Biilaatoos Yasuu'a araatamiini
15
Fajir ifagiiriya iwawinwa,
isuurkinaawwa,
udiini koojawwa iiktiin immarraayniit,
kassuuh iyahuudi majliswa immakkaarna.
Aflaay baraah Yasuu'a yhaakwirniit haay giigiyaan.
Whaakim Biilaatoos haay sallamiyaan.
2 Biilaatoos Yasuu'ii dehaay,
<<Baruuk Yahuudi had'aabwa han?>>
idi.
Yasuu'a,
<<Aan bariiyeek bhaliya.>>
idi.
3 Ifagiiriya iwawin gwidaat maagnaaytii Yasuu'a atehimiyaan.
4 Biilaatoos masi <<Baruuk naat kitdiya han?
Uudehay gwidaanaatii atehimeena hook karhita han?>>
idi.
5 Laakiin Yasuu'a masi naat han diyaab kiiki.
Biilaatoos winneet ajjabamiya.
6 Whaakim ubaaskaay w'iidiib diima usijnii uudehay yhiriweeb abuuki iifir'a.
7 Baarrabaas iidni tak suur tumadiinaatiib iki finaay gaal diraab akay whabsiib iifi.
8 Uudehay eeyaaniit Biilaatoos abuukiib gaalnaay fiduug hooy yhariwna.
Beet toona baruuh diimaab saki.
9 Biilaatoos <<Iyahuudi had'a dehookna afandiig?>>
idiit bareeh raatiya.
10 Biilaatoos ifagiiriya iwawin Yasuu'a hasaadaateeb dehaay haay y'aab iiktiineet toona iktiin.
11 Laakiin ifagiiriya iwawin uudehay Biilaatoos raatiit Baarrabaas isfadiigneet toona hooy yhariwna.
12 Biilaatoos bareeh masi infaraad,
<<Ootak baraakna Iyahuudi had'a tiyadneeb kak awari?>>
idi.
13 Laakiin uudehay masi,
<<Sallabaa!
Diraa!>>
idiin.
14 Biilaatoos bareeh sakanaaya,
<<Uun uutak naat maag gwibbaabuuyt andiir?>>
idi.
Baraah wawin hissaayee,
<<Barooh diraa!
Sallabaa!>>
idiiniit masi waliikiyaan.
15 Biilaatoos baraah yhiriwneet toona sakiya.
Udehayi madareeb maagtiib abaak ootak usijniib iifiib dehaay ifdig.
Biilaatoos Yasuu'a ithab'a aree sallabamti jillaay bareeh nuuniya.
Ikajar Yasuu'a haay kashiyaan
16 Ikajar Yasuu'a whaakimi ugawi hoosh haay shuumsiyaan,
ikajar eeraw kasseeh hiddaab waliikiyaan.
17 Yasuu'a haay kashiyaan,
akraab maag waraayaaniit,
<<Whad'aay!
Kwatiibwa?>>
iidna.
Had'aayi halaaka daawriib kehii id'iin,
koofiyaayt danteet kehii daasiyaan.
18 Barooh haay kashiyaan,
<<Iyahuudi had'a,
kwatiibwa?>>
iidna.
19 Yasuu'a kwoolayii ugirma iith'ana,
kehii tatfiin.
Whad'aayt dehaay ginafiit salaamiin.
20 Malya ikajar Yasuu'a haay kashiyaani har'ii,
whalaak w'adaru hooy ifir'ana,
yhalakaayeeh istookwna,
sallabiinee dehaay haay giigiyaan.
Yasuu'iib usallabti
21 Yasuu'a oodehay iidirni mhiin haay bayee,
Sim'oon Geerwaani,
Aleeksaandarwa Ruufuusiibwa ubaaba,
tidir'aatii y'ee ikajar akruurii usaliibi hindi yaksiisiyaan.
22 <<Kalhoob>> iidni mhiin iktimnihoob,
Yasuu'a toomaag sakanaayi gwad sallabiyaan.
Gaal umaygwadii dehaay,
ooraaw utarhagwadii dehaay sallabiyaan.
23 Been tooy Yasuu'a haab mir hooy iifiyeeb nuuniiniyaana.
Laakiin Yasuu'a wha irib.
24 Malya barooh sallabiyaan.
Ikajar shirfiit igidniit,
tushirfi dehaay dhibtiyeeb bariiyeeh yhalaaka im'adhdhaadhna.
25 Uudoor baraah sallabiini tuus'aa ashshadhigtu uudoor aree fajir akay iifi.
26 Yasuu'i girmaay kehii,
<<Uun baruuh Iyahuudi had'a>> miyaad kitbaaba.
