Tukaniisaatiib abidna
2
01 Ani willa sooyani hookna,
hankaab oodehay kassiyooh dehaay siileelaana.
Ukwaasana shamaamt hooy hariwna,
bareeyooh mhiin bitkeemaana,
bareeh dehaay hamidna.
02 Yhad'aawwa kasseeh baliib tehad'aayeetiib eefeenwa bak dehaay siileelaana!
Aflaay m'asgiibwa tiribshaaytii nigiya kwiraaywa nikweeree dehaay adgirnay.
Tageegwa faalwa nimeeri jillaay siileelaana.
03 Tuun tuuna daayiitu,
Ukwaasana W'ishidhhiinoon aree afirhistini.
04 Ukwaasana kassuuh uudehay dhhantiit oosdik ikteenyeet toona yharriiw.
05 Gaal Kwaasana eefi,
oodehaywa Ukwaasanaawwa aree bitkeemiini gaal eefi,
baruuh aree ootak Umasiih Yasuu'a ikati.
06 Baruuh ugarooyooh kassooh udehayi jillaay hiiyyaabu,
tibadeha aree udooruuh y'iiniyihoob soomameen.
07 Oon usabbii aree ani diigwatkinaawwa linguumaawwa akati.
Ani oosdik sooyani,
gwisir kahadiidan.
Ijintiili aree usidki iimaan allamani.
08 Ani kassooh oomhiin eefeen oodehay taahira ayi asti abiktiit siileeleeneet toona hooy aharriiw.
Baraah hasiyaaytwa angwasuuraabwa anu id'aneet toonaati.
09 Ani masi teem'a han daayiib eetkwiineet toonaawwa,
gibilwa habnaawwa id'aneet toona hooy aharriiw.
Tehamu biihashuuyayneet toonaatu tari dim'araab tari jawharaab tari alya halaaka biid'iineet toonaati.
10 Laakiin teem'a Ukwaasana y'abidt,
udaayi shaga dehaay hanyiis.
11 Tutakat diiseet allamamtiniyeet toonaatu,
aree ibhali tisnaakiireet toonaati.
12 Tutakat allamtiniyeet toona kasooyan,
tari ootaki kehii had'aat tikatiyeet toona han kasooyan.
Batuuh ibakii tim tikatiyeet toonaati.
13 Aadam hankaab daamiya,
malya aree Hawwa daamta.
14 Aadam atootlaab kiiki.
Laakiin tutakat titootaalaayt danuubeet kina tiki.
15 Laakiin taam'a inisrika ifeerni sabbii iidhhan iyadna.
Bataah w'iimaanwa,
ooreerwa,
itageegtiiwwa,
oogbilwa isoorariimneek iidhhan iyadna.