6
01 Baliin kishiyaab ikatiin kassaah y'ankwanaayeeh daayi hamooysitiib astehaleeneet toona ibakii ikteeniin.
Aflaay Ukwaasanaay uusimwa hineeb w'allamtiiwwa gaal han amaag iyaad kiidi.
02 Baliin aamaneen ankwana ibariin bareeh biitaliisneet toonaatu,
baraah sanaab ikatiin.
Baraah beenaayka daayiika shagaamti bareeh shagaameeneet toonaati.
Bareeh ishagaay anf'ameen aree aamananaab ikatiini sabbiiwwa,
bareeyooh dehaay daayiib ikatiini sabbiiwwa,
daayiib shagaameeneet toonaati.
Beet toona allamaat oodehay s'akira.
03 Gaal han gwisri madehaba allamiiniyeek,
W'ankwanaayoon Yasuu'a Umasiihiib ibhali idaayiib biigabbalamayeek,
udiiniyoon w'allamti biigabbalamayeek,
04 baruuh kibiri taku naat aree kiikan.
Baruuh w'amgwasuuraaywa t'amhassiyooytiibwa d'am miraab ikati.
Aan ibhali hasidwa,
amgarmooytwa,
neewwa,
amaag tehimaatwa ikwasiin.
05 Aan ibhali eenda y'afraya ishalik fhamaatiib oosdik baabariin baliin oodiin miraayi salal hiiseena,
een bareeyooh bitik diimaab maag ikwasiin.
06 Laakiin toona baraah ibariineet haay ganaamaab ikatiineek,
uudiin oodehay gabsiini.
07 Hinin tuduniyaatii dehaay naat han haay y'aab kinki,
naat han hooy niyayee dehaay ka'adgirna.
08 Laakiin m'ariitwa halaakaabwa nibariyeek,
aflaay beet tuuna mhaatoon tikati.
09 Uudehay igabti harriiw jarrabamtiib daayeena,
sharakiib dhibeena,
gwidaat amaagnaaytiiwwa daayeena,
y'amag salala oodehay kwidhseena aree kat'een.
10 Imhallagaayi reer kastooh tumaagti jinsaayi gadam ikati.
Dehay gwadi winneet imhallaga yhariwna,
w'iimaanii fidinti hawrariikeena,
gwida gadabee igin'aayeehna isehadaaliin.
11 Laakiin baruuk Ukwaasanaay tak,
een bareeh kasseeh hooy fooraat shiboot d'iya.
Ukwaasanaay usalalwa,
w'iimaanwa,
ooreerwa,
w'amtaruumaawwa,
itarmuumaawwa d'iya.
12 W'iimaani fina daayiib finaaya,
umidhhan udaayim kaleewa.
Baruuk gwida baadehi suurii daayiib tifidhadha akay oon umidhhanii dehaay waliikamta.
13 Ukwaasana naatka umidhhan iniiwnaay suurii,
Umasiih Yasuu'i suurii,
baruuh Bintaayi Biilaatoosi suurii w'iimaanooh daayiib ifidhadh.
Ani sooyani hook:
14 W'ankwanaayuun Yasuu'a Umasiih lawiiniyeeb oomb'i ookiik teen tiwasi sinaakira,
daayiib abika.
15 Baruuh ooknaay udamaaniib haay y'aa indi.
Baruuh baarakamaabu,
whaakim oongaal yhad'aayi Had'a ikati,
y'ankwanaayi Ankwana ikati.
16 Baruuh ood'ooh bashar baabariibu,
dehay biikatiimi nuuriib aree kwarri.
Barooh aree gaal han rhaab kiiki tari irhiti adgiraab kiiki.
Whamooyseewwa umatuunwa diimaab bariiyeeh ikatiin.
Aamiin.
17 Toon tuduniyaatiib igabaab ikatiin baliin kibir biid'iineet toona sooyaa!
Is'aya han umraayiib biid'iineet toonaatu,
uumraay atookaknaab kiiki.
Laakiin is'ayaayoohna Ukwaasanaay id'aneet toonaati.
Baruuh oomraay iniiw hoon,
hinin afirhistiniit toona kastooh iniiw hoon.
18 Bareeh daayiinaayt id'aneet toona sooyaa!
Baraah udaayi shagaay gabaab ikatiin.
Miyaawanaab akeetiit,
toona t'ibariineet y'adhidhneet toona sooyaa.
19 Bak aree igarooyeehna dehaay miraay rayiimeena,
har'ook y'iiniib udamaanii dehaay aree akra miraay dehaay ikati.
Aflaay baraah usidki midhhan daayiib kaleeween.