W'ankwanaay oogawi kat'amti
13
Baruuh W'ankwanaay gawii fir'ee,
gaal tikwiriyaatii <<Seedna shibiba!
Daawri aweewwa,
gwidaana daawriit timifr'atiib hooy daawriimaata.>>
idi.
2 Yasuu'a <<Oont'a rhiteeneet tuuna kastuuh kat'amiit gaal awi han kehii ituu'ish kiidi.>>
idi.
Wawin gwirhaaya door
3 Yasuu'a Oorba Saytuuni mooyiib W'ankwanaay ugawi kwayaay s'ee,
tikwiriya Biitarwa,
Yaaguubwa,
Yuhannaawwa,
Andariyaaswa hadooh barooh sakanaayaan.
4 Baraah <<Tuun naadoor iikati tindi?
Tuun tuuna kastuuh dawwiilihoob aree naat alaama iiktiin iyadna?>>
idiin.
5 Yasuu'a <<Daayiib shibibna!
Usalalii gaal han biikwidhsay hookna!
6 Gwida aniib oosmii y'een,
<Ani barooh akati> iyadna.
Gwida dehay italisna.
7 Finaabwa,
rookaatwa teemsiiwnihoob baakatataan.
Taan taana ibakii door gaal ikatiin.
Laakiin t'aakhari masi eetni.
8 Dehay dehayii dehaay fareen,
had'a had'aay dehaay fari indi.
Tuubuur gwida mhiinan hooy idhi tindi.
Hargwiit iikti tindi.
Taan bataah gwirhaayeet alaamaata.
9 Digwagwna!
Uudehay aabiktiit hookna,
amaag waraayiini hookna iyadna.
Ani sabbii aree,
tumhakama sallameena hookna,
eeth'ana hookna.
Tibadehani jillaay yhaakimaawwa,
yhad'aayee dehaaywa galeeleen hookna.
10 Laakiin awwal usakana udaayiib ibakii kassooh oodehay soomamiini.
11 Tit'abbiiknihoob,
kak igarooyookna teeshtiimna,
tari kak teeyadneeb whankaay baahasikna!
Bareekna kitteena Aashuuk Itageega hadiideena.
Been oodoor toona tusoomamteeneet toobhaat diina!
12 San oosan isuudir indii,
ubaaba y'areeh isuudir indii,
y'ar ibaaba ankireena aree isuudir iyadna.
13 Ani sabbii hamaagami tiyadna.
W'eemaaniisookna umidhhin imaar tiyadna.
14 Imb'eeb gaal baa'astehalay mhiin shingiraana rhi tiyadna.
Been oodoor,
Yahuudaay daateeneek eerba beeti dhaabaana!
(Oon barooh agriyeen ibakii beet toona afhamaana.)
15 Beet tooyin ugawi kehii eefeeb ugawiib tikwiit,
toona tuharriiweet kayaksiya,
m'adaytiib daayiiniib aree har'a kii'agar!
16 Tidir'aateeb daateeneek,
yhalaakaayeekna dehaay baa'agaarna.
17 Baliin eemb'i tinakwalayaawwa,
y'areet d'ooranaawwa idhikwna.
18 Beet tuuna mhagaayiib bit'akaayee dehaay sileelaana!
19 Ukwaasana toobuur manooyaneekka oont'a ookiik een igwirhaayeeka amaagkaab daayaab kiikeen.
Oont'a han shaawti daayi kiidiin.
20 Baliit teeyina W'ankwana shalikt kwaasaab biikaayeek,
gaal tak han kiidhhan.
Laakiin W'ankwana oodehay waasaab ikatiyi jillaay,
teen teeyina nakasht ikwasi.
21 Beenhoob oodehay <Umasiihi tooy eefi!>
tari <Umasiihi beentooy eefi!>
iyadneekna baa'aamanaana!
22 Gwisri Masiihi at'iimeenwa,
gwisri nabiyaawwa y'iin iyadna,
gwisreet alaamaatwa m'uujisaatwa iikwsiin iyadna.
Ka'adgiriyaan nuun W'ankwana waasaab ikatiyeeb kwidhseeneet areeyeen.
23 Laakiin digwagwna.
Ani baliit teena kasteeh whankaay sooyan hookna.
24 Baliit teeyinaati har'ii y'een igwirha,
tuuyin thibnamti tindi,
tuutrig daayiib kitfir'a,
25 yhayikw dhadhibeen.
Taabiri akraab digami iyadna.
26 Been oodoor uudehay W'aadami Oor ub'aluukiib akra matuun barii y'ee rheen.
27 Baruuh imalakeeh fadhigtee teeja hadiit fandiig,
udehayooh iwaasamaab tubuutiiwwa tibireeteewwa eeshwawiin.>>
idi.
Tiini hindiit wasi
28 Yasuu'a <<Utiini hindii kanna!
Kasseeh yhindi eerawwa,
whindi raat dan'iyeeb oodoor,
tehibi dawilt tikatiyeet toona tikteenna.
29 Baraakna han taan taana akayee rhiteenihoob,
uudoor dawil ikatiyeet toona kanna!
30 Oosdik andi hookna:
Uun uutaas taan taana kastaah ikatiineeb hadiit kiinhad.
31 Tuubuutwa,
taabireewwa daayimaab kiikeen iyaayiin.
Laakiin aniib ibhali door han kiiyaayna.>>
idi.
Uumb'eewwa tuus'aawwa kiitookkaanna
32 Yasuu'a <<Baliit teeyina oomb'eewwa toos'aawwa tak han kiikan.
Imalak kiikanna,
W'oor kiikan,
been oomb'i Ubaaba uubhaat ikteen.
33 Toon toonaatii dehaay digwagwna.
Uudoor nhoob iikati indiyeeb kitkanna akay,
whawaad seharna.>>
idi.
34 Yasuu'a een eemtaal dehaay hadiidiya,
<<Tak gawooh ishagaamanayeeh ammaniyaayt iibaabiya.
Ishagaamana gaalka naat is'abik,
gaal aree idheefa isigw'ad,
<Whawaad dehaay sehara.>
idiit waseeya.
35 Baraakna han seharana!
Ugawi kina naadoor y'iinyeeb kitkanna.
Baruuh whawaad y'iinyeeb,
whawaadi tarabeeb y'iinyeeb,
kiruumt y'iinyeeb,
fajir y'iinyeeb kitkanna.
36 Baruuh gaalhoob y'iiniyeek,
diwee biimiri hookna.
37 Een ibhali bareeyookna dehaay andiyeeb,
kassooh udehayii dehaay andi,
<Seharna gw'adna!>
andi.>>
idi.