Y'israa'iili Idanuubeehna Ifidhadhna
9
Oon ootrig ookna tutagwgwu fadhigaatiib,
Y'israa'iili hiddaab immararaayna,
baaskiitiyaana,
shiwaali halaka ikweeniit,
igirmaayeehna kehii haash id'iin.
2 Baliin Y'israa'iili taas kassooh oodehay igirbaanaay igarooyeehna waasiyaan.
Baraah imhiinaaneehna ingadniit,
idanuunbeehwa,
yhoobeetoohna toomaagwa ifidhadhna.
3 Baraah oomhiin hooy iifiineeb ingadniit,
W'ankwana Ukwaasanaayoohna Whaggi Kitaab mhayt saa'aat agriiyaan.
Mhayt saa'aat warit aree W'ankwana Ukwaasanaayoohna y'abidna,
aree idanuubeehna ifidhadhna.
4 Malya idaraji kehii ingad Ilaawi aree:
Jeeshiwaawwa,
Baaniiwwa,
Gadmi'eelwa iiktiin.
Baraah win hissii W'ankwana Ukwaasanaayoohna waliikiyaan.
5 Ilaawi suurkina aree:
Jeeshiwaawwa,
Gadmi'eelwa,
Baaniiwwa,
Hashabniyaawwa,
Sharabiyaawwa,
Huudiyaawwa,
Shabaniyaawwa,
Fatahiyaawwa hadiidiyaana,
<<Yakaana,
W'ankwana Ukwaasanaayookna amseenee diimaab ookiik hamidna.>>
idiin.
Malya baraah,
<<Uusmuuk utageega baarakamaab ba'iikti,
uusmuuk tibarakaawwa whamaadwa kasseeyooh mhakwal ba'iikti.
6 Baruuk ood'ook W'ankwana tikatiya.
Baruuk teebri tikwaasa,
teebri titageegaat tikwaasa,
kasseeh tibreeti yhayikw tikwaasa.
Toobuutwa teena tehooy eefeentwa kasteeh tikwaasa,
ibharaawwa teena tehooy eefeentwa kasteeh tikwaasa.
Baruuk naatka midhhan tiniiwa,
tibreeti dheesh barook y'abidna.
7 Baruuk W'ankwana Ukwaasana tikatiya.
Abraam Uur Ikaldaanii haay eetaayt,
Ibraahiim tisima.
8 Baruuk bariiyooh oogin'i dehook nhas akay timriya.
Bariiyooh geeb galad tid'iit,
utaasooh een yhash tiniiweet toona soota.
Kan'aani haashwa,
Yhiiti haashwa,
Y'amooraayi haashwa,
Farasaayi haashwa,
Yaabuusaayi haashwa,
Jirjishaayi haashwa tiniiweet toona galad geeb tid'iya.
Baruuk sidkiibwa akay uwaadiyaayook titkwikwa.
9 Baruuk hoobeeyeen igwirha Masreeb rhita.
Bareetooh toowaaw Oobhar W'adarooy timaasiwa.
10 Baruuk,
Far'uunwa kasseeh idaabtaayeehwa,
kassooh bariiyooh whaashi dehayi kehiiwwa m'uujisaatwa alaamaatwa rhista.
Imasri kak amaag iweerneeb baruuk tikana.
Baruuk uknaayook dehaay oon amsi ookiik daayiini sim dehook tid'iya.
11 Baruuk bareeyooh suurii oobhar t'adhidha.
Aflaay baraah balami haashi bitik sakiyaan.
Laakiin baruuk bareeh isiikw eenda win awi iyameeb tikwiiniib t'iiteena,
bareeh eedhoom tigida.
12 Oomb'i aree bareeh b'aluukiib dabaamta,
whawaad aree baraah sakiiniib usalal balooltiit n'eetii eeraasta.
13 Oorba Siinaay baruuk n'ati tikwitaayt,
bareeh tibreetee bhaliisamta.
Baruuk gaanuunwa hag aadilwa takwaakwwa bareeh tehiiyya.
