Yasuu'a Naasiraay itooraab
6
Yasuu'a beentooysii giigiyaayt,
Naasiraab hooy winaab iiktiyeet beeti tikwiriyaati geeb eeya.
2 Tuusab eetanihoob,
Iyahuudi diini gaw shuumiyaayt,
ingadt allamyeet toona yhariw.
Uudehay kassuuh barooh imaasiw winneet ajjabamiyaan,
<<Teen teena naad imriyeet naata?
Taan tim'uujisa baruuh ikwasiyeet aree naanaata?
Taan tifagarandi baruuh miraab ikatiyeet naanaata?
3 Uun baruuh whindi hashana kiiki han?
Maryamii oor,
Yaaguubwa,
Yoosifwa,
Yuudaaswa,
Sim'ooniiwwa oosan kiiki han?
Taan gwadoon eefeent teekwa kiikeen han?
Bataah bariiyooh eetehakeena.>>
idiin.
4 Yasuu'a aree shaawti,
<<Whaashiyoohwa,
udehayyoohwa,
indhiwaayyoohwa agbilama nabi kiiyhaay.>>
idi.
5 Yasuu'a beentooy gwidaat m'uujisa kwaasaab kiiki.
Shalik dehay lhaab y'ayeesooh shiishiyaay isin'ireeb baakaay,
weena d'iyaab kiiki.
6 W'iimaanyoohna naawiib ajjabamiya.
Malya Yasuu'a gaal haashii weer haash ibi.
Beentooy allami.
Yasuu'a itamna malu linguuya
7 Yasuu'a itamna malu dehoosooh waliikiya,
akraat had'aayi eejin kasseeh hooy iifir'aneet yhii.
Maloob maloob ikwaasiit aree diigwatiya.
8 Yasuu'a <<Naat gaat han usalaliib baayaksaana!
Kwoolay yaksaana nuun!
Kiis han baayaksaana!
Hadhiib baayaksaana!
Mhallagaab baayaksaana!
9 Gidh'aat nuun malya halaak baayaksaana!
10 Oogaw ishuumteeneeb beerteeneeb hadiit hooy fiinaana!
11 Uudehay bareekna eeribneek,
oomhiin ibareeyooh hooy giigaana!
Whaash iragadaayeesookna han nifishna!
Beet tuuna bareeyooh kehii badehaat iikti tindi.>>
idi.
12 Baraah giigiyaan,
oodehay W'ankwanaay dehaay it'agiirneet toona sooyiin.
13 Baraah masi gwida dehayii jin ifir'ana,
gwida lha dehay han saliitii ishmitnaka mheeliyaan.
Yuhanna umoosanaayt yat
14 Whad'a Heeroodis been Yasuu'iib usakana kassooh imaasiw.
Yasuu'iib winneet itookkaaneet toona imaasiwihoob,
naat igam.
Dehay gali,
<<Yuhanna tuyatii yakiya,
oon usabbii tim'uujisaati akrir hooy shagaameen.>>
idiin.
15 Wari,
<<Unabi Eelya lawaabu.>>
idiin.
Wari <<Inabiya ish'iyyaayee gaal ikati.>>
idiin.
16 Laakiin Heeroodis een imaasiwihoob,
<<Yuhanna ani t'ala akit'eeb tuyatii yakiya!>>
idi.
17-18 Laakiin Yuhanna suur Heeroodisii dehaay,
<<Takattook ishtiit,
usanook Filiibusiit takat Heeroodyaas tingwhiira beet tuuna shingiraanaatu.>>
idiit,
barooh idaanin.
Baruuh aree Yuhannaab whabis id'i.
19 Heeroodyaas Yuhannaab ashoosamtaayt madar tehariw,
laakiin adgiraat kitti.
20 Heeroodis Yuhannaay miirkwaay iibri akay barooh iishtam.
Yuhanna W'ankwanaay suurii nhasu,
daayi tak iiktiyeet toona baruuh iktiin.
Heeroodis Yuhanna iideeb ibhali iirbeek han,
masi barooh isnaakiireet toona yhariw.
21 Laakiin oon t'a Yuhanna atoodaari iideeb uudoor eeya.
Heeroodis uumb'i Yuhanna hooy faraay iiktiyi eeyanihoob,
gwidaat m'ari itkwiit oodehaywa isuurkinaayeehwa Jaliileeh waliikiya.
Tehikuumaati maalhi itageegaab han waliikiya.
22 Heeroodyaayt t'oor eetaayt tilag,
Heeroodiswa y'amnaayeehwa han winneet afirhista.
Whad'a Heeroodis t'ootii dehaay,
<<Toona batuuk harriiweet raatiiheeb iyaaw hooki andi.>>
idi.
23 Whad'a winneet dehaay halafooyaayt,
<<Kastooh toona batuuk harriiweet,
aniit tehad'aayi itarab tindiyeek han iyaaw hooki andi.>>
idi.
24 T'oor giigtaayt toondi raatta,
<<Ani naan barooh raatani?>>
tidi.
Tuundi <<Yuhanna umoosanaay girma harriiw!
dii.>>
tidi.
25 T'oor whad'aay dehaay t'agaraayt,
<<Ani Yuhanna umoosanaay girma hallaay m'ariitiit daabiitiib aharriiw!>>
tidi.
26 Whad'a winneet gadabiya,
laakiin y'amnaayi suurii halafooya iifi akay,
<<Kaaweer>> iidee dehaay adgiraab kiiki.
27 Whad'a igidiyeesooh gaal ikajreesooh,
<<Yuhanna umoosanaay girma kit'aat haay m'aa!>>
idiit diigwatiya.
Uutak giigiyaayt Yuhanna usijniib idir.
28 Malya oon ugirma m'ariitiit daabiitiib id'iit t'oor yhii,
batuuh aree toondi haay tibi.
