19
Malya Biilaatoos Yasuu'aab iyhaayt kwirbaajii ithab'a.
2 Ikajar dantamaat naweetee taaj id'iiniit ugirmaay kehiika daasiyaan.
Malya adaarhamaash halak barooh istookwna.
3 Malya bariiyooh dehaay eeyaaniit,
<<Gwimad shuuk miriya Iyahuudi had'a!>>
idiin.
Masi barooh idwilniit eefiir ith'ana.
4 Biilaatoos oodehay masi ibaayt,
<<Shibibna,
oon ootak haay atehimaniyi gwabab hooy miraab baakaayeet toona tikteenni jillaay,
barooh tooy marookna haay y'i andi.>>
idi.
5 Aflaay Yasuu'a tinaweeti taajwa adaarhamaash halakwa kehii haayee eeya.
Biilaatoos oodehayii dehaay,
<<Shibibna!
Uutak uun ikati.>>
idi.
6 Ifagiiriyaayi suurkinaawwa oodiini gawi gw'aadiigaawwa Yasuu'aab rhiyaanihoob,
tageegi hissii waliikiyaaniit,
<<Sallabaa!
Sallabaa!>>
idiin.
Biilaatoos bareeyooh dehaay,
<<Baraak ahaanaat malya sallabaana.
Ani barooh gwabab hooy karhan.>>
idi.
7 Uudehay masi bhaliiyaana,
<<Baruuh Ukwaasanaay Oor massalamaabuuyt,
hineeb whaggiib baruuh ibakii itoodiir.>>
idiin.
8 Biilaatoos een ibhali imaasiwihoob,
masi winneet mirkwaay hooy daaya.
9 Baruuh oogaw y'agaraayt Yasuu'aab raatiya,
<<Naa mhiinii y'aabwa?>>
idi.
Yasuu'a laakiin naat diyaab kiiki.
10 Biilaatoos bariiyooh dehaay,
<<Bhaliisamiheeb kitdiya han?
Ani fiduugiitook had'aayi abari,
masi sallabtiyook han tehad'aayi abariyeet toona kana.>>
idi.
11 Yasuu'a bariiyooh dehaay,
<<Ukwaasana hiiyyaayookuuyt,
baruuk anii kehii oobhaat had'aayeet tibariya.
Aflaay uutak aneeb barook nuuniyaab akrakaat maagnaayt ibari.>>
idi.
12 Biilaatoos een imaasiwihoob,
Yasuu'i fiduug ibsir.
Laakiin uudehay masi waliikiyaana,
<<Oon barooh fandiigeek,
shaawti Ugaysari araaw iikti kitdiya!
Had'aab massalamiiniibka,
Ugaysar ashoosamaabu!>>
idiin.
13 Biilaatoos een ibhali imaasiwihoob,
Yasuu'aab haay ifir'aayt ugaadi kwirsiib n'ati is'a.
Been oomhiin aree,
<<Y'aweeyi kirra>> iidna,
Y'araami bhaliiyee aree <<Gabbaata>> iidna.
14 Beenhoob uudehir dawil iikti,
ubaaskaay w'iidi hasamti hankaay iikti.
Biilaatoos oodehayii dehaay,
<<Whad'aayuukna uun ikati!>>
idi.
15 Baraah waliikiyaana,
<<Barooh diraa!
Barooh diraa!
Barooh sallabaa!>>
idiin.
Biilaatoos <<Whad'aayookna sallabtiib hoosu tehariwna han?>>
idi.
Ifagiiriyaayi suurkina,
<<Whad'a oongaal hinin nibariyeeb Ugaysaru.>>
idiin.
16 Malya Biilaatoos Yasuu'aab sallabiini jillaay bareeh nuuniya.
Aflaay Yasuu'aab baraah kinaamiyaan.
17 Baruuh saliibooh yaksaa ifr'a,
<<Kalhoob>> iidni mhiin iktim.
Iyahuudi bhaliiyee <<Goolgoota>> iidna.
18 Barooh beentooy sallabiyaan.
Masi malu da dariibka aree tak gaal sallabiyaan,
Yasuu'a aree eebtik iifi.
19 Biilaatoos bhaliib usaliibi kehii iktib,
<<Yasuu'a W'annaasiraay Iyahuudi had'a>> iid bhali kehii iktib.
20 Yasuu'a hooy sallabamiyaneeb uumhiin tumadiinaatii sagiib kiikuuyt,
gwida dehay een ibhali agriiyaan.
Baliin ikatab Y'araami bhaliyeewwa,
Laatiini bhaliyeewwa,
Yoonaani bhaliyeewwa kataba.
21 Ifagiiriyaayi suurkina Biilaatoosii dehaay,
<<Iyahuudi had'a miyaad baakatiiba,
laakiin <Uun uutak ani Iyahuudi had'aabu idi> miyaad kitiba!>>
idiin.
22 Biilaatoos igwibi,
<<Ani aktibeet toona,
ani kitbaabu.>>
idi.
