Yasuu'a Asarama Kwiriyaatayee Dehaay Lawiya
21
Oonaay har'ii,
Yasuu'a ikwiriyaatayeeh Tiibaaryaasi bhariib masi weer door dehaay lawiya.
Tuun bak tiikti.
2 Siimoon Bitruswa,
Toomaas utiita atoosmaabwa,
Naatnaa'eel Jaliileeb teefeet Gaanaay iiktiibwa,
Sabadi arwa,
wari Yasuu'i kwiriyaatay maloobwa kassaah hiddaab iifiin.
3 Siimoon Bitrus irawee dehaay,
<<Ani diftiit aashoob iishik andi.>>
idi.
Baraah <<Geebook niibi niyad.>>
idiin.
Aflaay baraah bariiyooh geeb tufalluuka y'amniit giigiyaan.
Laakiin been whawaad kassooh aashoob naat han aabkaab kiikeen.
4 Fajir tuuyin talawtiyihoob,
Yasuu'a iyami dariib ingad.
Laakiin ikwiriyaatay baruuh Yasuu'aab iiktiyeet toona kanaab kiikeen.
5 Malya Yasuu'a bareeh raatiya,
<<Yaa yhankwila,
naat aabkaab kitteena han?>>
idi.
Baraah <<Naat han aabkaab kinki.>>
idiin.
6 Baruuh bareeyooh dehaay,
<<Tushabakaatookna tufalluukaati maygwadii dehaay gidna,
naat ibik tiyadna.>>
idi.
Aflaay baraah tushabaka igidnihoob,
gwida aashoob titabayt oosaakw adgiraab kiikeen.
7 Ukwiriyaataayi Yasuu'a areeyaab iiktiyeeb Bitrusii dehaay,
<<Uun baruuh W'ankwana ikati!>>
idi.
Siimoon Bitrus W'ankwana oomiyaad imaasiwihoob,
whalak hoosooh fir'aab iiktiyeeb ikwaayt iyameeb dhibiya.
8 Ikwiriyaatay aaraw tufalluukaatiib iyami ginnaal eeyaan,
tushabaka aashoob tabaa sookwiin.
Baraah uginnaalii sagiib kiikeenayt,
sheeb mitraab eetiit masaafa whaashii iifiin.
9 Baraah ubhari ginnaal tikwiyaanihoob,
dhhaniit dhhaliiti kehii aashoobwa hadhiibwa daasama rhiyaan.
10 Malya Yasuu'a bareeyooh dehaay,
<<Oont'a aabkaab tikatiineeb aashoob galib haay m'aana.>>
idi.
11 Siimoon Bitrus tufalluuka reewiyaayt,
tushabaka barraab irhif.
Batuuh wawin aashu ataabtu,
sheebwa ay tamuunwa mhay aashoob iiktiin.
Laakiin y'aashu gwidaab iiktiineek han tushabaka masi shatatamaat kitti.
12 Yasuu'a bareeyooh dehaay,
<<M'aanaat tamaana!>>
idi.
Laakiin baruuh W'ankwana iiktiyeet toona ikannayt,
baruuh aab iiktiyeeb bareesooh gaal han barooh raataab kiiki.
13 Yasuu'a eeyaayt yhadhi yakisiyaayt bareeh yhii.
Y'aashu han bak iweer.
14 Yasuu'a tooyat hooy yakiyaneekka,
oont'a mhaya door ikwiriyaatayeeh dehaay lawiya.
Yasuu'aawwa Bitruswa
15 Baraah tamiyaani har'ii,
Yasuu'a Siimoon Bitrusii dehaay,
<<Siimoon Yuuhannaayi oor,
een bareeh iraweeka aneeb daayiib areetniyaheeba?>>
idi.
Baruuh <<Awooh han W'ankwanaayu,
ani areeyaniyeetook toona baruuk tikteena.>>
idi.
Yasuu'a <<Aniib yhu daayiib tamsaa.>>
idi.
16 Yasuu'a malya door bariiyooh dehaay,
<<Siimoon Yuuhannaayi oor,
sidik aneeb areetniyaheeba?>>
idi.
Baruuh <<Awooh han W'ankwanaayu,
ani areeyaniyeetook toona baruuk tikteena.>>
idi.
Yasuu'a <<Aniib y'argina daayiib shaakwa.>>
idi.
17 Yasuu'a mhaya door bariiyooh dehaay,
<<Siimoon Yuuhannaayi oor,
aneeb areetniyaheeba?>>
idi.
Yasuu'a mhaya door bariiyooh dehaay,
<<Areetniyaheeba?>>
idiit raatiyani sabbii,
Bitrus yhasi.
Baruuh <<W'ankwanaay,
baruuk naatka tikteena,
ani areeyaniyeetook toona tikteena!>>
idi.
Yasuu'a bariiyooh dehaay,
<<Aniib y'argina tamsaa.>>
idi.
18 Yasuu'a <<Oosdik andi hook:
Adhamiib tiiktiyihoob,
martiit tehiriwi mhiinka tiibiya.
Laakiin eegrimamtiniyihoob,
y'ayeek iibrir tindiya,
aree weer gaal laabibtiit hook bitehariiwi mhiin istuub hook indi.>>
idi.
19 Yasuu'a een ibhali haay iideet tuuna:
Bitrus haay yaayi iideet tehay'aawwa,
Ukwaasana matuun iniiweet toonaawwa tuuliya.
Malya Yasuu'a bariiyooh dehaay,
<<Ramaheeb!>>
idi.
20 Bitrus nakamiyanihoob,
ukwiriyaataayi Yasuu'a areeyaab iiktiyeeb bareeyooh har'ii sakee rhiya.
Ukwiriyaataayi oodraari door Yasuu'aab beeti ikilasaayt,
<<W'ankwanaay aaw iitil hook indi?>>
idiibu.
21 Bitrus barooh rhiyanihoob,
Yasuu'aab raatiya,
<<W'ankwanaay,
uun uutak aree kaku?>>
idi.
22 Yasuu'a igwibi,
<<Ani at'agiireeb ookiik barooh ishidhhin andiyeek,
naan dehook iikti indi?
Baruuk ibakii ramaheeb!>>
idi.
23 Tuun tuuna Yasuu'iib ikwiriyaatayi bitik hadiidamta.
Uun ukwiriyaataayi iiyyi kiidi ittiyoodaay.
Laakiin Yasuu'a baruuh iiyyi kiidi diyaab kiiki.
Yasuu'a <<Ani at'agiireeb ookiik barooh ishidhhin andiyeek,
naan dehook iikti indi?>>
idi.
24 Uun ukwiriyaataayi teen teena hadiidiyaabu.
Baruuh teen bateeh han iktib.
Baruuh diyaab ikatiyeet taana sidik ikatiineet toona nikteen.
25 Yasuu'a gwidaat m'uujisa warit han ikwaas.
Kastaah tim'uujisa gaat gaanaatii itkatiibneek,
kastuuh tuduniya kitab hooy ikatibneeb dehaay kiimriin.