna
28 Fajir kiruumaab Yasuu'aab Kayaafaasiib ugawii haay giigiyaaniit whaakimi gaw istoobna.
Iyahuudi suurkina oogaw tehooy shuumaab kiikeen.
Ubaaskaay Iidiib m'ariit tamiini jillaay,
igarooyeehna sinhasooyt yhiriwna.
29 Aflaay Biilaatoos ifir'aayt bareeh raatiya,
<<Oon ootak naan atehimaabaana?>>
idi.
30 Baraah <<Maagt gwibbaab biikaayeek tooy haay ka'eena hook.>>
idiin.
31 Biilaatoos <<Aflaay baraak abiiyaakna haay difnaat whaggiisookna haakamaana.>>
idi.
Baraah igwibiina,
<<Hinin gaal han nideereet toona hag kinbari.>>
idiin.
32 Tuun haay tiiktiyeeb usabab,
Yasuu'iib ibhali sidik iiktiineet toonaatu,
ibhali baruuh tuyattooh tuyaayi iideet mitiyaayihoob diyaab iiktiyeeba.
33 Biilaatoos oogaw y'agaraayt shuumiya,
aree Yasuu'aab waliikiya.
Malya <<Baruuk Iyahuudi had'aabwa han?>>
idi.
34 Yasuu'a <<Tuun tuuraat bariisook tikati han tari wari anii naat sooyaan hook?>>
idi.
35 Biilaatoos bariiyooh dehaay,
<<Aneeb Yahuudiib hiistiniyaheeb han?
Aan barook aneeb nuuneen uudehaywa Ifagiiriyaayi suurkinaawwa bariiyeek dehaya.
Naan gwibbaabwa?>>
idi.
36 Yasuu'a <<Aniit tehad'aayi toon tuduniyaatiit kitti.
Aniit tehad'aayi toon tuduniyaatiit tiiktiyeek,
aniib y'aamanana Iyahuudi suurkina finaayiinka kiis'abiknaheeb.
Abadan,
aniit tehad'aayi tooyeet kitti.>>
idi.
37 Biilaatoos barooh raatiya,
<<Aflaay baruuk had'aabwa han?>>
idi.
Yasuu'a <<Baruuk ani had'aabu tindiya.
Toon toonaati jillaay ani tuduniyaatiib faraayu,
tuduniyaatiib y'aabu,
oosdik whadiidti jillaay y'aabu.
Sidkiib ikatiibka,
aneeb isnaakiir.>>
idi.
38 Biilaatoos <<Uusdik aree naanaatu?>>
idi.
Malya Biilaatoos oodehay beeti barraab ifir'aayt malya,
<<Oon ootak haay atehimaniyi sabab hooy karhan.
39 Laakiin t'aada baraak tibariineet,
Ubaaskaay W'iidiibka diimaab abuukiib gaal dehookna afandiig.
Iyahuudi had'aay fiduug hoosu tehariwna?>>
idi.
40 Baraah tageega hissii waliikiyaana,
<<Abadan,
oon kiiki!
Baarabaas fidiga!>>
idiin.
Baarabaas gwiharanaabu.