9
Masi Yasuu'a <<Oosdik andi hookna,
oon oomhiin ingadiin udehayii gali ayaab baakaay,
Ukwaasanaayt had'aayi akrireesooh rhi iyadna.>>
idi.
Yasuu'iib umatuun usidkiib
2 Yasuu'a asagwit yinaati har'ii,
Butrooswa,
Yuhannawa,
Yaagoobwa iiyhaayt,
hadooh ikeeniit oorba reewiyaan.
Oont'a bareeyooh suurii aafiir gayyaramyaan.
3 Yhalaakaayaah utalaw t'iiteeb eeraab ikeen.
Een bareeh t'iiteena eeraanaayt tuduniyaatiib tuukna kitehaay.
4 Beentooy aree Muusaabwa Eelyaawwa bareeyooh dehaay lawiyaan.
Baraah Yasuu'a infaraadna.
5 Butroos <<Seednaay!
Oon oomhiin daanayeet tuuna daayiit kitti han?
Mhay gawa niid'ir,
gaal bariiyook dehaay,
weer Muusaay dehaay,
weer aree Eelyaay dehaay.>>
idi.
6 Bareeh winneet mirkwaay dehaay dhibaa iifi akay Butroos naan iideeb kiikan.
7 Malya b'aluuk eeyaayt,
bareeh kasseeh ikwibis.
Oon ub'aluuki hiss eeya,
<<Uun baruuh w'ooru ani areeyanyeebu.
Baruuh indiyeeb ibhali sinaakirna!>>
idi.
8 Tikwiriya gaalhoob nakamiyaanihoob,
Yasuu'a ookina akay rhiyaan.
9 Baraah oorbaay itkwibirni oodoor,
Yasuu'a W'aadami Oor tuyattii yakiiniyeeb ookiik beet toona tak han biisooyayneet toona hooy yhariw.
10 Tikwiriya toon toona idibiin tak han sooyaab kiikeen.
Laakiin taktak raatiyaan,
<<Tuyattii yakiiniyeeb ookiik.>>
indiyeeb naabhaliya imsiyoodaayna.
11 Tikwiriya Yasuu'a sakanaayaan,
<<Oodiini kooja awwal unabi Eelya ibakii y'iiniyeet toonaati naanhooy iyadna?>>
idiin.
12 Yasuu'a bareeh <<Oosdik andi hookna,
Eelya awwal y'iini,
malya naatka ishiishboobi.
Uukitaab laakiin <W'aadami Oor ibakii winneet lhamiini,
uudehay barooh eeribna.>
diyaabu.>>
idi.
13 Laakiin ani andi hookna,
Eelya y'aabu,
baraah naatka abyeeh yhariwneet toona sakiyaan.
Tuun batuuh iktabeeb kataabtu.
Yasuu'a jin hooy iifiini oor mheeliya
14 Tikwiriya eeraw hadiit y'agarnihoob,
gwida dehaywa udiini koojaawwa ammarariya amgwassaaree rhiyaan.
15 Uudehay kassuuh Yasuu'a rhiyaanihoob winneet imhaniit isgaribna.
Malyaab barooh salaamiini jillaay dhaabee dehaay eeyaan.
16 Yasuu'a bareeh raatiya,
<<Naanaatiib timgwassiirna?>>
idi.
17 Oon udehayii tak gaal igwibi,
<<Seednaay!
Uun baruuh ani oor gaalaalaayu.
Barooh shibiba!
Jin ibhali yhabiin,
18 Aajin hooy daayeenihoob,
whaashiib dhibseen.
Uuyaf hibibt eetfiif,
aakwiri taktak eeth'ana,
malya balamiini.
Tikwiriyaatiyook dehaay,
<W'oor eejin hooy fir'ana!>
adiyeek han,
laakiin adgiraab kiikeen.>>
idi.
19 Yasuu'a <<Baraakna amseeneeb uudehay w'iimaan baabariin!
Ani naadoor hadiit geebookna daayani?
Naadoor hadiit bareekna atfayiik?
Yhaa!
W'oorook haay m'aa!>>
idi.
20 Aflaay w'oor haay eeyaan.
Aajin Yasuu'a rhiyaanihoob,
w'oor kassooh katatsiyaan.
W'oor whaashi kehii dhibiyaayt irgas.
Hibibt ifaf.
21 Yasuu'a w'oori ubaaba raatiya,
<<W'ooruuk nhoobeeka bak lhaabu?>>
idi.
Uutak <<Baruuh dabaloob iikti dooriika lhaabu.
22 Aajin gwida had madar yhariwna.
Door yameeb,
door n'eetiib dhibsiin.
Baruuk naat adgirtinyeek,
dehoon n'akw manaaya,
shama hoon!>>
idi.
23 Yasuu'a ootakii dehaay,
<<Baruuk adgirtiniyeek naanhooy tindiya?
W'iimaan ibariib ootak naatka dehaay madaati.>>
idi.