27 Yasuu'a toomaag sakanaayi gwad sallabiyaan.
Gaal umaygwadii dehaay,
ooraaw utrahagwadii dehaay sallabiyaan.
28 Aflaay uktaabiib katab ibhali sidik iiktiin,
<<Barooh toomaag sakanaayi geeb ishabibna.>>
indi.
29 Ikajarwa baliin yhasamiinwa han barooh haay kashiyaan.
W'ayi salaamiitka <<Baruuk <W'ankwanaay gaw kat'iit,
mhay b'eeyeeb and'iir.>
tidiya.
30 T'a ugarooyook shidhhana!
Usaliibii kwibara m'aa!>>
idiin.
31 Oodehay beentooy ingadnaka,
barooh iishbibna.
Udiini koojaawwa,
ifagiiriya iwawinwa han bariiyooh faaydee,
<<Oodehay ooraaw ishidhhiin,
ugarooyooh kiishidhhan!
32 W'ankwanaay Umasiihi Israa'iili had'a ikatiyeek,
t'a batikwi!
Malya niishbib,
aamanni niyad.>>
idiin.
Aanda imalu toomaag sakaab han barooh neewiyaan.
Yasuu'iit tooyat
33 Nabhoob,
gaalhoob kastuuh tuubuur thibinamta.
Kassooh oomb'i w'asir ookiik thibin iki.
34 Been oodoor,
Yasuu'a win hissii aadhiya,
<<Eelooy Eelooy,
lamaa shabagtaani?>>
idi.
Aan ibhali Iyahuudi bhaliyee <<W'ankwanaayi!
W'ankwanaayi,
naanhooy t'ish tid'iyaheeb?>>
miyaadu.
35 Shalik dehay beentooy ingid,
beet toona imaasiwnihoob,
<<Sinaakirna!
Baruuh unabi Eelyaab waliikiini.>>
idiin.
36 Tak gaal dhaabee eeyaayt shaltuut haab hooy id'iit,
malya kwoolayiib ish'agaayt Yasuu'iib uyafiibka y'aabik,
<<Oont'a ishna d'iina!
Eelya y'eetiit tikwisiinyeek niishbib.>>
idi.
37 Yasuu'a aadhiya,
malya iya.
38 Been oodoor W'ankwanaay ugawi suurii tiifiit tusitaara mhakwaliisii eedhoom ookiik,
malu mhiin tishtat.
39 Udaabit Iroomaani kajari had'a Yasuu'i suurii iist'a.
Been udaabit Yasuu'a kak iyaneeb rhiyanihoob,
<<Uun baruuh sidik W'ankwanaay Oor akay iifi.>>
idi.
40 M'at galit sagi mhiin ingadniit iishbibna.
Bataah,
Maryam Majdaleenaabwa,
Yaaguubwa Yuusiitwa tuundi Maryamwa,
Saaloomaatwa iifiin.
41 Suur Jaliilee,
m'at Yasuu'a ramaat iifiin.
Bataah Jaliileeb Yasuu'a winneet daayiib weeraa iifiin.
Warit m'at han Algudusee geeb y'aa iifiin.
Yasuu'a itoobaas
42 Oont'a whawaad idwil eeya,
tulhaytooh aree sabt akay tiifi.
Iyahuudi dehay w'iidii dehaay amar akay iifiin.
43 Yuusif iidni tak,
Raamaayiib Yahuudaay iikti eeya.
Uun baruuh daayi tak winneet sidkiibu,
Iyahuudi mijlasiib aree gaalu.
W'ankwanaayt had'aayeeti aay akraab yhiriw.
Ash'ara taku,
aree Biilaatoosii Yasuu'iit tukinaaja yhariw.
44 Biilaatoos Yasuu'a itoodaareet toona imaasiwihoob winneet ajjabamiya.
Daabit gaal waliikiyaayt Yasuu'a ayaab ikatiyeeb biikaayeeb sakanaaya.
45 Baruuh Yasuu'iit tooyat udaabtii ikanihoob,
tukinaaja Yoosif sallamiya.
46 Yuusif naaylooni halaak idlib iyhaayt,
usaliibii tukinaaja tikwisiya.
Malya whalaakiib ishaamim.
Amariib miimash isoomiraayt ibis.
Malya umiimashi yafiib aweeb kehii kwaaleelsiya.
47 Maryam Magdaleenaabwa,
Maryam Yoosifiit tuundeewwa tukinaaja naad daasamtaneeb rhiyaan.