Buulus Roomaab istoobna
27
01 Oohbarii Itaalyaay mabay niyaamamiyanihoob,
Agustusiib udheeshiit tukatiibeeti daabit Yuuliyoos iidneeb,
Buuluswa y'abuukiya eerawwa isigw'adna.
02 Adraamiitiyuumee markabt n'am,
Aasyaay ubhari dar iifiint timiinaati mabayee dehaay nimar.
Ariistaarkoos,
tumadiina Tasaaluuniikaab Magadoonyaay teefeenaati tak han geeboon tumarkabtiib iifi.
03 Tooyin tooraaw Siidoon niktim.
Udaabit Yuuliyoos aree Buulus winneet daayiib imshabaab.
Baruuh masi Buulus y'araweeh han rhisiya.
Aflaay y'arawaah baruuh shanha iiktiyeena iyiwni jillaay rhisiya.
04 Siidoonii giignanihoob,
ubaraam har'a imuutir hoon.
Ubaraamii niidhhini jillaay aree Tugadiiri Kubiroosi har'iisii iibaabna.
05 Malya Kiiliikiyaay whaashii Baamfiiliyaay oos'iid beeti iibaabna,
tumadiina Miiraab Liisiyaay whaashiib teefeet niktimeeb ookiik iibaabna.
06 Beentooy udheeshi daabit markabt Iskandariyaay Itaalyaab tiibiit imri.
Shaawti baruuh tumarkab is'am hoon.
07 Gwidaat yina diiseet ubharii sakna.
Malya t'akraati gidehii Kiniidoos niktim.
Ubaraam beet toojha sikatiymaayoon kiiki.
Aflaay tugadiiri Kireeti s'iidii giigna,
tumadiina Raas Salmoonee hasamna.
08 Oobhari daraagii diiseet iibaabna.
Malya tumadiina Lasaa'iyaab dawil mhiin iifi haash Timiina Tidaayiit iidneeb niktim.
09 Oont'a gwidaat midda hassina,
t'iibaab han shaawti asgaat kitti.
Tubaaski han hasamaa tiifi.
Malya Buulus bareeh bhaliisamiya,
10 tumarkabti shagaamanaayee dehaay,
<<Aandaay,
sinaakirnaheeb!
Hallaay giignayeek,
tumarkabwa igadh'aahwa kat'ami iyadna.
Gwida shuuk han day'ameen.>>
idi.
11 Laakiin udaabit Yuuliyoos Buulusiib ibhaliiyeeka,
tumarkabti hiireersanaawwa w'ankwanaayoohwa isnaakir.
12 Beet tumiina oowiyaay door daayiit kitti.
Oon usabbii aree,
kassuuh uudehay tumiina Fiiniikis iiktimneet toona minniimiyaan.
Beentooy oowiya hassiineet yhariwna.
Beet tumiina Kireeteeb tiifi,
oowiyaay door oos'iidi yindhibwa,
tugiblaati yindhibwa beeti titnigil.
Ubaraam
13 Oos'iidiit jhaatii ubaraam diiseet iniifihoob,
aanda shaawti baraah niyaamaab iiktiineet Fiiniikis beeti iigwshisheeb hiisiyaan.
Aflaay baraah umarsa yakisiyaaniit,
Kireeti daraagii iibaabiyaan.
14 Laakiin shalik doori har'ii akra baraam,
<<Tugiblaati Yintalawiyaay>> iidneeb,
tugadiireetii im'akaari infi hoon.
15 Ubaraam tumarkab ith'a,
hinin shaawti ubaraamiit t'am'akrooy adgiraab kinki.
Aflaay hinin nigwooy,
ubaraam ifiyak hoon.
16 Dist gadiiri,
Kuuda iidneet dawil mhiin beeti hasamna.
Ubaraamii niidhhini jillaay tugadiireeti s'iidii hasamna.
T'akraati har'ii aree midhhaniit markab adhamiit yakisna.
17 Aflaay aanda batooh tumarkabti kehii daasiyaan.
Malya teeng'atee teeyay taktakee deha isikwniit iwdidna.
Tumarkab Siirtiit t'issi amooth'at eetni miyaadiib mirkwaay iibriinayt,
shaawti teeyaywa umarsaawwa dhoomisiyaan.
Ubaraam aree tumarkab igwishish.
18 Ubaraam winneet akraab iikti,
tooyin tumalya shalik rabi hooy igidna.
19 Malya tooyin tumhaya,
tumarkabti gadh'i y'ayeesoohna igidna.
20 Ubaraam gwida imb'i akrakaab iki,
tooyin tari yhayikw rhat nirib.
Akra baraam iniifayt,
hinin shaawti midhhan s'aayaamaab kinki.
