Iteeraay mitaal
4
Yasuu'a masi ubhari dar oodehay allamiya.
Winneet gwida dehay kasseeh yhashee hooy y'aaba akay bariiyooh dehaay immararaaynihoob,
Yasuu'a uudehay guudiyaayt falluukaati kehii iyameeb ingad.
Uudehay kassuuh eeyami dar iist'ana.
2 Yasuu'a gwida mitaalee dehaay hadiidiya:
3 <<Sinaakirna!
Dir'aateega teeraayooh aduuy hariwee itfir'a.
4 Baruuh iteeraayooh teeraaya,
iteera iigidehoob salaliib dhibiya,
kilayt eeyaaniit,
iteera tamiyaan id'iina.
5 Weer teera,
aweeyi mhiin hooy dhibiyaan,
uun iteera fuutiitiyanihoob,
igidiyeesooh balamiya.
Been oomhiin shalik haash hooy iifi akay balamiya.
6 Tuuyin tifir'ihoob,
iteera gadam kiibari akay iteera balamiya.
7 Weer teera,
naweeti hooyteeb dhibiya,
laakiin tinawi geeb yakiyaaniit iskitna idirna.
Harroob haay y'aab kiiki.
8 Aree weer teera daayi haashiib dhibiyaayt,
yakiya harroob haay eeya.
Uun baruuh malya tifir'aaytuuh mhaytamuun,
asagwir tamuun tari sheeb haddi firaay haay eeya.
9 Malu angwil haay eemsiiwi ibari tak gaalka ba'iimsaw!
ba'iikan!>>
idi Yasuu'a.
Een eemtaal haay isehariiweet toona
10 Tikwiriya itamna maloowwa aarawwa baruuh hadooh ikayihoob,
aan aamtaal naan mitiyaayeeneet toona barooh sakanaayaan.
11 Yasuu'a <<Baraakna udehayiit kiitteena!
Ukwaasanaayt tehad'aayeeti usakana miraabaana.
Laakiin oodehay ooraaw ani mitaalee anfariid.
12 Aan baraah shibbee karhiyaan,
maasiwee ka'afhamiyaan.
Ukwaasanaay dehaay it'igirneek,
afoomiin.
13 Een eemtaal afhamaab kitteena han?
Eemtaal eeraw kasseeh kak afhama teeyadna?
14 Udir'aatkina Ukwaasanaay bhali teeraayiini.
15 Dehay gaal iteera usalaliib dhibiyaab t'iiteeba,
een ibhali eemsiiwna,
malya uubliis dehaay y'iini,
een ibhali igin'aayee hooy tafiini.
16 Iteera been y'aweeyi haashiib idhibiya aree oodehay Ukwaasanaay ibhali eemsiiwna,
afirha gabbalameena.
17 Laakiin w'iimaanuuh gadam kiibari akay gwida hadiit kiiyhagit.
Oon usabbii akra gwirha dehaay ikatiineek,
igidiyeesooh een ibhali willa ishti d'iit it'agiirna.
18 Iteera tinaweeti tehooyteeb idhibiya,
oodehay W'ankwanaay ibhali eemsiiwna.
19 Laakiin udamaani gwirhaawwa,
uumraaywa tuduniyaatiit nafirnaywa eetilna aree ibhali isakitna.
Aflaay bashikw firaay haay kaa'eeyaan.
20 Laakiin iteera whaash udaayiinaay idhibiya,
oodehay W'ankwanaay ibhali eemsiiwna,
gabbalameena,
gin'aayeeb ideebna.
Aan baraah gwida firaay,
mhaytamuun,
asagwir tamuun,
sheeb haddi firaay haay y'een.>>
Yasuu'a idi.
Tulambaati mitaal
21 Malyaab Yasuu'a,
<<Tak lambaat shidhhaniit daabiiti whii kadaasiya,
tari n'aali whii kadaasiya.
Laakiin tageega mhiin daasiini.
22 Kwabaasna teefiyeek itfir'a tindi,
dh'imaat teefiyeek han lawi tindi.
23 Angwil ibariib maasiwna!>>
idi.
24 Baruuh masi <<Daayiib maasiwna!
W'abaar haay tiyawneeb,
haay tittiyeewiin masi timeeshwiin.
25 Uutak naat ibari gwidakaat imaar indi,
laakiin uutak naat baabari,
tuuna t'ibariyeet han hooy giigi tindi.>>
idi.
Weer teeraay mitaal
26 Yasuu'a masi <<W'ankwanaayt had'aayi ootak iteera whaashiib inbiis tan'i.
27 Baruuh whawaadwa oomb'eewwa diwiinyeek tari yakiinyeek han iteera fuutiitiini.
Baruuh laakiin iteera kak fuutiityaneeb kiikan.
28 Tuubuur tuukna tehabba fuutiitsitni.
Malya winiit aree gangaraab tikati.
29 Wharru itbashiikwihoob,
udooriyooh y'aabuuyt minjal yaksiit inwiik.>>
idi.
Isinfaayt habbaati mitaal
30 Yasuu'a <<W'ankwanaayt had'aayi kak tan'i?
Kak aree wari geeb mit'iisani?
31 Batuuh isinfaayt habba whaashiib titoogiid winneet dabaloot t'iiteetu.
32 Tak batooh dir'aatiyooh y'adiit yaktaayt,
win hindi tikaayt aakilay kehii askinyaan.>>
idi.
33 Yasuu'a oodehay W'ankwanaay bhali allamiyee dehaay gwida mitalee daayiib afhamiineeb ookiik afhisi.
34 Mitaal anu naat han dehaay kahadiidiya.
Laakiin hadooh tikwiriyaati geeb iiktiyeeb oodoor naatka sooyi.
Yasuu'a akra baraam isingad
35 Beet tooyin himniit,
Yasuu'a tikwiriyaatiyooh geeb falluukaat y'am,
<<Eeyam udarooh ooraaw niibi!>>
idi.
36 Oodehay y'ishniit,
Yasuu'a falluukaatiib haayee haay giigiyaan.
Warit falluuka han gwad iifiin.
37 Baraah eeyameeb sakee akra baraam eeyaayt,
uumooj tufalluuka yam mateebt isdawil.
38 Yasuu'a tufalluukaati niiwaay diwi.
Girmaay whiiti kehii imb'i.
Tikwiriya barooh isib'arna,
<<Seedna!
Seedna!
Hinin amaag neefiyeek kit'awaya hoon han?>>
idiin.
39 Yasuu'a ib'art ubaraam winneet akraabwa eeyam baliib y'itrigiswa idninihoob,
ingadna.
40 Yasuu'a tikwiriyaatii dehaay,
<<Naanhooy tirkwiina?
Masi iimaan kitbariin han?>>
idi.
41 Tikwiriya winneet irkwiin.
Gal iraweeh dehaay,
<<Uun aabu?
Ubaraamwa aayamwa han barooh isnaakiirna.>>
idiin.