Ikiraaykinaay mitaal
12
Yasuu'a oodehay een eemtaal dehaay hadiidiya,
<<Tak dir'aatooh y'adiit naweet dehaay ikrir,
alleekaab ikwayaay id'ir.
Malya tudir'a warib isigw'adaayt y'ish iibaabiya.
2 Shaawti uwaaki door eeyanihoob,
tum'adaytii w'adhdhooh yhariw akay kishiyaab dehaay diigwatiya.
3 Udir'aatkina laakiin ukishiya ithaab'ana yhabiiniit,
naat anu giigsiyaan.
4 Malya tudir'aati ankwana masi weer kishiya bareeh dehaay diigwatiya.
Oon han laakiin tudir'aatiib iifiin neewiyaan,
babhooyaan.
5 Tudir'aati ankwana t'a han masi kishiyaab mhayaab dehaay diigwatiya laakiin oon idirna.
Masi warib istuub een han gwadib idaarna eeraw ithab'ana.
6 Shaawti gaal nafar uubhaat dehaay imhi.
Baruuh aree w'oorooh w'areeyeebu,
malyaab barooh dehaay iifdig,
<Barooh haamooyseheena.>
idi.
7 Laakiin tudir'aatiib iifiin barooh rhiyaanihoob,
gal eeraweeh dehaay infaraadna,
<Uun baruuh kwasaamiit tudir'a hoon kinaami indi,
oon barooh han niidirka tudir'a iknaayaan kwasaamni.>
imsiyoodaayna.
8 Aflaay barooh idirniit,
tudir'aatii barraab igidna.
9 Tudir'aati ankwana y'iiniyihoob,
naan saki indi?
Baruuh naan sakiiniyeeb sooyi hookna andi:
Een tudir'aatiib eefeen daartiit,
tudir'a warib kinaasi indi.
10 Oon ookitaab agriyaab kitteena han?
Uukitaab <W'awi been id'aariiga iribneeb,
toorkwinti awi ikati.
11 W'ankwana beet toona id'i.
Beet tuuna aree hineeb igw'adeeb ajaayibtu!>
indi.>>
idi.
12 Been oodoor ookina ifagiiriya had'aawwa,
udiini koojaawwa,
aan aamtal bareeyooh dehaay attiyoodiyaab iiktiineet toona ikannihoob,
barooh y'ibikneet toona yhiriwna.
Laakiin oodehay irkwiin.
Malya barooh y'ishniit giigiyaan.
W'imbiraatoorii dehaay tutilbaati fir'i
13 Baraah Yasuu'a bhaliyi s'abuuk yhiriwna akay Fariisiiwwa Yhiiroodiyaawwa dehaay ifdigna.
14 Baraah eeyaaniit barooh raatiyaan,
<<Seedna,
baruuk oosdik hadiidtiniya.
Gaal taki mirkwaay anu han Ukwaasanaay usalal usidkiib allamtiniyeet toona nikteen.
Aflaay Gaysar Iroomaani Imbiraatoor titilba dehaay nifar'eet tuuna halaal han kiiki?
15 Dehaay nifar'a han kinfir'a?>>
idiin.
Yasuu'a ibhali naan haay isehiriwneeb ikanaayt,
<<Naanhooy jarrabteenheeb?
Oon udiinaar rhisaanaheeb!>>
idi.
16 Baraah diinaar gaal rhisiyaan.
Baruuh <<Aan aafiirwa,
uusimwa aaya?>>
idi.
Baraah,
<<Gaysariiba.>>
idiin.
17 Yasuu'a,
<<Aflaay Gaysarii dehaay,
Gaysariit toona hiina!
Ukwaasanaay dehaay,
Ukwaasanaayt toona hiina!>>
idi.
Baraah ibhaliyi diguuyiib aree akraab ajjabamiyaan.
Yasuu'a tuyattii ooyak hadiidiya
18 Sadduugi iidni dehay,
midhhan weer kiiyhaay iid,
Yasuu'ii dehaay eeyaaniit,
19 <<Seednaa,
hinin Muusa dehoon iktib,
<Tak sanuuh d'iraab,
ar baabariib iyaayyihoob,
sanuuh weer tutakat kwasaamiini.
Usanii dehaay ar hooy farri.>
diyaabu.
20 Beentooy asarama sana iifiin.
Gaal bareesooh takat id'ir.
Baruuh ar baabari iya.
21 Uusan umalya tutakat id'ir,
uun han firaay anu iya.
Masi uusan umhaya aree id'ir,
firaay anu iya,
22 Isana y'asarama kassaah hooy imkattaamna.
Gaal han firaay ishaab kiiki.
Malyaab tutakat han tiya.
23 Uuyak daayiinihoob,
y'asarama kassaah batooh id'irneek,
naayiitooh takat iikti tindi?>>
idiin.