21 Gwida dooreeka aree gaal han m'ariit hoon tamaab kiiki akay,
Buulus ingadaayt eenda sooya,
<<Aneeb tisniikarneet toonaatu!
Kireeteeb hayaayaab tiiktiineek,
aan igwirhaawwa tehasarwa dehookna akaa kiidiin.
22 Laakiin ani oont'a fagaramtiib asehariiw hookna.
Baraak iidhhan tiyadna,
tumarkab laakiin kat'ami tindi.
23 Afa Ukwaasana ani bariiyooh akatiyeeb,
ushagaamaniyeeb,
umalakuuh anii deha lawiya.
24 Uun umalak <Buulus,
baarikwiiya!
Gaysari suurii ibakii haakamami tindiya.
Bariiyook sabbii aree,
Ukwaasana tumarkabtiib geebook iibaabeen oodehay kassooh ishidhhiin.>
idiheeb.
25 Aflaay yaa aanda,
fagaramaana!
Ani Ukwaasana aamanani.
Baruuh sooyaab ikatiyeet tuuna iikti tindi.
26 Laakiin tumarkab gadiireet gaanaati haashi kehii ibakii kat'ami tindi.>>
idi.
Tumarkabti kat'amti
27 Tamna fadhig imb'eebwa hawadwa Oobhar W'adriyaayia kehii ubaraam ifiyak hoon.
Laakiin whawaadi tarabeeb tumarkabti shagaamana haash dawil niiktiyeet toona ikanna.
28 Iyami dhoom igilnihoob,
aayam fadhig tamuun mitra eetiit masaafa hoogaab iiktiineet toona rhiyaan.
Shalikt middaati har'ii masi igilnihoob,
mhay tamuun mitra eebhat akay imriin.
29 Ishagaamana tumarkab liilaaw amooth'at eetni miyaadiib irkwiin,
uniiwaay fadhig marsa iyameeb igidniit,
uumha mhiyeet toona minniimiyaan.
30 Ishagaamana tumarkabtii faraat jarrabiyaan.
Umidhhaniit markab tikwisiyaan,
tumarkabti daba iifiin imarsa whiisii tikwistiina massalamiyaan.
31 Laakiin Buulus,
Yuuliyuus udheeshi daabitwa,
ikajaree dehaaywa <<Tumarkabti shagaamana tumarkabtiib biihagiitneek,
ishuukeekna ishidhhin kitdiina.>>
idi.
32 Aflaay ikajar oomidhhaniit tumarkabtiib iifiint teeyay kat'iyaaniit oobhariib dhibisiyaan.
33 Uumha mhaab baakaay,
Buulus oodehay naat tameeneet toona sooya.
Baruuh <<Tamna fadhigt yina winneet haskaa tiifiina,
naat han tamaab kitteen.
34 Oont'a naat tamteeneet toona hookna aharriiw.
Umidhhanuukna tim'ariitiib eefi.
Beet toona sakaana,
gaal han hookna lhami kiidi.>>
idi.
35 Buulus een ibhali idiit har'ii,
hadhiib yakisiyaayt Ukwaasana yhamid.
Malya kassooh oodehayi suurii yhadhi ikit'a,
aree naat hooy tamiya.
36 Baraah kassaah guugduuseeb id'iiniit gaalka naat tamiyaan.
37 Tumarkabtiib 276 dehay iifiin.
38 Malya gaalka tamiyaayt har'ii,
tumarkab shooft iikwsiini jillaay igamhi rabi iyameeb igidna.
39 Uumha mhiya,
tumarkabti shagaamana haash suur biikaanneeb rhiyaan.
Laakiin iyami ginnaal w'issi hooy iifiyeeb rhiyaanihoob,
adgiriineek tumarkab been w'issi beeti gwishuush niyaamiyaan.
40 Kasseeh imarsa kat'iyaaniit iyameeb y'ishna.
Malya yhindi tumarkab haay hireersiineeb ifaadigniit,
suurii iifiin ijillika tageegisiyaan.
Malya eeyami ginnaal beeti hantaayaan.
41 Laakiin tumarkab whaash tith'a t'isseeti kehii hantaayta.
Aasuur itumarkabti t'isseeteeb itbakna,
uniiwa aree iyameet mooja kat'iyaan.
42 Y'abuukiya uumiit biifoorni jillaay,
ikajar bareeyooh madar niyaamiyaan.
43 Laakiin udaabit,
Buulus ishidhhineet toona yhariw.
Ikajar niyaamiyaaneet toona aree sid'aab kiiki.
Malya kasseeh w'uumti adgiriin,
iyameeb fareetiit whaash ubalamaab ookiik hasamiineet toona sooya.
44 Eeraw hindiib tari tumarkabti shidh'a gaal abiktiit giigiineet toona sooya.
Bak aree kassaah asgaa whaash iktimna.