Tunajaasaawwa tutahaaraawwa
7
Ifariisiiwwa wari diini daawwa Algudusee eeyaaniit,
Yasuu'ii dehaay immarraayna.
2 Yasuu'iit tikwiriyaatii gwadi y'ayaah najjasama tari shigwidhaab baakaay m'ariit tamee rhiyaan.
3 Ifariisiiwwa kassaah Iyahuudiiwwa suur y'ayeehna hankaab baashagwiidh m'ariit katamiyaan.
Beet tuuna yooba iid'aneet aadaata.
4 Usuugii it'igirnihoob baashaagwiidh naat han katamiyaan.
Gwidaana weena yhooba kwasaamaab iiktiineena han tiifi.
Tikwibbaywa,
ibarradwa tim'ariitiit teedaawwa iishgwadhna.
5 Ifariisiiwwa idiini daawwa Yasuu'a raatiyaan,
<<Tikwiriyaatuuk hoobaan iid'aneet toona naanhooy kiid'iin?
Baraah y'ayeehna baashaagwiidh m'ariit tameen.>>
idiin.
6 Yasuu'a <<Unabi Iish'aaya bareeyookna hadiidiyaneeb ibhali sidika ikatiin.
Baraakna uumshuush,
aan baraah ooktaabiib eefeen:
<Aan baraah iyafaayee aneeb yhamidna,
igin'aayee laakiin winneet sagiiba.
7 Aneeb anbiid kwidhiib eefi.
Dehay d'iyaab ikatiyeet aadaatee allameen.>
indi uukitaab.
8 Baraak Ukwaasanaayt tiwasi ishtiit,
udehayiit aadaatee shagaamteena.
9 Baraak Ukwaasanaayt tiwasi ishtiit,
abyeekna d'iyaab tikatiini t'aliim tisnaakiirna.
10 Unabi Muusaa <Baabeekwa deeteekwa hamooysehaana!
Ubaabaawwa toondeewwa amaag iwari,
amaagt yat iyaayi.>
idi hookna.
11 Laakiin baraak Ifariisi,
tak ifarooyeeh dehaay,
<Baraak anii timarriineet tushamaam,
ani Ukwaasanaay dehaay miyaaw akay afir'a> tiyadna.
12 Een bareeh ifarooyeeh biishaamneet toona tisehariiwna.
13 Ukwaasanaay ibhali abyeekna d'iyaab tikatiineet aadaatee tibadilna.
Weena gwidaat amaagt han,
toon t'iiteet shagaamteena.>>
idi.
Oodehay naan yiwaashiistini
14 Yasuu'a shaawti oodehay kassooh waliikiya,
<<Aneeb maasiiwna,
een ibhali daayiib kanna.
15 Naat han barraay y'iit tak kayiwaashiista,
laakiin udehayii titfar'i tuuna oodehay yiwaashiistini.
16 Angwil haay eemsiiwi ibariib uutak maasiwna!>>
idi.
17 Yasuu'a udehayii giigiyaayt oogaw shuumiyanihoob,
tikwiriya barooh een eemtaal baruuh iideeb raatiyaan.
18 Yasuu'a <<Baraak han afhamaab kitteena han?
Oodehay barraay dehaay shuumtiniit tuuna kawiwaashiista.
Beet toona kitkanna han?
19 Batuuh igin'aayeeb kashuumta,
laakiin oof'iib shuumiit malya ubasharii titfar'i.>>
idi.
20 Yasuu'a masi <<Udehayii titfar'i tuuna oodehay yiwaashiistini.
21 Udehayiit hooytee igin'aayee titfar'i t'amaag niya malyaab toogwiharwa,
imadarwa,
warit maagnaywa w'aakharuuh ikati.
22 Jikuunwa,
w'akuushwa,
w'amaag niyaawwa,
aagwisirwa,
tehasaadaawwa,
uuneewwa,
italasaawwa,
uukwibirwa,
whaaleewwa udehayi gin'aayee itfar'ana.
23 Kastuuh tuun tuumaag udehayi gin'aayee fir'iit malyaab yiwaashiistini.>>
idi.
Takati iimaan
24 Yasuu'a been oomhiin hooy giigiya,
tumadiina Siidoon dawil mhiin beeti ibi.
Beentooy gaw shuumiya,
uudehay iikanneet toona hariwaab kiiki.
Laakiin iikwibiseet toona han adgiraab kiiki.
25 Takat ootooh jin hooy daaya iifiineet tiifi.
Yasuu'a been oomhiin y'aab iiktiyeet toona timaasiw.
Batuuh eetaayt,
Yasuu'iib iragadaayi whii whaashiib dhibta.
26 Tutakat Yasuu'iib winneet tehariw,
<<T'ootu eejin hooy fir'a!>>
tidi.
Tutakat Suuriyaay eefi haash Fiiniisyaay faraaytu,
laakiin batuuh Yoonaaniitu.
27 Yasuu'a batiiyooh dehaay,
<<Awwal inisrika m'ariit tamsaana aree gabsaana.
Inisrikaayi hadhi eeyas tiyawneet tuuna daayiit kitti.>>
idi.
28 Tutakat <<Awooh Seednaa,
laakiin aayas tutarabeesaati whii eefeen han inisrika dhibseeneet tim'ari tameen.>>
tidi.
29 Yasuu'a tutakatii dehaay,
<<Giigii!
Een ibhaliyi jillaay aajin t'ootiisook ifir'ana.>>
idi.
30 Malya tutakat giigtaayt igawooh t'agarihoob,
t'ootooh n'aali kehii haayee,
aajin hooy giigaab akay timiri.
Yasuu'a tak angwilaywa gilluusiibwa mheeliya
31 Yasuu'a Tiroosii giigiya,
Siidooni salalii Jaliil oobhar hadiit idif.
Timadiina titamnaati haashii hasamiya.
32 Beentooy shalik dehay tak angwilaywa gilluusiibwa dehaay haay eeyaan.
Uudehay Yasuu'a ootak w'ayooh kehii daasiyeet toona hooy yhariwna.
33 Yasuu'a ootak udehayii haay isgii,
tigiibalayteeh utaki angwili kehii daasiya,
kehii tifya,
imiidalaab aree tatehiya.
34 Yasuu'a teebiri asa ishbibaayt utakii dehaay,
<<Eeffata!>>
idi.
Eefata Iyahuudi bhaliyeeb <<Nigala!>>
miyaadi.
35 Igidiyeesooh utaki angwil ingalna,
umiidalaab ifdag,
shaawti winneet daayiib hadiidiya.