23
01 Buulus umajlisi da winneet ishbibaayt,
<<Isanaayaan,
ani oon amsi ookiik Ukwaasana kassooh ugin'iisu shagaaman!>>
idi.
02 Malya Hanaaniya ufagiiri uuwin,
eenda Buulusi dar ingid Buulusiib ooyaf eeth'aneet toona sooya.
03 Laakiin Buulus bariiyooh dehaay,
<<Barook t'eeraat heeta,
Ukwaasana iith'a hook indi.
Baruuk beentooy s'iit kak whaggii haakamtiniyaheeb?
Baruuk abiiyeek whag amnafaayiit,
aneeb tishooth'aheeb.>>
idi.
04 Aanda Buulusi daraag ingid barooh raatiyaan,
<<Ukwaasanaay ufagiiri oowin adgiriit kak neewtiniya?>>
idiin.
05 Buulus <<Isanaayaan,
ani baruuh ufagiiri oowin ikatiyeet toona kanaab kaaki.
Uuktaab <Udehayyook whaakim baaneewa!>
indi.>>
idi.
06 Buulus umajlisiib gali Sadduukiibwa,
wari aree Fariisiibwa iiktiineet toona ikanihoob,
<<Isanaayaan,
ani Fariisiib Fariisi ooru.
Ani uudehay y'ayaab yakeeneet toona aamanan akay haakamamani.>>
idi.
07 Buulus een ibhali idiyi har'ii,
Ifariisiiwwa Isadduukiiwwa akra amgwasuuraay daayaan,
malya umajlisi da eengal giraadiyaan.
08 Isadduuki yak kiihaay iidna,
malak tari shuuk han kiihaayna iidna.
Laakiin Ifariisi een bareeh kasseeh haay aamaniin.
09 Toon toonaati sabbii aree akraat jawaat tiifi.
Whaggi kooja gali Fariisiiba akay yhaseeniit,
<<Oon ootak gwabab hooy karhina.
Barooh shuuk tari malak bhaliisamaab ikatiin.>>
idiin.
10 W'amgwasuura akrakaab iikti,
udheeshi daabit Buulus kat'amiiniyeena irkwi.
Barooh tikwsiit bareesooh akruurii yaksiit um'askar beeti haay it'agiirneet toona aree ikajareeh sooya.
11 Been whawaad W'ankwana Buulusi dar ingadaayt,
<<Baarikwiya!
Suur Alguduseeb aniib sootiyeeb ibhali t'a han Roomaay ibakii sooya.>>
idi.
Iyahuudi Buulusi madar niyaamiyaan
12 Tooyin tumalyaatiib Yahuudi gali immarraayniit Buulus ituudir biidiyeek m'ariit biitamayneet toona tari yam biigw'ayneet toona halafooyaan.
13 Oon w'amaag waraay deha fadhig tamuuni mhakwal y'iin da hooy yakiyaan.
14 Gali bareesooh ifagiiriya iwawinwa isuurkinaawwa ibeeniit,
<<Hinin Buulus nidaar bindiyeek itamtiiwwa igw'itiiwwa dehoon harramamaaba.
15 Aflaay baraakwa umajliswa ibakii udheeshi daabit beenaat,
Buulusiib masi mhakamaatiit halaagaayt tishtabbiib hooy tibariineet toona sooyaana,
aree barooh waliiksaana.
Been oodoor baruuh beentooy kitmaab baakaay nidaar niyad.>>
idiin.
16 Laakiin Buulusi kwaati oor baraah niyaamiineet toona imaasiwihoob,
um'askar ibaayt Buulus sooya.
17 Buulus dheeshi suurkina gaal waliikiyaayt,
<<Oon w'oor udheeshi daabit sitooba.
Barooh naat gaat sooyi indi.>>
idi.
18 Aflaay barooh udheeshi daabit haay ibi.
Udheeshi suurkina udaabtii dehaay,
<<W'abuuki Buulus ittiyoodiib oon w'oor barook askatiimeet toona hoosu yhariw.
Baruuh naat gaat sooyi hook indi.>>
idi.
19 Udheeshi daabit w'oori ayi y'abik,
haay itfalaayt raatiya <<Naan sooyiheeb tindiya?>>
idi.
20 Baruuh aree <<Lhayt Yahuudi da gali Buulus umajlisii dehaay haay eetniyeet toona hook yhariwni jillaay immarraayna.
Barooh masi mhaakamaatiit halaagaay hooy tibariina massalameen.
21 Laakiin baruuk beet toona baagabbalama.
Fadhig tamuuni mhakwal ikatiin da bariiyooh deha kamiin abkaaba.
Baruuh itoodiireeb ookiik katamna tari kagw'ina,
diyaa halafooyaaba.
Oont'a baraah amara.
Baruuk gwanbiyeet toona yhagitna.>>
idi.
22 Udheeshi daabit w'oor giigisiyaayt <<Een ibhali aneeb sootaneet toona gaal han baasooyaa!>>
idi.
Buulus Gaysariyaab istoobna
23 Udheeshi daabit malu dheeshi suurkina waliikiyaayt <<Amsi whawaad tuus'a ashshadhig tikatiyihoob,
malu shi kajar Gaysariyaay deha soomirna.
Asarama tamuun hatay oomanaabwa,
malu sheeb aree gargaab finaateesoohwa soomirna.
24 Buulus hataay dehaay soomirna,
barooh whaakim Fiiliikis ibakii asgaa tiskatiimna.>>
idi.
25 Malya udheeshi daabit jawaab iktib.
Uun ujawaab bak iid:
26 Kilaawdiyoos Liisiyaasii,
Whaakim Fiiliikis,
whamoosama ookiik:
tishiboonay salaamani hook.
27 Yahuudi gali oon ootak y'abikniit madar yhariwna.
Laakiin malya barooh Roomaaniib iiktiyeet toona akanihoob,
kajar galib ayhaayt ashidhhan.
28 Malya bariiyooh yhiriwneet toona iikaneet aharriiw.
Oon usabbii,
barooh umajlisiyoohna suurii haay y'an.
29 Malya laakiin barooh udiiniyoohna eefi gaanuuni sabbii atehimaab iiktiineet toona akan.
Uun uutak madar tari sijin han haay astehaliiniyeet maagt gwibbaab kiiki.
30 Baraah bariiyooh kehii maagt niyaameeneet toona akanihoob,
willa barook beeti giigsan.
Barooh atehimaab aree tehalaagaaytoohna bariiyook suurii haay y'eeneet toona sooyan.
31 Aflaay ikajar udheeshi daabti bhali isnaakirniit,
been whawaad Buulus tumadiina Antiibaatriis istoobna.
32 Tooyin tumalyaatiib ikajar iragadaayee giigaab um'askaroohna y'agarna.
Ikajar yhatayi kehii giigaab aree usalal ooraaw iskatiimneet toona sooyaaniit y'agarna.
33 Baraah Gaysariyaab iktimnihoob,
ujawaab whaakim nuuniyaan,
Buulus han sallamiyaan.
34 Whaakim ujawaab agriiyaayt Buulus raatiya <<Keeya haashii y'aabwa?>>
idi.
Buulus Kiiliikiyaay iiktiyeet toona aree ikanihoob,
35 <<Uudehay y'atehimaayaak y'eenihoob,
tehalaagaaytook willa iishbib andi.>>
idi.
Malya Buulus Hiiroodisiib ugawiib ingw'iidneet toona ikajareeh sooya.