Yasuu'a Beetaaniyaab ibi
14
Ufatiiri iidwa,
ubaaskaay iidwa masi malu imb'i hooy mhiya iifiin.
Ifagiiriya had'aawwa,
udiini koojaawwa,
Yasuu'a tiltiit haay idiirni salal yhiriwna.
2 Baraah <<W'iidi imb'i laakiin band'iyeet toonaati,
uudehay finaayi hoon indi.>>
idiin.
3 Yasuu'a Beetaaniyaay Sim'oon ubhadhiyaayi gawiib m'ariit tamee,
takat winneet alyaat shakwiint fiyakee eeta.
Tushakwiin Yasuu'i kehii tifif tid'i.
4 Been tooy iifiin uudehay winneet iribna,
taktakee dehaay,
<<Tuun tutakat tushakwiin naanhooy tinfiif?
5 Toon tushakwiin mhay shi diinareeb dilbiit miskiinaab tish'adhiidheet toonaati.>>
idiiniit tootakat imooyaayna.
6 Yasuu'a <<Tootakat ishna d'iina,
baagallabaana!
Beet toona daayiinaayt aneeb haay tisehariiweetu.
7 Oodehay imiskiina diimaab geebookna eefeen,
tehariwna doorka teeshtiimneet toona adgirteena.
Laakiin ani diimaab geebookna kadaayan.
8 Batuuh toona t'adgirtiniyeet anii dehaay tid'i.
Shakwiint aniib ubashrii kehii tififihoob,
aneeb umiimashii dehaay whankaay tisoomiirheeb.
9 Oosdik andi hookna:
kastooh toon tuduniyaatiib usakana udaayi hooy hadiidamiini.
Mhiinka,
beet tutakat saktaneet tuuna hadiidami tindi.
Kassuuh uudehay batooh sh'iin iyadna.>>
idi.
10 Yuudaas W'iskaaryooti,
Yasuu'iib tikwiriya itamna malooyeeb hooy gaalu.
Ifagiiriya iwawin ibaayt Yasuu'a kak bareeh nuuniyeeb infaraad.
11 Baraah winneet afirhiyaaniit,
barooh imhallagaayee naat iyiwnee dehaay imakkaarna.
Baruuh oon oomkir gabbalamiya.
Uudehay rhaab baakaay Yasuu'a bareeh haay nuuniyeet fursa igw'ad.
Yasuu'a tikwiriyaati geeb ubaaskaay diraar tamiya
12 Ufatiiri Iid daayaay eeya,
oon whawaad <<Ubaaskaay>> w'iidiib uureew hooy imhariid.
Beenhoob tikwiriya Yasuu'a raatiyaan,
<<Naamhiin dehook nisoomiireet toona harriiwa?>>
idiin.
13 Yasuu'a maloob tikwiriyaatee dehaay,
<<Tumadiina beena!
Beentooy tak yami gidir itfayiik timeerna har'ii sakaana!
14 Baruuh oogaw ishuumiinyeeb shibibna!
Been ugawi kina beenaat:
<Seedna,
naad niganif,
oodiraar ubaaskaay tikwiriyaati gwad keeya gawiib tamani?>
idi hook diina.
15 Baruuh ugawi mhakwal gurfaat mar'at farrashamaat rhisi hookna indi,
been oomhiin soomirna!>>
idi.
16 Baraah tumadiina hadiit idifna,
Yasuu'a iideenaatiit imriin.
Beentooy ubaaskaay diraar isoomirna.
17 Himniit itamna malooyi gwad eeya.
18 Baraah tamiinihoob Yasuu'a,
<<Oosdik andi hookna,
gaal bareesook hallaay geebu tamiiniib iidlibheeb indi.>>
idi.
19 Baraah winneet gadabiyaaniit gaalka Yasuu'a raatiyaan,
<<Aneeb han?>>
idiin.
20 Yasuu'a <<W'ayi aneeb nuuni indiib aree,
oont'a tim'ariiti kehii geebu eefi.
Itamna malooyeeb aree gaalu.
21 Umb'eeyu udehaay kataab y'iinihoob,
W'aadami Oor ibakii iyaayi.
Laakiin idhikw uutak barooh nuuniiniib!
tufraytooh hamaagiini.>>
idi.
22 Baraah tamiinihoob,
baruuh hadhiib yaksiyaayt,
W'ankwana yhamid.
Yhadhi ikit'a,
aree bareeh nuuniya.
Malyaab,
<<Oon barooh yaksaana,
aniib ugaru ikati.>>
idi.
23 Yasuu'a kaas iiyhaayt Ukwaasana yhamid.
Bareeh yhii <<Gw'aana!>>
idi.
Oont'a baraah han gw'iyaan.
