Umiimash Wharar
20
Tehadti b'i kiruumaab,
masi thibnama door,
Maryam Majdaleena umiimash tibi.
W'awi umiimashi kehii daasamaab aree yakamaa rhita.
2 Batuuh dhaabee Siimoon Bitruswa weer kwiriyaataayi Yasuu'a areeyaab iiktiyeebwa tibaayt soota.
Batuuh <<W'ankwana umiimashii yakisiyaana,
aree naad daasiyaaneeb kinkan!>>
tidi.
3 Malya Bitruswa ukwiriyaataayi uuraawwa umiimash ibeen.
4 Baraah mhallaah dhaabiina,
laakiin ukwiriyaataayi uuraaw Bitrusiika dhaabanakaab iikti aree bariiyooh dabaay umiimash iiktim.
5 Baruuh n'ati hooy kuuramiyaayt ishbibihoob,
unaaylooni halak beentooy rhiya.
Laakiin umiimash tehooy shuumaab kiiki.
6 Bariiyooh har'ii Siimoon Bitrus eeyaayt,
umiimash shuumiya.
Unaaylooni halak beentooy dhibaa rhiya.
7 Umandiil Yasuu'iib ugirmaay kehii iifiib han dhibaa rhiya.
Laakiin unaaylooni halakii ood'ooh tafaal akay rhiya.
8 Malya ukwiriyaataayi uuraaw umiimash hankaab iktim masi umiimash tehooy shuumiya.
Baruuh rhiyaayt aamaniya.
9 Baraah Yasuu'a ibakii tooyat hooy yakiiniyeet toona uktaabii masi afhamaab kiikeen.
10 Malya ikwiriyaatay igawaayeehna y'agarna.
Yasuu'a Maryam Majdaleenaay Dehaay Lawiya
11 Maryam waawee umiimashii barraab tingad.
Batuuh masi waawee,
kuuramtaayt umiimash tishbib.
12 Batuuh beentooy malu malak eera halaka akway rhita.
Imalak Yasuu'a hooy iifiyeeb oomhiin gaal ugirmaay geeb,
uuraaw aree iragadaayi geeb s'ee rhita.
13 Imalak batooh raatiyaana,
<<Yaa takatay,
naanhooy waawtinii?>>
idiin.
Batuuh <<Baraah W'ankwanaayu yakisiyaana,
aree naad daasiyaaneeb kanaat kaaki.>>
tidi.
14 Malya batuuh nakamtanihoob,
Yasuu'aab beentooy gadee rhita.
Laakiin baruuh Yasuu'aab iiktiyeet toona kanaat kitti.
15 Yasuu'a batooh raatiya,
<<Yaa takatay,
naanhooy waawtinii?
Aab harriiwii?>>
idi.
Batuuh barooh dir'aat gw'aadiigaab hiistaayt,
<<Duuruun,
barooh baruuk yakisaab tikatiyeek,
naad daastaneeb sooyaheeb,
aree ani diftiit barooh imaar andi.>>
tidi.
16 Yasuu'a batiiyooh dehaay,
<<Maryam!>>
idi.
Batuuh barooh beeti nakamtaayt Y'araami bhaliiyee,
<<Rabbooni!>>
tidi.
Y'araami bhaliyeeb <<Rabbooni!>>,
seedna miyaadu.
17 Yasuu'a batiiyooh dehaay,
<<Hoosu bii'am'abaakii!
Ani masi Ubaaba beeti agaar kaaki.
Laakiin batuuk aniib isana bayiit ani Baaboowa bareeyooh Ubaabaawwa,
Ukwaasanaayoowwa Ukwaasanaayoohnaawwa ikatiib beeti at'agiir.>>
idi.
18 Aflaay Maryam Majdaleena giigtaayt ikwiriyaatay usakana soota:
<<Ani W'ankwana rhan!>>
tidi.
Teen teena batooh sooyaneet aree bareeh soota.
Yasuu'a Ikwiriyaatayeeh Dehaay Lawiya
19 Beet tehadtiit himni,
ikwiriyaatay assama gawaayeeb hiddaab idbalna.
Baraah Iyahuudi iriikwna.
Malya Yasuu'a eeyaayt bareeyooh bitik ingadaayt,
<<M'asig geebookna badaayi!>>
idi.
20 Yasuu'a een ibhali idiit har'ii,
y'ayeehwa itarabeehwa bareeh rhisiya.
Ikwiriyaatay W'ankwanaay irhitiib winneet afirhiyaan.
21 Yasuu'a masi bareeyooh dehaay,
<<M'asig geebookna badaayi.
Ubaaba aneeb diigwatiyaneet toonaatiit,
ani han bareekna diigwatani.>>
idi.
22 Malya baruuh bareeyooh kehii hamshuukiyaayt,
<<Eeshuuk Imugaddasa ahaana!
23 Baraak udehayiit maagnaay afooteeneek,
afoomeen.
Baraak bit'afooyayneek,
ka'afoomiyaan.>>
idi.
Yasuu'aawwa Toomaaswa
24 Ikwiriyaatay itamna malooyeeb gaal Toomaas,
<<Utiita>> iidna.
Baruuh Yasuu'a eeyanihoob ikwiriyaatayi geeb kiihaay.
25 Aflaay ikwiriyaatay aaraw barooh sooyaana,
<<W'ankwana rhina!>>
idiin.
Laakiin baruuh bareeyooh dehaay,
<<Ani imismaraayi m'at rhi baadiyeek,
baliin imismaraayi m'ati kehii giibalaaytu baadaasayeek,
w'ayu bariiyooh w'ayi kehii baadaasayeek,
aamani kaadi.>>
idi.
26 Asaramaati har'ii masi ikwiriyaatay igawaayi tehooyteeb immarraayna,
Toomaas han bareeyooh geeb iifi.
Idheefa hakwar iiktiineek han,
Yasuu'a eeyaayt bareeyooh bitik ingadaayt,
<<M'asig geebookna badaayi.>>
idi.
27 Malya baruuh Toomaasii dehaay,
<<Giibalaaytook tooy daasa,
aniib y'ayi aree shibiba,
malya w'ayook fidhidha aree aniib itarabi kehii daasa.
Shaawti baa'eetehaka,
aamana!>>
idi.
28 Toomaas bariiyooh dehaay,
<<W'ankwanaayuuwwa,
Ukwaasanaayuuwwa!>>
idi.
29 Yasuu'a barooh sooya,
<<Aneeb rhitani jillaay aamanta han?
Baliin aneeb rhaab baakaay aamaniyaan kak afirhaaba!>>
idi.
Oon Ooktaabi Hadaf