Buulus Fiiliikisiit tumhaakamaati suurii
24
01 Ayt yinaati har'ii Hanaaniya ufagiiri uuwin,
eegrimaab gwadibwa gaadiib Tartuulluus iidneebwa iyhaayt Gaysariyaab ibi.
Buulus gwabab s'abuuki jillaay whaakim ibeen.
02 Aflaay Buulus waliikamiyanihoob,
Tartuulluus igwabab hadiidiya <<Fiiliikis whamooysama,
udehayoon gwida dooreeka tis'asiga,
bariituuk t'amshabbooy aree whaashoon tishiishiboob.
03 Hinin ikati mhiiniika kastooh toona baruuk tid'iyeet winneet hooy afirhaaba.
04 Ani barook gallabtiib kaahariw,
laakiin dabaloot midda sabar d'iyaat sinaakir hoon.
05 Kasseeh Iyahuudi tuduniyaatiib eefeen,
uun uutak aashoosamaabu,
gwirhaab kehii akaabu.
Baruuh han masi Unasaari iyadneet majmuu'aati suurkina ikati.
06 Masi baruuh oodiini gaw han najjastiib jarrabiya.
Aflaay hinin barooh n'abik.
07 Hinin abiiyeen nibariyi saalfii haakamtiib nhariw.
Laakiin Liisiyaas udheeshi had'a eeyaayt barooh akruurii hoon haay giigiya.
Malya Liisiyaas oon ootak bariiyook suurii atehimnayeet toona sooya hoon.
08 Baruuk aree abiiyaak barooh raatamtiniyeek,
hinin atehimnayeet tuuna sidik ikatiyeet toona han iikan tindiya.>>
idi.
09 Malya Iyahuudi yakiyaaniit,
Tartuulluus iideeb ibhali agbiliyaan.
10 Oont'a whaakim Buulus bhaliiyi jillaay tiiliya.
Buulus igwibi,
<<Baruuk whaashiyoon dehay gwida hawla gaadiib tikatiyeet toona akteen.
Ani aree toon tumhakamaatiyook suurii ugarooyu hanbiyeet toona winneet hooy afirhaabu.
11 Ani tamna maloot yinaati suurii siileeltii dehaay Algudus abayeet toona baruuk willa iikan tindiya.
12 Yahuudi aneeb atehimeen oodiini gawiib gaal amgwasaaree miraayi kiikeen.
Oodiini gawiib ikatiyeek tari tumadiina tookinaatiib han ribshaayt sid'aab kaaki.
13 Aan baraah is'abiikneeyi igwabab sidik ikatiineet toona aree badehaat kiibariin.
14 Laakiin sidiku ani Ukwaasanaay usalalii sakani,
hoobeeyoon Ukwaasana aree anbiid.
Toon toona baraah shawaaytu iyadna.
Ani Muusaay whaggiib kataabt toona kastooh inabiya diyaab ikatiineet aamanani.
15 Ani aan aanda s'ayaameeneet toona Ukwaasanaay s'ayaamani.
Uudehay udaayiibwa w'amaagwa kassuuh tooyattii yaki iyadneet toona aamanani.
16 Aflaay ani Ukwaasanaawwa kassooh oodehayi suuriiwwa ugin'u asinhiiseet toona aharriiw.
17 Gwida hawlaayi mitlali har'ii,
whaashiyoon oodehay whamraab miyaawwa karaamaatwa iyiwi jillaay tooy agar.
18 Udiini gawiib W'iidiib toon toona aree d'iyee imriinheeb.
Beenhoob gwida dehay geebu kiihaay,
ribshaayt han kwaasaab kaaki.
19 Laakiin Yahuudi gali Aasyaay y'aab beentooy iifiin.
Baraah anii kehii halaagaayt iibriineek tooy suurook daayiina.
20 Tari oodehay tooy eefeen raataana.
Ani umajlisiyoohna suurii angadihoob,
gwabab akaana hoosu miraab biikaayneet toona sooyeen hook.
21 Gwabab ani kehii miraab ikatiineek,
ani tumhaakamaati suur waliikan,
<Ani uudehay y'aya tooyat hooy yakeeneet toona aamanan akay,
amsi haakamamani!>
adi.>>
idi.
22 Malya Fiiliikis Ukwaasanaay usalal daayiib iktiin,
tumhaakama isingad,
<<Liisiyaas udheeshi daabit y'iiniyihoob,
whukwum iikwasi andi.>>
idi.
23 Malya udheeshi suurkina Buulus ingw'iideet toona sooya.
Laakiin biihakwiirneet toonaawwa,
y'araweetooh shamaamt aree biihabiineet toonaawwa sooya.
24 Shalik yinaati har'ii,
Fiiliikiswa tutakatuuh Duruusiila tuyahuudiiwwa eeyaana.
Buulus hooy itgw'iideeb oomhiin ibeen.
Buulus waliikisiyaaniit Yasuu'a Umasiihiib iibriyeeb w'iimaani bhali isnaakirna.
25 Laakiin Buulus,
tushibootiibwa,
ugarooy kaleewtiibwa,
whukwum gayi y'iiniibwa sooyaneeb oodoor Fiiliikis irkwi.
Shaawti baruuh Buulusii dehaay,
<<Oont'a aan mhaaba,
aflaay giigaa.
Shawaay kaaki,
ashtawiyeek laakiin dehook diigwati andi.>>
idi.
26 Beet toonaati har'ii,
Fiiliikis Buulus waliiksiitka diima bhaliisami.
Baruuh Buulus balsaat iyiweet toona hooy s'ayaami.
27 Malu hawla hasaamiyaani har'ii,
Boorsiyoos Feestoos,
Fiiliikisi mhiin haakim iki.
Fiiliikis Iyahuudi suurkina afirhistiib yhiriw akay Buulus masi usjiniib y'ish id'i.