Niheemiya
Niheemiyaayt toosileel
1
Niheemiya Hakaalyaay oori bhali:
Ootrig Kislif whawil itagwuugwiib,
ani tumadiina toowin Shuushaneeb iifiyihoob,
2 Hanaani aniib isanaayee gaal ikati Yahuudaay eeya.
Barooh wari da gwadi geeb iifiin.
Ani bareeh imitlaliib idhhanniit y'agar Iyahuudi haay raatan,
masi aree Algudusee raatan.
3 Baraah anii dehaay,
<<Baliin imitlaliib idhhanniit whaash beeti y'agar,
akra gwirhaawwa eebaayeewwa eefeen.
Alguduseet teheeta kat'amta,
aree idheefaayaah n'eetii itoolaawna.>>
idiin.
4 Ani teen teena amaasiwihoob,
n'ati as'a aree waawan.
Shalikt yina gadaban,
baaskiitan,
aree tibreeti Ukwaasanaay suurii siileelan.
5 Malya ani adi:
<<Yaa W'ankwana,
tibreeti Ukwaasana,
Ukwaasana oowinwa w'atrakwkwiyaawwa,
baliib ibarooh areeyeenwa tiwaseeteeh isnaakiirwa geeb tirhamaati galadooh kaleewiiniib,
6 w'angwiilook simaasiwa,
igw'adeek nigila,
ukishiyaayuuk Israa'iiliib oodehayi kishiyaayi jillaay whawaadwa oomb'eewwa suurook siileeliiniib maasiwa.
Hinin Y'israa'iili aneebwa baabiyu dhiwaawwa han hooy haayee,
bariiyook kehii nikwaaseeb idanuub atfadhiidh.
7 Hinin bariiyook geeb amaag sakna.
Tiwasi sinaakraab kinki,
igaanuunwa whagwa ukishiyaayook Muusaab tehiiyyeeb sinaakraab kinki.
8 Baruuk ukishiyaayook Muusaab sootaneeb ibhali sh'aa!
Baruuk <Baraak ugalad tikat'aneek,
ani oodehayi bitik iibrir hookna andi.
9 Laakiin anii dehaay agartiit tiwaseeti tisnaakiirneek,
malya imitlaliib eefeen udehayuukna sagi mhiin daayeeneek han,
ani beentooysii iidbil andi.
Aniib uusim hooy daayiiniyeeb oomhiin ani waasaab akatiyeeb beeti bareeh iidbil andi.>
tidiya.
10 Baraah kishiyaayeeka aree dehayook ikatiin.
Y'akrireek iwawinwa w'ayook w'akraanaaywa bareeh tishidhhana.
11 Yaa W'ankwanaay,
w'angwiilook simaasiwa,
oon ukishiyaayiitook toosileelwa,
ikishiyaayeek baliib oosmook hamooysiit afirheen siileeleeneet toosileelwa maasiwa.
Amsi ukishiyaayook ansira,
oon ootaki suurii rhamaat rhisaa!>>
adi.
Ani baliit teeyina whad'aay haab gw'asana iikti.