Eed'arwa Ifadag
10
Malya Yasuu'a been oomhiin hooy giigiya.
Uurduni bhari geebii Yahuudaay whaash hadiit idif.
Shaawti barooh gwida dehay dehaay eeyaan.
Yasuu'a suureetooh t'a han oodehay agriisiya.
2 Fariisi Yasuu'ii dehaay eeyaaniit barooh jarrabiyaan,
<<Tak takatooh fandiigeet tuuna halaalu?>>
idiin.
3 Yasuu'a <<Muusa naan waseeya hookna?>>
idi.
4 Baraah <<Muusa <Tak takatooh fandiigeek fadageet waragt dehaay kantiib.>
idi.>>
idiin.
5 Yasuu'a <<Bareekna igin'aayaakna akraaba akay Muusa toon toona dehookna iktib.
6 Ukwaasana tuduniya manooyaneekka kwaabwa rabaabwa akay manooya.
7 Toon toonaati sabbii,
uutak ifarooyeeh ishtiit takat ind'iir.
8 Uutakwa tutakatwa gaal bashar ikatiin.
Maloob kii'akeen,
gaal bashar ikatiin.
9 Aflaay Ukwaasana simarriyaab ikatiyeet toona W'aadami kiisifateha.>>
idi.
10 Oogaw shuumyaanihoob,
tikwiriya Yasuu'a beet tuuna naan tiiktiyeeb raatiyaan.
11 Baruuh <<Tak takatooh fidigtiit,
weenaati d'ar shingiraanaatu.
12 Fiduugiit takooh fidagtiit,
weer tid'iireek han shingiraanaatu aree akraat maagnaaytu.>>
idi.
Yasuu'a y'ar idabalooya idehar
13 Dehay gali y'areeh idibilooya isidehirni jillaay Yasuu'ii dehaay haay eeyaan.
Laakiin tikwiriya bareeh idaaninna.
14 Yasuu'a een rhiyanihoob yhasi,
<<Y'ar aneeb beeti hassaana,
baa'afiina!
Uudehay een y'ar t'iiteeb Ukwaasanaayt tehad'aayeeti kinaaya.
15 Oosdik andi hookna,
Ukwaasanaayt tehad'aayi een y'ar idibilooya t'iiteeb akay gabbalami bitdiineek,
shuumi kitdiina.>>
idi.
16 Yasuu'a y'ar y'aroori kehii isoos'a,
y'ayeeh kehii daasiyaayt idehar.
Ootak ugabaanaay mitaal
17 Yasuu'a usalal abkee,
tak dehaay dhaabiya.
Baruuh suurii ignafaayt aree,
<<Seedna udaayi!
Naan sakanyeek umidhhan udaayim amarri?>>
idi.
18 Laakiin Yasuu'a <<Udaayi naanhooy tindiyaheeb?
Udaayi Ukwaasana oongaalu.
19 Baruuk tiwasi tikteena:
baadira,
baajikina,
baagwihara,
gwisreet badeha baabideha,
baatilisa,
baabookwa deetookwa haamooyseha!>>
idi.
20 Uutak <<Teen tiwasi kasteeh ani dibilu oor iiktiyi door haay shagaami.>>
idi.
21 Yasuu'a idwilaayt ootak ishbib aree barooh areeya.
Malya <<Gaana masi hook nakwistu,
kassooh oomraay utibariyeeb daalbaat,
malyaab imhallaga oodehay whargwaab hiiyya!
Baruuk tibireeteeb miraay imaar tindiya.
Beenaay har'ii aneeb ramaheeb!>>
idi.
22 Uutak een ibhali imaasiwihoob,
winneet gaba takuuyt,
akraab gadaba giigiya.
23 Yasuu'a har'a nakamiyaayt tikwiriyaatii dehaay,
<<Oodehay igabaab Ukwaasanaayt tehad'aayeeti shuumti dehaay akraatu.>>
idi.
24 Tikwiriya een ibhali winneet isgaribna.
Yasuu'a masi <<Y'araanay!
Ukwaasanaayt tehad'aayeeti shuumti akraabu.
25 Uudehay igaba Ukwaasanaayt tehad'aayeeti shuumtiika,
kaam kansuubeetiit til'iitii whassiti laamakaabu.>>
idi Yasuu'a.
26 Baraah masi ajjabamiyaan,
<<Aflaay,
kak umidhhan nimeeree dehaay adgirnay?>>
idiin.
27 Yasuu'a masi bareeh ishbibaayt,
<<Naat gat Ukwaasana baakaay uudehay bii'adgirayneet eefeen,
laakiin Ukwaasanaay dehaay laamaata.>>
idi.
28 Butroos yakiyaayt,
<<Hinin kastooh tuduniya ningad nid'iit,
barook aram nikatiyeet toona baabaadhina!>>
idi.
29 Yasuu'a <<Oosdik andi hookna,
tak gawooh,
tari isanaayeeh,
tari tikwaateeh,
tari ifarooyeeh,
tari y'areeh,
tari whaashooh usakana udaayiinaay jillaaywa anii jillaaywa in'iish,
30 gwidaana rayiimi indi.
