Mifrꞌeet
Y'israa'iili Amaag Itweeraayna
1
01 Yaaguubi geeb Masir ibeen Israa'iileeb y'ar ismaayaahna bak iifiina,
aree gaalka dhiwaayeesooh iifi:
02 Raaꞌoobiinwa,
Simꞌoonwa,
Laawiiwwa,
Yahuudaawwa,
03 Yassaakarwa,
Sabaluunwa,
Binyaamiinwa,
04 Daanwa,
Naftaaliiwwa,
Jaadwa,
Ashiirwa ittiyoodiin.
05 Yaaguubiib y'ar kassaah y'adadaahna asarama tamuun iiktiin.
Laakiin Yuusif suur akay Masreeb iifi.
06 Malya Yuusifwa kassaah isanayaahwa been uutaas kassuuhwa iyaan.
07 Laakiin Y'israa'iili tawaamiyaana aree winneet guudiyaana,
gwida adadeeb ikeen.
Aflaay whaash bareesooh itab.
08 Malya gayi had'a Yuusif baakaan Masreeb had'aab iki.
09 Baruuh udehayooh dehaay,
<<Shibibna,
Y'israa'iili dehay oont'a winneet gwidakaayeen ikeen.
10 Shaawti masi biiguudayneet toonaati jillaay ibakii shagaamni.
Een binweeriyeek,
masi maag yakiiniyeek,
baraah yꞌashooyeen geeb gadiit finaayi hoon iyadna.
Malya whaashii giigi iyadna.>>
idi.
11 Aflaay Y'israa'iilaayi kehii kishiyaab id'iina.
Bareeh amaag waraayiina,
akra shaga shagaasiisiin.
Fiitoomwa Ramsiiswa Far'uunii dehaay makhsanaayeet madiina iiktiini jillaay,
baraah id'irna.
12 Laakiin Imasri bareeh amaag iweerneebka,
Y'israa'iili gwidakaab ikeeniit ibrarna.
Aflaay Imasri Y'israa'iilaayee winneet irkwiin.
13 Aflaay Imasri Yꞌisraaꞌiili dehay rhamaat anu shagaasiisiyaan.
14 Umidhhanoohna isehamna,
akra shaga shagaasiisiyaan.
Haash haathiktiit toob shagaasiisiyaan.
Tidir'aateeb kassooh ishaga shagaasiisiyaan.
Imasri kassooh w'akra shagaayoohna bareeh shagaasiisiyaan.
15 Malya Masreeb whad'a Shifraatwa Fuu'aatwa ittiyoodiint tisfaarana T'ibraayi bhaliisamiya,
16 <<Y'ibraayeet teem'a tisfariinihoob,
ufiraayi kwirsiib bateeh gw'adna.
Oor ikatiyeek,
barooh dirna.
Laakiin oot tikatiyeek,
ishna batiidhhan.>>
idi.
17 Laakiin tisfaarana Ukwaasana irkwiiniit whadꞌaay ibhali sinaakraat kiikeen.
Yꞌar han ishidhhanna.
18 Aflaay Masreeb whadꞌa tisfaarana waliikiyaayt bateeh raatiya,
<<Naanhooy bak saktaana?
Yꞌar naanhooy tishidhhanna?>>
idi.
19 Tisfaarana Far'uunii dehaay igwibiina,
<<Yꞌibraayeet taamꞌa Timasri tꞌiiteet kiikeen.
Bataah akraata,
tisfaarana beentooy baakatiim ifeerna.>>
idiin.
20 Aflaay Ukwaasana tisfaaranaatee dehaay n'akwmanaaya,
aree uudehay imeeshwaayna,
winneet gwidakaab ikeen.
21 Tisfaarana Ukwaasana iriikwnayt,
bateeh teekna han firaay yhii.
22 Shaawti Whadꞌa udehayooh kassooh sooya:
<<Yꞌar igayii faray kasseeh ibakii Ooniiliib geedaana!
Tꞌarit laakiin ishna ba'iidhhanna!>>
idi.