Daayi fardaawwa,
waseetwa aree bareeh tehiiyya.
14 Tusabtook tumugaddas bareeh tisookina,
waseet tehiiyya,
fardaawwa hagwa aree ukishiyaayook Muusaay yafii soota.
15 Baraah yharagwnihoob,
baruuk tibreetee hadhiib tehiiyya.
Iyweenihoob aree uliilaawii yam dehaay haay eeta.
Bareeh tiniiweet toona dehaay halafootaneeb whaash ookiik giigeetiit iyayneet toona bareeh soota.
16 Laakiin hoobaan atoorbiib ikeeniit kibir id'iina,
tiwaseeteek sinaakraab kiikeen.
17 Tisnaakrooy iribna,
bareeyooh bitik tid'iyeet tim'uujisa han sh'aab kiikeen.
Baraah im'akaarna hook.
Amgwashuushaab akay aree suurkinaab waasiyaaniit,
Masir beeti ikishiyaamtiib y'agarna.
Laakiin baruuk afooyana Kwaasanaawwa,
rahiimwa haniinwa,
shalik gadabeebwa,
gwida reeriibwa tikatiya.
Shaawti bareeh gada d'iyaab kitta.
18 Baraah lagaay timsaal sanam id'iiniit,
<Uun baruuh ukwaasanaayookna been bareekna Masree haay eeyaabu.>
idiin.
Baraah win kifuur ikifirna.
19 Baruuk gwidaat rhamaateebwa akay,
bareeh umingaayiib gada d'iyaab kitta.
Oomb'i usalaliib bareeh dabaamiib ib'aluuk hooy mhiyaab kiiki.
Whawaad aree tuun'i tubalooltiit baraah sakiiniib usalal dehaay eeraastiit hooy mhiyaat kitti.
20 Baruuk Ishuukeek idaayiib bareeh sooyeeni jillaay tehiiyya.
Bareeyeehna iyafa aree Mannaab habiyaab kitta.
Baraah iyweenihoob aree yam tehiiyya.
21 Fadhig tamuun hawla aree umingaayiib baraah yhiriwneet teena tehiiyya.
Baraah naat nawaab kiikeen.
Yhalakaayaahna shatatamaab kiikeena,
iragadaayaahna han aamaab kiikeen.
22 Bareeh had'aayeetwa dehaywa tehiiyya.
Tusabbooti salal dehaay tisoomira.
Whad'a Siihooni Whashabooni haashwa,
whad'a Ooj Ubaashaani haashwa tis'abika.
23 Y'areehna tibreeti hayikweet guudista.
Whaash baruuk yhoobeehna dehaay shuumaanaat abikna diyaab tiiktiyeeb beeti bareeh haay eeta.
24 Y'araahna giigiyaaniit,
whaash y'abikna.
Ikan'aani whaashiib ikwiir baruuk bareeyooh suurii tigribaayt,
Ikan'aaniiwwa,
yhad'aayeehwa,
whaashi dehaywa,
bareeh sallamta.
Baraah toona tiyhariwneet hooy id'ani jillaay bareeh sallamta.
25 Baraah akra dif'aayeet madiinaatwa,
harrooyani haashwa y'abikna.
Gwida miraayi gawa y'abikna.
Kasseeh ijinsaayeet daayiinayt atab gawaawwa,
suur ameefirkaat reetwa,
dir'aatwa,
saytuuniit m'adayaawwa,
samaraati hindiiwwa gwidaana y'abikna.
Baraah tamiyaaniit gabiyaana,
irshadna,
tinafirnay tiwawin haay afirhiyaan.
26 Laakiin baraah sinaakraab kiikeena,
aree bariiyook kehii finaab ikwaasna.
Bariiyook whag aree har'oohna daasiyaan.
Inabiyaayeek bariiyook dehaay it'agiirneet toona bareeh sooyiin aree idaarna.
Baraah win kifuur ikifirna.
27 Shaawti baruuk y'ashooyeehna baliib bareeh n'ati iitir sallamta.
Laakiin baraah n'ati itootaarnihoob,
bariiyook dehaay waawiyaan.
