Yasuu'a fadhig alfaab dehay m'ariit tamisiya
8
Beenhoob gwida dehay Yasuu'ii dehaay immararaayna.
Baraah m'ariit tamiineet kiibariin akay,
Yasuu'a tikwiriyaatooh waliikiya,
2 <<Ani oon udehayii dehaay n'akw manaayani.
Baraah mhayt yiinaateeka ani geeb eefeen,
m'ariit naat han kiibariin.
3 Ani bareeh hargwaa igawaayeeh astoobiyeek,
gali bareesooh sagi mhiinii y'aaba akay,
usalaliib dhadhibiin iyadna.>>
idi.
4 Tikwiriya <<Oon umingaayiib oodehay kassooh gabseen hadhi kak nimeer?>>
idiin.
5 Yasuu'a <<Baraak naaka hadhi tibariina?>>
idi.
Baraah aree <<Hinin asarama hadhi nibari.>>
idiin.
6 Yasuu'a oodehay <<S'aana!>>
idiit har'ii,
yhadhi y'asarama yakisiya,
W'ankwana yhamidaayt yhadhi ikit'a.
Tikwiriya nuuniyaayt,
<<Oodehay hiina!>>
idi.
Baraah yhadhi udehayiib islaawiwna.
7 Tikwiriya masi shalik aashoob dadis geeb iifiin.
Yasuu'a dehaay idehar,
tikwiriya y'aashu oodehay iyawneet toona hooy yhariw.
8 Uudehay tamiyaani gabiyaan.
Malyaab tim'ariitii mhiyaab ifirkak yakisiyaaniit asarama biileeb hooy toobiyaan.
9 Uudehay fadhig alfa iiktiin.
Malya Yasuu'a bareeh giigisiya.
10 Baruuh tikwiriyaati geeb tufalluuka y'am.
Dalmaanuuta ittiyoodi haash hadiit giigiya.
11 Ifariisi eeyaaniit Yasuu'a raatiyaan.
Barooh jarrabtiib yhariwna akay,
alaamaat tibireetee hooy raatiyaan.
12 Yasuu'a <<Aan baraakna amseeneeb uudehay,
naanhooy alaamaat tehariwna?
Oosdik andi hookna,
uun uudehay alaamaat ittiyiwni kiidiina.>>
idi.
13 Malya baruuh y'ish giigiya,
tufalluuka hadiit y'agar.
Oodar ooraaw beeti giigiya.
Ifariisiiwwa Heeroodisiiwwa whamiir
14 Tikwiriya hadhiib yaksiineet toona ibaadhinna.
Gaal hadhi oobhaat tufalluukaatiib iibriin.
15 Yasuu'a tikwiriya infaraadi,
<<Ifariisi hamiirwa Heeroodisiib whamiirwa ugin'ookna hooy d'iina!>>
idi.
16 Baraah toon toona taktaki geeb bhaliiyaan,
<<Hadhiib kinbari akay een indi han?>>
idiin.
17 Yasuu'a baraah bhaliisamiineet toona ikan.
Bareeyooh dehaay,
<<Naanhooy bak teekwinna?
Baraak hadhiib kitbariin akay een diyaab kaaki.
Igin'aayaakna oon hadiit hakwara?
Kaa'afhamtaana han?
18 Igw'adaakna karhitaana han?
Y'angwilaakna kiimaasiwna han?
Kash'ataana han?
19 Oodehay y'ay alfaayee dehaay yhadhi y'ay akit'ihoob,
baraak naaka biili atab yakistaana?>>
idi.
Tikwiriya <<Tamna malu biili.>>
idiin.
20 Yasuu'a han <<Ani fadhig alfa dehayii dehaay asarama hadhi akit'ihoob,
yhadhiyi firkak naaka biili hooy titibna?>>
idi.
Baraah <<Asarama biili nitib.>>
idiin.
21 Yasuu'a <<Baraakna masi ka'afhamtaana han?>>
idi.
Yasuu'a tak hamashay Beetsaydaay mheeliya
22 Baraah Beetsaydaab beeti eeyaan.
Dehay tak hamashay Yasuu'ii dehaay haay eeyaan.
W'ayooh oon ootaki kehii daasiyeet toona hooy yhariwna.
23 Yasuu'a ootak w'ayi y'abikaayt udehayii haay isgi.
Malya utaki gw'adi kehii tifiya,
y'ayeeh kehii daasiya.
Yasuu'a ootakii dehaay,
<<Naat han rhitniya?>>
idiit raatiya.
24 Uutak <<Oodehay whireeriini yhindi t'iiteeb akay rhani.>>
idi.
25 Yasuu'a masi y'ayeeh utaki gw'adi kehii daasiya.
Shaawti uutak daayiib rhiya,
suureet aagw'ad y'agarna naatka rhiiniib iki.
26 Yasuu'a ootak <<Ugawook bayaa,
laakiin tugariyaatook baashuuma!>>
idi.
Yasuu'a aabu?
27 Yasuu'aawwa tikwiriyaatuuhwa Kaysariya Filiib ittiyoodi haash ibeen.
Yasuu'a usalaliib tikwiriya raatiya,
<<Udehayi r'ayeeb,
ani abu iyadna?>>
idi.
28 Tikwiriya <<Uudehay gwadi,
<Yuhanna umoosana.>
iyadna hook.
Wari <Unabi Eelyaabwa> iyadna hook.
Wari <Een inabiya eerawee gaalu.>
iyadna hook.>>
idiin.
29 Yasuu'a <<Bareeyookna ir'ayeeb aree ani aabu tiyadna?>>
idiit raatiya.
Butroos <<Baruuk Umasiihiiwwa.>>
idi.
30 Yasuu'a baraah beet toona gaal han biisooyayneet toona hooy yhariw.
Yasuu'a tuyatooh whankaay hadiidiya
31 Yasuu'a <<W'aadami Oor ibakii winneet gwidaat lhamiini,
ibakii y'eegrimaawwa,
ifagiiriya iwawinwa,
udiini koojaawwa eeribna.
Baruuh ibakii itoodiir,
oomb'i umhaya aree yakiini>> idi.
32 Shaawti Yasuu'a bareeh een ibhali kassaah maasiwee hadiidiya.
Butroos Yasuu'a haay itfalaayt,
<<Een ibhali baadiya!>>
idi.
33 Yasuu'a nakamyanihoob tikwiriya ishbib.
Malya Butroos idaanin,
<<Hoosu giigaa!
Baruuk uubliis!
Udehayiit na baakaay Ukwaasanaayt na ugirmaay kitbariya.>>
idi.
34 Yasuu'a kassooh oodehayii dehaaywa tikwiriyaatii dehaaywa <<Uutak ani kwiriya ikati,
ibakii ugarooyooh ishti dan'ii,
malya ibakii usaliibooh yaksiit eetriimheeb.
35 Uutak ugarooyooh midhhan harriiw,
ugarooyooh kwidhshiini.
Uutak umidhhanooh anii jillaaywa usakana udaayiinaay jillaaywa kwidhsiini aree ugarooyooh ishidhhani.
36 W'aadami tuduniya kastooh marriyeek,
laakiin ugarooyooh eetniiweek,
naan rayiimiini?
37 Ugarooyooh marriyee dehaay naan iniiw?
38 Uun uudehay ikeefriiwwa tumaagnaay shagaameenwa,
aneebwa ibhaliyeesoowwa sankw'aneek,
W'aadami Oor han umatuuniyoohwa ubaaba Ukwaasanaay umatuuniibwa,
imalak itageegaayi matuuniibwa y'iiniyihoob,
been oodehay hooy iisikw'a indi.>>
idi.