Yasuu'a Algudus shuumiya
11
Beetfageewwa Beetaaniyaawwa iidneet madiina Algudusi daraag,
oorba Saytuun iyadneenaay gadam eefeent idwilhoob,
maloob tikwiriyaatii diigwatiya.
2 Bareeyooh dehaay,
<<Been whaash suurookna eefeeb beenaat,
barooh shuumteenihoob,
halkwiit hakwaar,
oonaay suurii tak amaab biikaayeet timeerna.
Batooh fidignaat haay m'aana!
3 Gaal han sakanaayookna ikatiyeek,
<W'ankwana yhariw,
willa dehook y'igir indi.>
diina!>>
idi.
4 Tikwiriya ibeenhoob,
tehalkwi idheefaay daraag hakwaart akay imriin.
Baraah tehalkwi fidgee,
5 beentooy iifiin uudehay,
<<Tehalkwi naanhooy tifdigna teefeena?>>
idiin.
6 Tikwiriya Yasuu'a iideeb ibhali sooyaan.
Oont'a uudehay han y'ishna hooy imhiin.
7 Malya toomeek Yasuu'ii dehaay haay eeyaaniit,
yhalaakaayeeh kehii daasiyaaniit,
barooh isoo'amna.
8 Baruuh sakee,
gwida dehay yhalaakaayeehna usalaliib dehaay iibrirna.
Wari tidir'a ibeeniit yadh'a hindi kat'iyaaniit y'ashishna.
9 Baliin suurii iifiinwa yhar'ii iifiinwa waliikiyaaniit,
<<Hoosaana!>>
idiin.
Iyahuudi bhaliyeeb <<Hoosaana!>>
W'ankwanaay simii eeyaab libaabiya miyaadu.
10 Baraah <<Hooboon Daawidiit tehad'aayi eetaay teefeet baarakamaatu.
Whamaad Ukwaasana tibireeteeb eefeenaayu!>>
idiin.
11 Yasuu'a Algudus shuumiya,
aree W'ankwanaay oogaw shuumiya.
Baruuh kasteeh teena ukwayaay iifiint ishbib.
Laakiin hawaad dawil iifi akay tikwiriyaati geeb Beetaaniyaab beeti giigiya.
Yasuu'a Tiini hindi y'at
12 Tulhaytooh baraah Beetaaniyaay giigiinihoob,
Yasuu'a yharaagw.
13 Yasuu'a sagi mhiinii tiini hindiit raat rhiya.
M'ariit hooy ammarri miyaadiib dehaay eeya.
Laakiin tiini hindi akay tamamtiina baabari rhiya.
Whindi mibsheekwti doorooh kiiki.
14 Yasuu'a whindii dehaay,
<<Shaawti door han tak firaay hook tami kiidi!>>
idiit whindi y'at.
Tikwiriya een bareeh hooy imaasiwna.
Yasuu'a b'iishraana W'ankwanaay gawii isfar'a
15 Algudus iktimnihoob,
Yasuu'a W'ankwanaay oogaw shuumiyanihoob,
oodehay ib'iishraana W'ankwanaay gawii mhaltiib badooya.
Oodehay imhallaga iibdil titarabeesa hooy ib'as,
baliib eekilay iidlab han titarabeesa hooy ib'as.
16 Yasuu'a tak gaal han naat yaksaab,
W'ankwanaay gawii hasamiib ishaab kiiki.
17 Yasuu'a <<Een ibhali uukitaab diyaabu,
<Ugawu sileelti gawu baakaay,
ib'iishraati mhiin kiiki.>
idyaabu.
Laakiin baraakna igwiharaay amar tikwaasna.>>
idi.
18 B'eebka Yasuu'a W'ankwanaay ugawiib allami.
Ifagiiriya had'aawwa,
udiini koojaawwa,
wari idehayi suurkinaawwa,
Yasuu'i madar yhariwna.
Laakiin barooh gwida dehay areeyiin akay winneet irkwiin.
19 Whawaad idwilihoob tumadiinaatii giigiyaan.
Utiini hindi balamiya
20 Tikwiriya fajir tooyin tumalya hasamiyaanihoob,
been utiini hindi kassuuh igadam ookiik balama rhiyaan.
21 Butroos Yasuu'iib ibhali sh'iya malya,
<<Seednaay!
Whindi baruuk t'ateeb balamiya.>>
idi.
22 Yasuu'a <<Ukwaasana aamanaana!
23 Oosdik andi hookna,
Ukwaasana aamanteeneek,
baahasiikna,
oon oorba <Fitakaat ubhariib yakaa!>
tiyadneek,
eemsiiw hookna.
24 Ani oosdik andi hookna,
kastooh baraak sileeliit hooy tehariwneet toona w'iimaan tibariineek timeerna.
25 Baraak sileelteenihoob,
naat gaat taki kehii tibariineek afooyaana.
Baabuukna tibireeteeb eefeeb han tumaagtookna afooyiini.
26 Baraak warib bat'afooyayneek,
baabuukna tibireeteeb eefi han ka'afooyi hookna.>>
idi.
Yasuu'i tehad'aayi araatamamiya
27 Baraah masi Algudus eeyaan.
Yasuu'a W'ankwanaay gawiit footeeb hiireeree,
ifagiiriya had'aawwa,
udehayi suurkinaawwa,
udiini koojaawwa bariiyooh dehaay eeyaan.
28 Baraah <<Sooyaa hoon!
Naat had'aayeetii teen teena saktaa?
Aaw aree tehad'aayi yhii hook?>>
idiin.
29 Yasuu'a bareeyooh dehaay,
<<Ani han bareekna gaana raati hookna andi,
beet sooyaanaheeb!
Malya ani baliit teena kak amriyeeb sooyi hookna andi.
30 Yuhannaab umoosana umaasiit had'aayi aaw yhii?
W'ankwana tibireeteeb eefeeb kiiki han,
hana uudehay hiiyyaabu?
Sooyaanaheeb!>>
idi.
31 Baraah taktak bhaliisamiyaan,
<<Beet toona Yuhanna W'ankwana yhii niyadee dehaay ka'adgirna.
Een niyadeek,
aflaay <Naanhooy aamanaab kitteena?>
iyaad hoon indi.
32 Malyaab <Beet tehad'aayi udehayii miraabu> niyadee dehaay han ka'adgirna.>>
idiin.