Been tooy sheeb haddi gawaabwa,
sanaabwa,
kwaatwa,
arwa deetwa,
daawri haashwa imaar indi.
Door han amaag itweeri.
T'aakharaatiib laakiin umidhhan udaayim imaar indi.
31 Gwida dehay oont'a suurii eefeen har'ii daayi iyadna,
uudehay oont'a har'ii eefeen suurii daayi iyadna.>>
idi.
Yasuu'a mhaya door tuyattooh sooyiini
32 Baraah Algudus iibiin,
Yasuu'a dabaama iifi.
Tikwiriya winneet isgaribna,
bareeh iitram uudehay han irkwiin.
Malya Yasuu'a tikwiriya itamna malu eebhat iiyhaayt,
naan dehaay iikti tindiyeeb sooya.
33 Yasuu'a <<Oont'a Algudus beeti giignay.
W'aadami Oor udiini koojaawwa yhad'aawwa sallamami indi.
Oodehay igirbaab nuuniit ituudaar indi.
34 Haay kashiin iyadna,
malyaab maag waraayiit,
kehii tifiin iyadna.
Barooh thaab'iit iidirna iyadna.
laakiin mhayt yinaati har'ii,
tooyattii yaki indi.>>
idi.
Yaaguubwa Yuhannaawa Yasuu'iib naat yhariwna
35 Yaaguubwa Yuhannaawa Sibeedii y'ar Yasuu'a dehaay eeyaan,
<<Seednaay!
Naat hook nhariw dehoon faaysaa.>>
idiin.
36 Yasuu'a <<Naan dehookna faaysani,
naan tehariwna?>>
idi.
37 Baraah <<Umatuuniyook door,
hinin gaal maygwadiyook ooraaw tarhagwadiyook soos'a hoon!>>
idiin.
38 Yasuu'a bareeyooh dehaay,
<<Baraak toona tiraatteeneet kitkanna.
Ani gw'anyeeb ookaas gw'iteena?
Adgirteena?
Tari ani atoomsaab akatyeenaayt atoomsaabaana?>>
idi.
39 Baraah <<Awooh adgirnay!>>
idiin.
Yasuu'a masi <<Baraak ani gw'anyeeb ookaas gw'iteena,
ani atoomsaab akatyeenaayt atoomsaabaana,
40 laakiin oodar umaykwaay tari oodar utalhaay deha isoos'i aneeb kaaki.
Toon toona W'ankwana dan'i.
Aan imhiinan been oodehay udehaay amaarnaay mhiinana.>>
idi.
41 Tikwiriya itamin aaraw een ibhali imaasiwnihoob,
Yuhannaawwa Yaaguubi geebwa winneet yhaseen.
42 Yasuu'a bareeh waliikiyaayt,
<<Baliin uudehay igirba yhad'a itoosiim oodehayi kehii yhad'aneet toona areeyeen.
Isuurkinaayaah aree oodehayi kehii akriri shaga daayeen.
43 Laakiin baraakna bareeh t'iiteeb kitteena.
Bareesookna umatuun harriiwka eeraw shagaamiini,
44 isuurkinaamti harriiwka eerawi kishiya ikati.
45 W'aadami Oor uudehay bariiyooh dehaa shagaameeni jillaay y'aab kiiki.
Laakiin baruuh oodehay shagaamiinyee dehaaywa bareeyooh jillaay ishuukeeh nuuniinyee dehaaywa y'aabu.>>
idi.
Yasuu'a Bartiimaa'iyoos whamashay mheeliya
46 Yasuu'aawwa tikwiriyaawwa Ariihaab ibeen.
Baraah giigaa iidni door,
gwida dehay har'ii yakiyaan.
Tak hamashay Bartiimaa'iyoos iidneeb n'aaliigaab usalaliib oodehay iin'al iifi.
Baruuh Tiimaa'iyoosi oori.
47 Yasuu'a Naasiraay y'aabi diyee imaasiwihoob,
tageega hisii waliikiya,
<<Yasuu'a,
whad'a Daawidi oor,
arhamaaheeb!>>
idi.
48 Uudehay Yasuu'i suurii sakiin,
<<Hiss akaa!>>
idiiniit idaaninna.
Laakiin baruuh winneet masi waliikiya,
<<Whad'a Daawidi oor,
arhamaaheeb!>>
idi.
49 Yasuu'a ingadaayt gwadinee dehaay,
<<Ootak whamashay haay m'aana!>>
idi.
Baraah ootak waliikiyaan,
<<Abshir,
m'aa!
Baruuh waliikiya eefi hook.>>
idiin.
50 Uutak whalaakooh igidaayt fafaree Yasuu'ii dehaay eeya.
51 Yasuu'a <<Naan harriiwa?
Naan dehook adan'i?>>
idi.
Uutak whamashay <<Seednaay!
Ani rhanyeet toona aharriiw.>>
idi.
52 Yasuu'a utakii dehaay,
<<Aflaay giigaa!
W'iimaanyook sabbii igw'adaak in'irna.>>
idi.
Uutak shaawti willa aagw'ad rhiyaan,
malya Yasuu'a iram.