24 Yasuu'a bareeyooh dehaay,
<<Baraak kwidhiib teefeena,
Ukwaasanaay akrir kitkanna,
tari eektab han agriiyaab kitteena.
25 Laakiin baliin umidhhan udaayim imeer,
tuyattii uuyak daayiinihoob,
kiimdad'aarna.
Baraah shaawti imalak tibreeteeb eefeen t'iiteeba.
26 Aree y'ayaab shaawti eedhhanneet toona,
Muusaay ooktaabiib whindi udibiluuy eemtaaleeb Ukwaasana uukina hadiidiya,
<Ani Ibraahiimiib Ukwaasana,
Isehaagiib Ukwaasana,
Yaaguubiib Ukwaasana.>
diyaabu.
27 Ukwaasana oodehay w'ayaanaay Kwaasana kiiki.
Laakiin idhhaniina Kwaasana.
Baraakna kwidhiib teefeena.>>
idi.
Tiwasi tidaayiit
28 Yasuu'a Isadduugi bhaliisamee,
Muusaay whaggi kooja gaal eeya.
Barooh daayiib diyee imaasiwihoob,
gaana raatamiya,
<<Seednaay!
Tiwasi keeyaant hooy daayikaata?>>
idi.
29 Yasuu'a <<Tiwaseeteeb hooy daayiit bak eefeen!
Sinaakira yaa Israa'eeli!
W'ankwana Ukwaasanaayuun gaal Ankwana.
30 W'ankwana Ukwaasanaayook kassooh ugin'iisookwa,
kassooh unfiseesookwa,
kassooh ugirmaayiisookwa,
kassooh utaadiisookwa areeya!
31 Tiwasi tumalya aree,
<Ushawawook ugarooyiitook areeya!>
idi.
Toon tuwasi toonaatiika daayikaat kitehaay.>>
idi.
32 Masi been udiini kooja,
<<Seedna,
baruuk daayi bhali tidiya,
sidiku Ukwaasana gaal malyaab baabariibu.
33 W'ankwana Ukwasanaayook kassooh ugin'iisookwa,
kastooh tufhamaatiisookwa,
kassooh utaadiisookwa areeya.
Masi ushawawook ugarooyiitook areeya.
Taan tiwasi kasteeh hinin nifar'eet tikaraamaawwa umiyaawiiwwa daayiikaata.>>
idi.
34 Malyaab Yasuu'a ootak daayiib hadiidee imaasiwihoob,
<<Baruuk Ukwaasanaayt tehad'aayeetii sagiib kittaaya!>>
idi.
Weena baraah Yasuu'a haay sakanaayiineena dehaay lawaat kitti.
Umasiihi aay w'ooru?
35 Yasuu'a W'ankwanaay gawiib allamee,
<<Udiini kooja Umasiihi kak Daawidiit dirriyaaytii y'iini iyadna?
36 Daawid uukina Eeshuuk Itageegaayee hadiidiya,
<W'ankwana,
W'ankwanaayu dehaay:
Y'ashooyeek iragadaayeek whii akwasiyeeb ookiik umaygwadi s'aa!>
diyaabu.
37 Aflaay Daawid uukina Umasiihi waliikamiinyeek,
kak baruuh oorooh ikati?>>
idi.
Yasuu'a Ufariisiiwwa udiini koojaawwa winneet sooya
38 Yasuu'a allamiyihoob,
<<Udiini kooja hooy digwagwna.
Baraah daawri halaaka gwimad kweetiit hiireereen,
isuugaayeeb daayiib salaamameeneetwa hamoosehameeneetwa areeyeena.
39 Udiini gawaayeeb udehayi suurii ikatiineet areeyeena.
Iwaadiyaayeebwa,
whawa daayiinyeeb oomhiinwa,
udehayi suurii eesit'aneet toona areeyeena.
40 Teem'a aandaah ayaab ikatiineenaati gawaayeeb tameena.
Gwisireeb toosileel isgwamiidna.
Baliin bareeh akra gwirha dehaay dhibiin iyadna.>>
idi.
Tutakat t'ibraatfaatki tifir'eet toona
41 Yasuu'a asa iishbibi door,
gaba da W'ankwanaay gawiib mhallagaab usanduukiib tuusee rhiya.
42 Takat miskiint ibraatfaatkiit aree malu santiima usanduukiib tiigid rhiya.
43 Yasuu'a tikwiriya waliikiyaayt,
<<Oosdik andi hookna,
tuun tutakat tumiskiin t'ibraatfaatki kassooh udehayiika gwidaaka mhallaga daasta.
44 Aan baraah kassaah imhallagaayeetooh shawaay ifir'ana.
Tuun laakiin tutiibriyi kastooh tifir'a.>>
idi.