Buulus Feestoosi suurii haakamamiya
25
01 Mhay imb'i Fastuus haakim ikayi har'ii,
Gaysariyaay Algudus ibi.
02 Beentooy ifagiiriya iwawinwa,
Yahuudi suurkinaawwa bariiyooh suurii ingadniit Buulusi kehii iibriineet tehalaagaay hadiidiyaan.
Masi Feestoos raatamiyaan.
03 Buulus Alguduseeb haay y'iiniyeet toona barooh in'alna.
Baraah beet toona bariiyooh haay yhiriwneeb usabab,
usalaliib kamiin d'iit Buulusi madar yhiriwna.
04 Laakiin Feestoos bareeyooh dehaay,
<<Buulus Gaysariyaay daayi indi,
ani han willa beentooy iidif andi.
05 Baruuh maagt gwibbaab ikatiyeek,
isuurkinaayaakna geebu bagiigiin,
beentooy aree barooh bagaadiisamiin.>>
idi.
06 Feestoos Gaysariyaab agaar baakaay,
Algudseeb ashshadhigt tari tamint yina is'a.
Malya oomb'i ooraaw ugaadi mhiin is'a,
Buulus tumhaakamaatiib eesiisiya.
07 Buulus tumhakamaatiib eeyanihoob,
Yahuudi suurkina Algudusee y'aab bariiyooh kwayaay is'ana.
Buulus akra gwabab gwidaab gwibbaab iiktiyeet toona sooyaan.
Laakiin beet toona akkadeen baadehi kiibariin.
08 Malya Buulus ugarooyooh habuuyiib bhaliiya,
<<Ani udehayuun iirbeena d'iyaab kaaki.
Masi oodiini gawi kehii tari Gaysari kehii maagnaayt d'iyaab kaaki.>>
idi.
09 Feestoos Iyahuudi giraadtiib yhariw,
aree Buulusii dehaay,
<<Teen tehalaagayteeb ani haakamaniyook jillaay Algudusi mabay harriiwa?>>
idi.
10 Buulus <<Ani oont'a Gaysariit tumhakamaatiib haakamamani,
tooy aree ibakii hooy haakamamaniyeet toonaati.
Ani Yahuudi haashi kehii maagnaayt d'iyaab baakaayeet toona baruuk tikteena.
11 Ani tooyat astehaleen gwabab d'iyaab akatiyeek,
tooyati jasa hooy dhaabi kaadi.
Laakiin aan baraah atehimeeneeti taana sidik biikaayneek,
aneeb oon oodehay haay sallamiiniyeet had'aayi ibariib aree kiihaay.
Ani shaawti Gaysar abiiyaah haakamiiniyeeti toona hooy aharriiw.>>
idi.
12 Malya Feestoos een ibhali umajlisiyeeh da immakaar,
malya Buulusii dehaay,
<<Baruuk Gaysar uukna haakamtiyook tehariwa,
aflaay Gaysar iibi tindiya!>>
idi.
Buulus Agriibaawwa Barniikiiwwa immakaar
13 Shalikt yinaati har'ii,
whad'a Agriibaawwa Barniikiiwwa Feestoos rheesamti jillaay Gaysariyaab eeyaan.
14 Baraah beentooy gwidaat yina yhagitna.
Beenhoob Feestoos Buulusiit tehalaagaay whad'a haay infaraad.
Baruuh <<Fiiliikis tooy usijniib tak ishaabu,
15 ani Algudus beeti giiganihoob,
ifagiiriya iwawinwa Yahuudi suurkinaawwa bariisooh ashkiimiyaanheeb.
Baruuh haakamamiiniyeet toona raatiyaanheeb.
16 Ani <Tak uudehay hooy ashkiimeeneeb,
igariimiyeeh suurii s'aab baakaay,
inuunti Roomaaneet aada kiikeen.
Baruuh ibakii beet tehlaagaaytiib gwanbii ugarooyooh yhanbi.>
adi.
17 Malya baraah tooy geebu eeyaanihoob,
tugadiyaay shaawti sidleelaab kaaki.
Tooyin tooraaw ugaadiit mhiin as'a,
aree barooh waliiksan.
18 Laakiin aanda barooh atehimiin bhaliiti harawaay ingadnihoob,
ani hiisiyeet tumaagtii naat hooy miraab kiikeen.
19 Bareeh udiinoohna ooknaay amgwasuuraab eebtik daaya.
Baraah tak ayaab Yasuu'a iidneeb,
Buulus na dhhaniibu iideenaay imgwassaarna.
20 Ani een bareeh kasseeyooh oosdik kak imiireeb kanaab kaaki.
Malya Buulus Algudus beetiit beentooy haakamamiiniyeet toona raataman.
21 Laakiin Buulus Gaysar y'eetiit tugaadiyeetooh shambiibeeb ookiik oosjin isehaayis.
Aflaay barooh Gaysar astoobiyeeb ookiik tooy daayiiniyeet toona sooyan.>>
idi.
22 Malya Agriiba Feestoosii dehaay,
<<Uun uutak indiyeet toona ani han asneekiireet aharriiw.>>
idi.
Feestoos <<Lhayt iimsaw tindiya.>>
idi.
23 Tooyin tooraaw Agriibaawwa Barniiswa tusinaakrooyti gaw shuumiyaanihoob,
uudehay bareeh winneet daayiib y'ashishna.
Wawin dheeshi daabtaabwa tumadiinaati suurkinaawwa han beentooy iifiin.
Feestoos aree Buulus haay y'eeneet toona sooya.
24 Malya Feestoos <<Whad'a Agriibaawwa y'iibaabkina aarawwa,
oon ootak shibibna!
kassaah Iyahuudi Alguduseewwa Gaysariyaaywa eeyaaniheeb,
bariiyooh madar aree hoosu yhariwna.
25 Oon ootak tooyat astehaleen gwabab hooy miraab kaaki.
Laakiin baruuh Gaysar haakamiyeet toona yhariw akay Roomaab astoobyeena amkir.
26 Laakiin Gaysarii dehaay oon ootakiib naat sidik akantiibeet toonaati.
Oon usabbii,
barooh suurookna haay eesiisan,
aree barook Whad'a Agriiba barooh suurook asingad.
Bariitooh tugadiyaaytiib bhaliinaayt har'ii,
laakiin naat gaat akantiibeet toonaati.
27 Tak abuukiib igwabbeeh sooyaab baakaay,
Gaysarii dehaay uufduug daayiina kitti.>>
idi.