Yasuu'a tak jin hooy iifiineeb mheeliya
5
Jaraasiin iidni haash,
Jaliili daraag eefeeb eeyam udarooh ooraaw iktimna.
2 Yasuu'a tufalluukaatii tikwiyaanihoob,
miimashaayee far'a tak jin hooy iifiini y'ashish.
3 Uun uutak miimashaayeeb askinaa iifi.
Gaal han aree shinshiltii yhikwiree dehaay adgiryaab kiiki.
4 Gwida door y'ayeewwa iragadaawwa yayteewwa shinshilaatee yhiikwarneek han,
teeyaywa tishinshila kat'ii,
gaal han aree kiims'abaak.
5 Whawaadwa oob'eewwa imiimashaayeebwa irbaayeebwa daayii,
<<Wheeli!>>
iid,
ugarooyooh aweeyee lhasi.
6 Uun uutak Yasuu'a sagi mhiinii rhiyanihoob,
bariiyooh suurii dhibiyaayt ignaf.
7 Winneet win hissii,
<<Yasuu'a W'ankwana Utageegaanaay Oor!
Naan hoosu harriiwa?
Ukwaasanaay oosmii halafoosani hook,
anaahook,
baalhasaaheeb.>>
idi.
8 Yasuu'a eejintaayii dehaay,
<<Utakii fir'a!>>
diyaa iifi.
9 Yasuu'a utakii dehaay,
<<Oosmook aab iyadna hook?>>
idi.
Uutak <<Hinin gwidaaba akay,
oosmu Gwidaab iyadnaheeb.>>
idi.
10 Aan aajin Yasuu'a in'alniit,
<<Whaashii baasifar'a hoon.>>
idiin.
11 Been oomhiin khansireet dirimt oorbaay ikwiir iifiin.
12 Aajin Yasuu'iib winneet hooy yhariwniit,
<<Hinin een ikhansiri shuumti nihariw,
isha d'iya hoon!>>
idiin.
13 Yasuu'a <<Daayiitu,
ikhansir shuumaana!>>
idi.
Beenhoob aajin utakii ifir'aniit,
ikhansireeb shuumiyaan.
Aan ikhansir igidiyeesooh dhaabiyaaniit,
oorba oodarooh hooy iifiinaay iyameeb dhibiyaan.
Baraah malu alfa y'iina aree kasseeh aayam iiyheen.
14 Toon toona rhiyaan ikhansireega,
willa tumadiinaawwa tidir'aawwa hadiit dhaabiyaaniit,
oon usakana udehayii dehaay hadiidiyaan.
Beet toona tutikeet eerhee yhariwna akay kassuuh uudehay ifir'ana.
15 Yasuu'ii dehaay eeyaanihoob,
ootak beeb gwida jin hooy giigaa beentooy s'ee rhiyaan.
Whaaluuh ishiboob aree halakaab akwaay akay imriin.
Uudehay aree winneet irkwiin.
16 Uudehay beet toona rhaa iifiin,
kak utakii aajin ifir'aneebwa,
in'ireet toonaawwa,
ikhansiree dehaay tikeet toonaawwa oodehay been usakana yhiin.
17 Uudehay Yasuu'ii dehaay,
<<Hinin whaashoon hooy giigaa!>>
idiin.
18 Yasuu'a tufalluuka y'amihoob,
uutak aajin hooy far'a iiktiineeb,
Yasuu'iib winneet yhariw,
<<Iitram hook andi.>>
idi.
19 Yasuu'a iribt,
utakii dehaay,
<<Eedhiweek bayaa!
W'ankwana dehook id'iyeet toonaawwa,
kak dehook ishboobeet toonaawwa dehaay hadiida!>>
idi.
20 Aflaay uutak titamin madiinaati whaash ibi.
Yasuu'a dehaay id'iyeet toona aree hadiidiya.
Uudehay kassuuh aree ajjabamiyaan.
Yasuu'a oot ayaat ishidhan aree lhaat takat mheeliya
21 Yasuu'a falluukaatii eeyami dar ooraaw beeti idifihoob,
kassuuh uudehay w'aayooh yhigitna.