24 Malya baruuh <<Uun baruuh gwida dehayi jillaay eetfiif ani booyu,
oon bariisooh W'ankwanaay ugalad ugayi ikati.
25 Oon amseenee fidnaab,
Ukwaasanaayt tehad'aayeetiib gayi ha gw'anyeeb ookiik,
shaawti haab gw'i kaadi.>>
idi.
26 Baraah shiilaat idiiniit har'ii,
oorba Saytuun ibeen.
Yasuu'a Sim'oon Butroosiit tumitway whankaay hadiidiya
27 Yasuu'a tikwiriyaatii dehaay,
<<Baraak kassaak iiribheeb tiyadna.
Uukitaab <W'anootteega tinth'eek,
t'anu itbariirna.>
indi.
28 Laakiin ani tuyattii yakaniyi har'ii,
bareeyookna suurii Jaliili hadiit iidif andi.>>
idi.
29 Sim'oon,
<<Kassaah in'iishnuuk han,
ani kaa'ish hook.>>
idi.
30 Yasuu'a <<Ani andi hooka,
Butroos,
lhayt kiruumt uujiik malu doora baakuukillaayay,
baruuk mhay doora <Ani kaakan hook.>
iyaadeheeb tindiya.>>
idi.
31 Laakiin Sim'oon Butroos masi,
<<Ani gwadook ayaayi nuun ittiw hook kaadi.>>
idi.
Tikwiriya kassaah Sim'ooniib ibhali t'iiteena idiina.
Yasuu'a Gashiimaaniib sileeliya
32 Yasuu'aawwa tikwiriyaawwa <<Gashiimaan>> ittiyoodi haash ibeen.
Beentooy iktimnihoob,
Yasuu'a <<Ani sileelaniyeeb ookiik baraakna tooy s'aana!>>
idi.
33 Malya baruuh Sim'oon Butrooswa,
Yaaguubwa Yuhannaawwa geebooh haay giigiya.
Beenhoob Yasuu'a gwirhaayeebwa hasakaaywa daaya.
34 Yasuu'a <<Ani winneet gadabaabu.
Baraak tooy s'aana gw'adna!>>
idi.
35 Malya Yasuu'a shalikt masaafa hiireeryaayt,
whaashiib dhibiya aree sileeliya.
Malya <<Baabu,
toon toos'a hassaa!
36 Baabu,
barook naatka dehook madaatu.
Harriiweek oon ookaasi gw'itiib tilhanay hooysu giigsaa!
Laakiin ani aharriiweet tuuna kit'aki,
baruuk harriiweet tuuna tikati.>>
idi.
37 Malya tusileeltii yakiyaayt,
tikwiriyaatii dehaay eeya.
Bareeh diwee rhiya.
Masi Butroosii dehaay,
<<Baruuk diwtinii han,
Sim'oon?
Gaat s'a han tingw'iideet ka'adgirta han?
38 Bitjarrabamaynee dehaay sileelaana!
Aashuuk yhariwna,
laakiin ubashar in'akw.>>
idi.
39 Yasuu'a masi isgiit sileeliya,
oont'a han baliin ibhali eekna idi.
40 Baruuh t'a han y'agarihoob tikwiriya diwee imri.
Bareeh han'aar hooy daaya,
aagw'ad irhiti iribna.
Bariiyooh dehaay naan iidneeb igamna.
41 Yasuu'a mhaya door tikwiriyaatii dehaay y'agaraayt,
<<Masi fiinteena aree diwteena han?
Mhatni hookna!
Tuus'a eeta.
Shaawti shibibna!
W'aadami Oor tumaagti dehay nuunami indi.
42 Asa gadna!
Yakaana!
Giigni,
shaawti aneeb iidlib indiib uutak y'aabu.>>
idi.
Yasuu'a y'abak
43 Yasuu'a hadiidee sagi mhiinii Yuudaas iidna tak,
tikwiriya itamna malooyee gaal iikti dehaay lawiya.
Ifagiiriya iwawinwa udiini koojaawwa diigwataab iiktiini gwida dehay gadh'amaab bariiyooh geeb iifiin.
44 Yuudaas eenda alaamaat yhii,
<<Ani hooy f'aniyeeb ootaku,
abikna akra habsiib d'iina!>>
idi.
45 Baruuh igidiyeesooh Yasuu'a idwilaayt,
<<Seedna!>>
idiit hooy f'iya.
46 Aanda Yasuu'a y'abikniit yhakwirna.
47 Gaal Yasuu'i geeb iifiin eendee,
ufagiiri oowwinnaay kishiya umb'adhdhii ith'a,
w'angwiil hooy ikit'a.