29 Yuhannaayt tikwiriya toon toona imaasiwniit eeyaana.
Baraah tukinaaja imiimasha hadiit haay giigiyaaniit ibisna.
Yasuu'a ay alfa dehay m'ariit tamsiya
30 Ilinguuma ikrafni eeyaanihoob,
ishaga idaayaaneebwa,
w'allamyaaneebwa Yasuu'a sooyaan.
31 Gwida dehay oomhiin ammarriya iifiin,
m'ariit haay tamiineet fursa han kiibariin.
Yasuu'a <<Nigiya mhiin beeti gwadu m'aanaa!
Middaat fiinaana!>>
idi.
32 Aflaay baraah tufalluukaatiib nigiya mhiin geeb ibeen.
33 Uudehay bareeh giigee rhiyaanihoob,
naad iibiineeb ikanna.
Uudehay iragadaayee been oomhiin hadiit imgarraabna,
bareeyooh suurii aree oomhiin iktimna.
34 Yasuu'a tufalluukaatii igideheeb oodoor,
oodehay oogwidaab w'ammarriyaab rhiya,
akraab aree dehaay n'akw manaaya.
Baraah ooreew ikinaab anuub dehaay it'iin.
Gwidaana aree bareeh allamiya.
35 Hawaadi aay iidwilihoob,
ilinguuma Yasuu'ii dehaay eeyaaniit,
<<Uun baruuh mingaayami haashu,
hawaad aree y'aabu.
36 Oodehay aflaay gagiigsa,
tidir'aawwa,
tooy eefeen indhiwa eebiinee dehaay adgireen.
Naat m'ariit dilba iyaynee dehaay adgireen.>>
idiin.
37 Laakiin Yasuu'a bareeyooh dehaay,
<<Baraakna m'ariit hiina,
tamsaana!>>
idi.
Ilinguuma <<Oosuug dehaay giigiit,
kassooh oodehayii dehaay m'ariit malu sheeb diinaree niidlib bindiyeek!>>
idiin.
38 Yasuu'a bareeyooh dehaay,
<<Naaka hadhi tibariina?
Giigaanaat shibibna.>>
idi.
Ilinguuma ishbibniit,
<<Ay hadhiiwwa malu aashoowwa nibari.>>
idiin.
39 Malya Yasuu'a tikwiriyaatii dehaay,
<<Oodehay kal'aat kwaasnaat oosyaam isootaayi kehii soos'ana!>>
idi.
40 Aflaay baraah ay tamuun ay tamuun,
sheeb sheeb ikeeniit is'ana.
41 Beenhoob Yasuu'a yhadhi y'aywa,
y'aashu imaloowwa yaksiya,
teebiri ishbibaayt idehar.
Malya irfit id'iit tikwiriyaatooh yhiit,
udehayii dehaay y'adhidhneet toona hooy yhariw.
Masi y'aashu imalu han bareeyooh dehaay y'adhidh.
42 Kassuuh uudehay tamiyaaniit gabiyaan.
43 Malya tikwiriya,
oogaafii tamna malu biileeb itibniit yaksiyaan.
44 Been oomhiin tamiyaan aanda ay alfaaba kassaah aree tamyaaniit gabiyaan.
Yasuu'a yami kehii hiireeriya
45 Igidiyeesooh Yasuu'a tikwiriyaatooh tufalluuka reewsiya,
Beetsaydaab,
eeyam oodar ooraaw tiifiit beeti hasamiineet toona isehariw.
Uudehay giigiyeeb ookiik yhagit.
46 Baraah y'ish giigiyaanihoob,
baruuh sileelti jillaay ribaab reewiya.
47 Tehimni eetani door tufalluuka oobhari bitik tiifii,
baruuh aree hadooh inagay iifi.
48 Yasuu'a,
tikwiriya iyami bitik kak akraab imgwirhaneeb rhiya.
Baraah winneet gallabamiyaana ubaraam whiireer yhabi.
Yasuu'a kiruumaab eeyami kehii hiireeriya,
hasamee aree dehaay eeya.
49 Tikwiriya Yasuu'a ubhari kehii hiireeriyeet toona rhiyaaneeb oodoor jin hiisiyaaniit,
<<Wheeloon!>>
idiin,
mirkwaay hooy daaya.
50 Kassaah barooh rhiyaanihoob winneet akra mirkwaay dehaay dhibiya.
Willa baruuh <<W'eemaan hookna d'iina!
Uun aneebu,
baarikwiina!>>
idi.
51 Yasuu'a tufalluuka geeb reewiyanihoob,
ubaraam ingad.
Baraah han winneet ajjabamiyaan.
52 Bareeh igin'aayaah assama iifiin.
Beet toona yhadhiyeeb tikeet tim'uujisa afhamaab kiikeen.
53 Baraah oobhari dar ooraaw iktimni door,
Janeesaareet iidni haashiib hooy tikwiyaana.
Tufalluukaatooh been oomhiin yhaakwirna.
54 Baraah tufalluukaatii tikwiyaanihoob,
uudehay Yasuu'a ikanna.
55 Uudehay kasseeh yhasheeb dhadhaabiyaaniit,
Yasuu'iib usakanaab ibirirna.
Uudehay y'amshaayeeh b'adhaayi kehii yakisyaaniitka baruuh hooy eefi iidni mhiinka haay y'iin.
56 Kasseeh baruuh iibiyeeb yhash timadiina tari tigariyaateeb,
uudehay y'amshaayeeh yaksiit usalaliib dehaay daasiin.
Aan aalha Yasuu'iit whalaakiit shinki tehasiinyeet toona hooy yhariwna.
Yasuu'iib whalaakiit shinki tehiibka kassaah aree iin'irna.