Baruuh iyameeb haayee akay,
bariiyooh dehaay immararaayna.
22 Tak Yaayiirus iidni,
oodiini gawi mudiir eeya.
Yasuu'a rhiyanihoob iragadaayi whii dhibiyaayt,
23 winneet hooy yhariw,
<<Ootu dabaloot tooyat dawittu.
Anaahook awaya hoon,
y'ayeek kehii daasa,
shaawti batuuh iidhhani tindi.>>
idi.
24 Yasuu'a utaki geeb giigiya.
Gwida dehay barooh iramniit usalal yhiibna.
25 Beentooy takat lhaat,
tamna malu hawlaayeeka booy tiitfaf tiifi.
26 Tuun tutakat imhallagaayeeh kasseeh hakiimaayi mheeliib giigsaa tiifi.
Laakiin gaal han batooh mheelaab kiiki,
aree masi amaagkaat tiki.
27 Tutakat Yasuu'iib usakana timaasiwihoob,
oodehay har'iisay eetaayt,
bariiyooh whalaakiit shinki tehata.
28 Tutakat ugarooyyooh dehaay,
<<Whalaakooh tehaniyeek,
iin'ir andi.>>
tidi.
29 Igidiyeesooh uubooy hooy ingad.
Tulhanaaytii tin'ireet toona tikan,
ugarooyooh han hassiita.
30 Been oodoor Yasuu'a akrir hooy ifir'aneet toona ikan.
Udehayiib nakamiyaayt,
<<Aaw whalaaku tehiya?>>
idi.
31 Tikwiriya <<Shibiba,
uudehay kwalaleekaa hook tuusameen,
<Aaw tehiyaheeb?>
kak tindiya?>>
idiin.
32 Laakiin Yaasuu'a aab tehiyaneeb kanaant yhariw.
33 Malyaab tutakat tunaatuuh lawtaneet toona tikanihoob,
tirkwiit idhee eetaayt,
Yasuu'i suurii dhibta.
Kassooh oosdik aree barooh soota.
34 Yasuu'a tutakatii dehaay,
<<Anaa t'ootuuy,
w'iimaanuuk mheeliya hooki,
igwirhaayeek hooy n'irii,
asgaa giigii!>>
idi.
35 Yasuu'a masi bhaliiyee,
diigwat udiini mudiiri gawii eeta.
Udehayii gwadi <<T'ootuuk tiyaa,
Seednaab shaawti baagallaba!
Isha d'iyaa!>>
idiin.
36 Yasuu'a een ibhali imaasiwihoob,
udiini gawi mudiirii dehaay,
<<Baarikwiya,
aamana nuun!>>
idi.
37 Yasuu'a been Butrooswa,
Yaaguubwa,
Yuhannaab Yaaguubiib oosanwa baakaay,
dehay weer geebooh yaksaab kiiki.
38 Baraah udiini gawi mudiiri dhiwa eeyaanihoob,
kassuuh uudehay t'oor waawee,
idraayee rhiya.
39 Malya Yasuu'a udehayii dehaay,
<<Naanhooy waawteena idraateena?
T'oor diwtini nuun,
ayaat kitti.>>
idi.
40 Laakiin uudehay hooy ifaayidna.
T'ooti faroowwa bariiyooh geeb iifiinwa baakaay,
oodehay ooraaw barraab isfar'a.
T'oor tiifyeeb oomhiin shuumiya.
41 T'oor w'ayi y'abikt,
<<Taaliita,
kuumii!>>
idi.
Aan ibhali <<T'ootuun,
asa gadii!>>
miyaadi.
42 T'oor willa asa tingad hiirareerta.
Batuuh tamna malu hawla tiibri.
Toon toona rhiyaan uudehay winneet ajjabamiyaan.
43 Laakiin Yasuu'a bareeyooh dehaay,
<<Toona tutikeet gaal han baasooyaana!
T'oor naat m'ariit hiina!>>
idi.