Tibreetee baruuk bareetooh toowaaw timaasiwa,
tirhamaateek tigwidaanaatee aree bareeh it'awiin gal tehiiyya.
Y'it'awiin aree bareeh y'ashooyeesoohna ishidhhanna.
28 Laakiin baraah fiiniyaanihoob,
masi bariiyook suurii toomaag id'iin.
Malya baruuk bareeh y'ashooyeehna ayeeb tingad tid'iit,
aflaay bareeh yhakimna.
Baraah tuubiyaaniit dehook waawiyaanihoob,
tibreetee toowaawtoohna timaasiwa.
Tirhamaateesook aree bareeh gwida doora tishidhhanna.
29 Baruuk bareeh whaggook beeti it'agiirneet toona soota.
Laakiin baraah atoorbiib ikeeniit,
tiwaseeteek sinaakraab kiikeen.
Uudehay isnaakiirneek haay eedhhaniineeb bariiyook whukwimi kehii maagnaayt id'iin.
Baraah amaagniyaab id'iiniit im'akaarna hook.
Akra gin'iib ikeeniit aree tisnaakrooy iribna.
30 Baruuk bareeh gwida hawla timtaraama.
Ishuukeek diigwatta.
Inabiyaayeek bareeh sooyeeneet toona soota.
Laakiin baraah sinaakraab kiikeen.
Aflaay bareeh oodehay ishawweehna nuunta.
31 Laakiin baruuk tirhamaateeyook guudtii aree bareeh fitka fir'aab kitta,
tari gada d'iyaab kitta.
Baruuk haniinwa rahiim Kwaasanaawwa tikatiya.
32 Oont'a aflaay,
Yaa Ukwaasanaayuun uuwin,
w'alyaabwa w'atrakwiyaabwa,
ureeri galadooh kaleewiiniib tikatiya.
Aan igwirha hini kehii daayaan kassaah dehook bii'adhiimna.
Hininwa,
yhad'aayeenwa isuurkinaayeenwa,
ifagiiriyaayeenwa inabiyaayeenwa,
hoobeenwa kasseeh udehayookwa,
Y'aashuuri yhad'aayeeb idamanee oon amsi ookiik gwirha kehoon daayaan.
33 Beet kastooh dehoon tikeet toonaatiib,
baruuk adil tid'iya.
Baruuk sidkiibwa,
hinin maagnaayt nid'i.
34 Yhad'aayaanwa,
isuurkinaayaanwa,
ifagiiriyaayaanwa,
hoobaanwa,
bariiyook whag haay shagaamaab kiikeen.
Bariiteek tiwasi sinaakraab kiikeena,
tari baruuk sootaneeb ibhali sinaakraab kiikeen.
35 Baraah had'aayeetiib iifiinihoob,
baruuk gwidaat daayiinaaywa,
gwida kheerwa,
mar'a harrooyana haashwa bareeh tehiiyya.
Laakiin baraah barook abidaab kiikeena tari tumaagti salalaayeehna hooy tuubaab kiikeen.
36 Laakiin shibiba,
shaawti baraah tisamaraawwa tudaayiinaay tooraawwa hooy tamiini jillaay baruuk hoobeen tehiiyyeeb whaashiib,
amsi kishiyaab nikati.
37 Hineeb idanuubi sabbii,
gwida harrooyt fir'aay yhad'a hini kehii tid'iyeeb teebi.
Baraah ishuukeenwa ureewoonwa yhariwneet hay'aatiika yhakimna hoon.
Hinin akra gwirhaayeeb neefi.>>
idiin Ilaawi.
Uudehay Taafagsamiyaan
38 Baraah <<Kastooh toon toona tutikeenaati sabbii,
hinin Y'israa'iili galad n'abik.
Oon barooh aree katabee nikwasi.
Isuurkinaayaanwa,
Ilaawiyaanwa,
ifagiiriyaanwa aree ikhatmaayeehna kehii eeth'ana.>>
idiin.