48 Yasuu'a <<Naan hooy maagtakiit b'adhdhaabwa kwoolayaabwa tiiheeniit deha yaktaana?
49 Diimaab W'ankwanaay ugawiib geebookna allamiyeek,
imb'eeb han abkaayi kittena.
Laakiin aaktab iidneet tuuna ibakii sidik tiikati tindi.>>
idi.
50 Malya kassaah y'ishni giigiyaan.
51 Gaal tak adhamiib halaak nuun weena baabariib Yasuu'i har'ii sakiya.
Barooh y'abikna.
52 Baruuh whalaakooh y'ish,
rabooba dhaabiyaay giigiya.
Yasuu'a Iyahuudi mijlasi suurii ingad
53 Malya Yasuu'a ufagiiri oowwin haay ibeen.
Malya udiini koojaawwa udehayi suurkinaawwa immararaayna.
54 Been oodoor Butroos sagi mhiinii barooh imooraam.
Ufagiiri oowwinnaay gawi hoosh shuumiya.
Beentooy igw'aadiiga n'eet shidhhana kwalala,
aree baruuh han toon'i geeb ifish.
55 Kassaah ifagiiriya iwawinwa kassuuh Iyahuudi mijlaswa Yasuu'a haay idiirni sabab yhiriwna.
Laakiin baraah sabab han hooy miraab kiikeen.
56 Gwida dehay gwisreet badeha Yasuu'iib hadiidiyaan.
Laakiin tibadehaataahna gat akaat kiikeen.
57 Malya gwadi yakiyaaniit bariiyooh kehii gwisreet badeha ibidehana.
58 Baraah <<Hinin oon ootak <Ani W'ankwanaay oogaw uudehay shaagaamaab ikatiyeeb dhibsiit,
weer dehay biishagaamayeeb mhayt yinaateeb and'iir> diyee nimaasiw.>>
idiin.
59 Laakiin beenhoob han tibadehaataahna gat akaat kiikeen.
60 Malyaab ufagiiri uuwwin udehayi bitik asa ingad,
<<Yasuu'a,
baruuk naat kitdiya han?
Aan aanda kehook ibadehaneet tuuna naanaatu?>>
idi.
61 Laakiin Yasuu'a naat han dehaay gwibiyaab kiiki.
Ufagiiri uuwwin masi Yasuu'ii dehaay,
<<Sooyaa hoon!
Baruuk W'ankwana Utageegaanaay Umasiihiiwwa?>>
idi.
62 Yasuu'a <<Awooh,
aneebu.
W'aadami oor W'ankwana W'alyaanaay geeb umaygwadii dehaay s'ee,
tibireeti b'aluuki geeb y'ee rhi tiyadna.>>
idi.
63 Ufagiiri uuwwin winneet hasyaaytii whalaakooh shatatiyaayt,
<<Naanhooy wari badehiya nhariw?
64 Ikifuuri bhali timaasiwna.
Naan tiyadna?>>
idi.
Kassaah barooh atehimiyaan,
<<Tooyat astehaliini.>>
idiin.
65 Udehayii gwadi bariiyooh kehii tifiyaana ithab'ana.
Eegw'ad yhakwirniit y'ayeesooh ithab'ana.
Barooh sakanaayaan,
<<Aaw ith'a hook,
sooyaa hoon?>>
idiin.
Malya ikajar barooh iigw'ad iiyheeniit ithab'ana.
Sim'oon Butroos Yasuu'a itwi
66 Butroos ugawi hooshiib haayee,
ufagiiri oowwinnaayt kishiya eeta.
67 Butroos toon'i fishee rhitanihoob,
winneet tishibibaayt har'ii,
<<Baruuk han Yasuu'a Annaasiraay geeb tiifiya.>>
tidi.
68 Laakiin Butroos itwi,
<<Yaa takatay!
Kak tindii?
Ibhalyeek eekna ka'afhaman.>>
idi.
Baruuh ugawii ifir'ihoob,
uujiik kuukillaayi.
69 Tukishiya masi Butroos tishibibaayt,
oodehay beentooy iist'a sooti,
<<Uun uutak han bareesooh gaalu.>>
tidi.
70 Butroos <<Abadan!
Ani kaaki.>>
idi.
Shalik middaati har'ii gwadi idwilniit,
<<Baruuk han bareesooh gaalwa,
Jaliilaayiibwa.>>
idiin.
71 Oon oodoor,
Butroos ateewwa halafooyeewwa <<Ootak baraakna tiyadneeb ookna kaakan.>>
idi.
72 Gaalhoob aree uujiik malya door kuukillaayi.
Butroos oon oodoor been Yasuu'a,
<<Uujiik malya door baakuukillaayay,
baruuk mhay doora ittiwheeb tindiya.>>
iideeb ibhali sh'iya.
Butroos barraab ifir'a aree winneet waawiya.