23 Ikajar Yasuu'aab sallabiyaanihoob,
yhalakaayeeh iyheeniit fadhig mhiin y'adhidhna.
Gaalka whalakii fardaat iyheen.
Uun whalak mhakwaliisii eedhoom ookiik gaal hayuud hayaadu.
24 Baraah taktakee dehaay,
<<Whalak binshatiit,
shirfiit th'iit gaalnaay dehaay dhibiiniib ba'iikti.>>
idiin.
Tuun tuuna aree uuktaab diyaab iiktiyeet toona sidik tiikwsi.
Uuktaab <<Baraah yhalakaayi ibtikeehna y'adhidhna,
aree kinaameeni jillaay aree shirfiit eegidna.>>
diyaabu.
Aflaay ikajar beet toona id'iin.
25 Yasuu'iib usaliibi dar tuundeewwa,
tuduuraawwa,
Maryam Kiloobaabiit takatwa,
Maryam Majdaleenaabwa ingidna.
26 Yasuu'a toondeewwa ukwiriyaataayi w'areeyaab iiktiyeebwa beentooy gadee rhiya.
Aflaay toondeetii dehaay,
<<Yaa takatay,
w'ooruuk uun ikati.>>
idi.
27 Malya ukwiriyaataayii dehaay,
<<Batuuh deetooktu.>>
idi.
Been udoorii fidnaab,
uun ukwiriyaataayi batooh haay giigiyaayt ugawooh haay ibi.
Yasuu'iit Tooyat
28 Yasuu'a oont'a naatka timmiimtaneet toona ikan.
Aflaay uktaabi bhali sidik iiktiina,
baruuh <<Ani yaweebu.>>
idi.
29 Beentooy rhasa ha ataab diwaan iifi.
Aflaay asfoonjiib whaay tehooyteeb ishiyadh'aniit,
been w'asfoonji hindiib yhakwirniit Yasuu'iib uyafiib y'abikna.
30 Yasuu'a wha gw'iyaayt,
<<Faayamaabu!>>
idi.
Malya ugirmaayooh kuurisiyaayt eeshuuk sallamiya.
31 Malya Iyahuudi suurkina eenda isallabamiyaani ragadaayi kat'iti Biilaatoos raatiyaan.
Masi tikinaaja usaliibii tikwisitiib hooy yhariwna.
Baraah beet toona haay yhiriwneeb usabab,
uumb'i jim'aatu tulhaytooh aree tageegaat sabtuuyt,
tikinaaja tusabtiit yint usaliibi kehii yhigitneet toona harwaab kiikeen.
32 Aflaay ikajar giigiyaaniit ootak whankaaneeb iragada kat'iyaan.
Malya ootak ooraaw Yasuu'i geeb sallabamiyaab iragada kat'iyaan.
33 Laakiin baraah Yasuu'ii dehaay eeyaanihoob,
baruuh suur akay ayaa rhiyaan.
Aflaay bariiyeeh iragada kat'aab kiikeen.
34 Ikajareeb gaal Yasuu'iib itarab finaatii ikwit,
gaal door aree booywa yamwa hooy ifaf.
35 Uutak toon toona rhiyaab badehaateeh iyiw,
taan tibadeha aree sidik iiktiin.
Baruuh sidik hadiidiiniyeet toona ikteen.
Aree baruuh tibadehaateeh iniiw shaawti baraak han aamaneen tikatiina.
36 Tuun tuuna aree ooktaabi bhali sidik tiikwsi.
Uuktaab <<Miitaattuuh gaat han itkit'a kitdi.>>
diyaabu.
37 Weer kitaab aree,
<<Baraah itil'aneeb beeb iishbib iyadna.>>
diyaabu.
Yasuu'iit T'atoobsooy
38 Toon toonaati har'ii,
Yuusif tumadiina Ariimaataay iiktiib,
Yasuu'iit tukinaaja Biilaatoos raatiya.
Oont'a Yuusif Yasuu'i kwiriyaataayiibu,
laakiin Iyahuudi iriikwuuyt w'iimaanooh iikwibis.
Biilaatoos baruuh tukinaaja iniineet toona sooya.
Aflaay Yuusif han idifaayt tukinaaja yakisiya.
39 Niigoodiimoos suur Yasuu'aab hawaad rheesamaab iiktiib,
Yuusif iramaayt mhay tamuun kiiloot shakwiintiit haay eeya.
Tishakwiintiib mirwa misikwtwa hooy amshawawiyaatu.
40 Aanda mhallaah Yasuu'iit tukinaaja yakisiyaaniit naaylooniib iksisna,
aree shakwiint kehii ififna.
Iyahuudiit aadaateeb tukinaajaati baas iitmarnihoob shakwiint kehii iififna,
naaylooniib iiksisna.
41 Been oomhiin Yasuu'a hooy itoodaareeb dir'aat tiifi.
Beentooy aree gayi miimash gaal han hooy atoobsaab biikaayeeb iifi.
42 Beet tuuyin tusabti hankaay tiikti,
been umiimash aree dawiluuyt,
baraah Yasuu'aab beentooy daasiyaan.