Buulus Agriibaay suurii ugarooyooh isham
26
01 Agriiba Buulusii dehaay,
<<Oont'a ugarooyook hanibyeet toona adgirtiniya.>>
idi.
Buulus w'ayiisooh mitiyaaya,
02 <<Whad'a Agriiba,
oon amsi bariiyook suurii angadiyeet toona hooy afirhaabu.
Iyahuudi aneeb atehimeeneet teena kasteeh dehaay igwaab andi.
03 Baruuk aree Iyahuudiit t'aadaawwa w'amgwasuuraayoohwa daayiib tikteena.
Aflaay anaahook daayiib sinaakiraheeb.
4 Iyahuudi kassaah aneeb w'adhmuumii ikteeniinheeb.
Ani whaashoon ooknaaywa Alguduseebwa w'adhimuumii akwiri.
05 Baraah sh'iika ikteeniinheeb.
Ani winneet akra madehab iitram Fariisi iiktiyeet toona baraah yhariwneek sooyeen hook.
06 Ukwaasana hoobeen waadiyaayaab ikatiyeet toona s'ayaamani akay,
amsi haakameenheeb.
07 Hineet tigabiila titamna malu whawaad oomb'i usidkii Ukwaasana shagaameen,
uwaadiyaay tikwuukw s'ayaameen.
Whad'a Agriiba,
oon is'ayaay sabbii,
Iyahuudi eegrima atehimeenheeb.
08 Ukwaasana y'ayaab ishidhhiineet toona naanhooy eetehakteena?
09 Door gaalnaay ani uknaayu han Yasuu'a W'annaasiraay oosim am'akiireet toona akraab niyaaman.
10 Beet toona aree Alguduseeb ad'i.
Ifagiiriya iwawin isid'iinheeb,
gwida dehay Ukwaasana aamaniin oosjin ad'i.
Baraah yattii dehaay haakamamiyaanihoob,
ani han ayyadan.
11 Gwida doora Yahuudi diini gawaayeeb bareeh jasaayan.
Udiinoohna ishuu'isheet toona han jarraban.
Beenhoob ani bareesooh hasi.
Bareeh jasaayi jillaay girba hasheeb iifiint timadiina abi.
12 Whad'a Agriiba,
b'eeb gaal ani ifagiiriya iwawin halaagaaytiib Dimashig istoobnaheeb.
13 Yaa Whad'aay,
usalaliib nabhoob talaw tooyintiika eerakaab rhan.
Uun utalaw aneebwa geebu iibaabiinwa tibreetee kehoon talawiya.
14 Kassaan whaashi kehii dhibna.
Malya hiss Araami bhaliiyee,
<Shaawil,
Shaawil,
naanhooy amaag tiwariyaheeb?
Aniib ifinaasamti afreeba!>
idi.
15 Ani aree raatan,
<Baruuk aabwa?>
adi.
W'ankwna igwibi,
<Ani Yasuu'aab!
Ubaruuk dehaay timageebu.
16 Oont'a yakaa!
Baruuk anii shagaamani tikatiiyi jillaay waasaayooku akaay dehook lawan.
Oont'a aniib rhitaneet toonaawwa,
amseenee fidnaab rhisi hook andiyeet toonaawwa,
baadehiib iikti tindiya.
17 Udehayook ooknaaywa,
Ijintiileewwa ishidhhin hook andi.
Ani bareeh beeti afandiig hook.
18 Baraah oobliisi salalii Ukwaasanaay deha it'agiirni jillaaywa,
toothibintii ooy'ii deha itfar'ani jillaaywa,
eegw'ad nangiileet toona hook aharriiw.
Aflaay idinuubee afoob imeerna,
aneeb aamaniit aree Ukwaasanaay oodehay imugaddasaayee gal ikatiin.>
idi.
19 Aflaay Whad'a Agriiba,
ani een tibreetee eeyaan eerhi amoorbaab kaaki.
20 Awwal Dimashgeeb oodehay sooyan,
malya Alguduswa kastooh Yahuudaabwa abi.
Baraah tuubiit Ukwaasanaay deha it'agiirneet toona sooyan,
tuubiyaaneet toona rhisiini shaga id'aneet toona sooyan.
21 Beet toonaati sabbii aree Iyahuudi oodiini gawi hooshiib y'abiknaheeb,
madari han niyaamiyaan.
22 Laakiin kassooh been oodoor Ukwaasana ishamheeb.
Ani han oodehay oodis oowin kassooh bhaliisaman.
Inabiyaawwa Muusaawwa tikati diyaab iiktiineet toona toobhaat sooyan.
23 Umasiih kak lhamiiniyeet toonaawwa,
masi baruuh tooyattii awwal yakiiniyeet toonaawwa sooyan.
Aflaay baruuh udehayoohwa Ijintiiliiwwa umidhhani nuur sooyiini.>>
idi.
24 Buulus ugarooyooh habuuyi ibhali faaysaab baakaay,
Feestoos waliikiyaayt,
<<Buulus,
Baruuk haalaywa!
Uun w'agriiti uugwida haaleesiini hook.>>
idi.
25 Laakiin Buulus <<Feestoos whamooysama,
ani haaleeb kaabari,
ani oosdik andi,
tuun aree daayiitu.
26 Teen teena tehadiidaniyeet whad'a ani anfariidi daayiib ikteen.
Barooh naat han hooy kwabaast kitti,
thibnama rikwniib akaana kitti.>>
idi.
27 Malya Buulus Whad'a Agriibaay deha,
<<Inabiya sooyaaneet toona aamantiniya?
Aamantiniyeet toona akteen.>>
idi.
28 Agriiba Buulusii deha,
<<Bak shalikt middaatiib Masiihiib akatiyeena tiseharriiwheeb han?>>
idi.
29 Buulus <<Uudoor shalliikeek guudiiniyeek,
teen tishinshila nuun,
baruukwa y'isneekiirwa kassaakna amsi oon aniit tikatiineet toona minniimani.>>
idi.
30 Malya whad'a Agriibaawwa,
whaakim Feestooswa,
Barniiswa,
kassaah geeb iifiinwa yakiyaaniit giigiyaan.
31 Laakiin baraah giigaab baakaay,
<<Uun uutak gwabab kiibari.
Yat tari sijin ka'astehaliya.>>
idiin.
32 Malya whad'a Agriiba Feestoosii dehaay,
<<Buulus,
Gaysar Iroomaani whaakamamti harwaab biikaayeek,
itfidig.>>
idi.