24 W'oori baaba <<Ani iimaan abari,
w'iimaan gwidaakaab aharriiw,
baruuk hooy shamaheeb!>>
idiit hooy yhariw.
25 Been oodoor Yasuu'a oodehay willa ammarriya rhiya,
<<Aajin baraak y'angwilaya,
igilluusya!>>
idi.
Eejin idaanin,
<<Ani sooyani hookna!
Willa hooy fir'ana!
Malya shaawti dehaay baa'agaarna!>>
idi.
26 Aajin w'oor whaashi kehii dhibsiyaaniit irgisna.
Malyaab hooy ifir'ana.
Laakiin w'oor toona t'ayaat isit'iina,
gwida dehay <<W'oor iya.>>
idiin.
27 Yasuu'a w'ayi y'abik asa isingad.
W'oor iragadaayeesooh asa ingad.
28 Yasuu'a oogaw shuumiyani har'ii,
tikwiriya hadooh iiktiinihoob,
tikwiriya Yasuu'a raatiyaan,
<<Hinin eejni mhalti naanhooy adgiraab kinki?>>
idiin.
29 Yasuu'a <<Een t'iiteeb eejin,
sileelt nuun weena kitfir'a.>>
idi.
Yasuu'a malya door tuyatooh sooyiini
30 Been oomhiin hooy giigiyaan,
Jaliilee hasamiyaan.
Yasuu'a baraah iifiineeb oomhiin uudehay iikanneet toona hariwaab kiiki.
31 Yasuu'a tikwiriya agriisi,
<<Een ibhali ugin'iyookna hooy d'iina!
W'aadami Oor dehayi ayeeb nuunami indii,
idaar iyadna,
mhay imb'eeyi har'ii laakiin yaki indi.>>
idi.
32 Laakiin tikwiriya een ibhaliyeeh afhamaab kiikeen.
Iraatamti irkwiina.
Aaw fagarkaabu?
33 Yasuu'aawwa tikwiriyaawwa Kafarnaahuum ibeen.
Oogaw shuumiyaani door Yasuu'a bareeh raatiya,
<<Usalaliib naan timsiyoodaayna?>>
idi.
34 Tikwiriya tim ikeena,
amgwasuuraab aree eebtik daaya iifi.
Baraah <<Hineeb aaw hoon fagarkaabu?>>
iidna.
35 Yasuu'a is'a aree Tikwiriya itamna malu waliikiya,
<<Uutak udehayi daba ikatiyeet toona harriiw,
ibakii kasseeyooh agiya ikati.
Kishiyaab ikatika eeraw shagaamiini.>>
idi.
36 Baruuh dis oor yaksiyaayt bareeyooh bitik isingad.
W'oori ayi y'abikaayt,
bareeyooh dehaay,
37 <<Oon w'oor aniib oosmii agbiliiniib,
aneeb han agbiliyaheeb.
Aneeb agbiliiniib,
aneeb kaa'agbiliya laakiin aneeb diigwatiyaab agbiliini.>>
idi.
Ashooyoon baakaay geeboon eefi
38 Yuhanna Yasuu'ii dehaay,
<<Seednaay!
Oosmiisook eejin iifir'a tak rhinaneek,
baruuh hinee kiiki akay beet toona nhabi.>>
idi.
39 Laakiin Yasuu'a <<Baahabiina!
Ani simii m'uujisaat shagaamiiniib,
malya maagnaayt hineeb kahadiidiya.
40 Baa'ashooshamayuun,
hineebu geeboon daayiini.
41 Oosdik andi hookna,
tak gaal aniib oosmii yam gw'asiinyuukna,
baraak Umasiihiibaana akay,
w'ijrooh kakwidhistaana.>>
idi Yasuu'a.
Maagti kina sooyiini
42 Yasuu'a <<Een aniib y'araw idabalooya maagnaayt sakistiika,
baruuh t'alaatiyooh riiyhaati awi hakwiriit,
ubhariib dhibiiniyeek hanyiis.
43 W'ayook maagnaaytiib dan'iyeek kit'a,
malu ayi barii toon'i daatiniyeenaatiika,
gaal ayi barii umidhhan marriyeek dehook hanyiis.
44 D'oobwa n'eet baayaaytwa eefeen.
45 Uragadook maagnaaytiib haay saktinyeek hook kit'a,
malu ragada barii toon'i daatinyeenaatiika,
gaal ragadii umidhhan marriyeek dehook hanyiis.
46 D'oobwa n'eet baayaaytwa eefeen.
47 Ugw'adook maagnaayt haay shambiibeek hook thawsa,
malu gw'adee n'eet daatinyeenaatiika,
Ukwaasanaayt had'aayi gaal gw'adii shuumtinyeek dehook hanyiis.
48 D'oobwa n'eet baayaaytwa eefeen.
49 Gaalka n'eetii miilak d'ami indi.
50 Umiilak daayiibu.
Laakiin uud'aam hooy giigiinyi door,
kak uud'am malya dehaay it'agiir?
D'am d'iina,
taktakee dehaay shiboobna,
um'asgiib kwiriina!>>
idi.