Tiimootiib imitiya
4
01 Aashuuk <<Har'ook y'een idamaneeb gwadi w'iimaan ishti d'iit toolana shuuk eetriimna,
aajin allameeneet teena aree eetriimna.>>
winneet diyaaba.
02 Taan taana gwisri haray'aree ikatiin.
Baraah igirma kiibariin.
03 Baraah oodehay eed'ar yheebna,
tim'ari aree itamisiti yheebna.
Laakiin Ukwaasana y'aamaneen oosdik ikteen baliib,
teen tim'ariya hamidtiit tameeneet toona sooyaabi.
04 Ukwaasana d'iyaab ikatiyeet taana kastaah daayiita.
Hamidtiit tittiyeewiina aree raab kitbari.
05 Tuun batuuh Ukwaasanaay ibhaliyeewwa siileeltiiwwa gabbalamaat tikati.
06 Teen teena isanaayeek sootiniyeek,
daayi shagaamana Umasiih Yasuu'iib iikti tindiya.
Oosidki iimaaniib tiwina,
tudaayiinaayti t'aliim tirameet toona daayiib rhista.
07 Laakiin baliib igwisri kifuuri mitaal hooy sigiya.
Ugarooyook Ukwaasanaay usalal s'abika.
08 Ugarooyt turiyaada takweet gaat tibari,
laakiin Ukwaasanaay usalali abuuk kasteeh tinaateeb takweet ibari.
Uun baruuh,
oont'aani umidhhanwa,
har'ook y'iiniib umidhhanwa mhalleeh waadiyaab iniiw.
09 Uun uumiyaad winneet sidiku,
daayiib gabbalamtiib aree astehaliini.
10 Toon tunaati sabbii aree shagaamnay aree winneet nhariw.
Is'ayaayoon Ukwaasana udhhaniinaay daasaaba,
baruuh oodehay kassooh W'ishidhhiinu,
barooh aamaneen waaseetiit ishidhhiin.
11 Teen teena sooyaat allama.
12 Baruuk adhamiib tikatiyi sabbii gaal han baa'attallaasa.
Laakiin y'aamanana ibhaliiyeebwa,
umidhhaniibwa,
ureeriibwa,
w'iimaaniibwa,
tinhisuuytiibwa baruuk misaal dehaay akaa.
13 Ani y'aniyeeb ookiik baruuk udehayii dehaay ooktaab agriitinyi jillaay mara,
udehayi ibhaliisamtiiwwa w'allamtiiwwa dehaay mara.
14 Umiyaawook ishti baad'iya,
oomiyaaw inabiyaayeet diigwattii attiyeewiyaabwa.
Isuurkinaayi majlis y'ayeehna kehook daasiyaanihoob,
attiyeewiyaabwa.