Artahashiish Niheemiyaab Algudus beeti diigwatiya
2
Ootrig Niisaan whad'a Artashiish had'aab iiktiyeekka whawil itagwuugwiib,
barooh haab dehaay haay eeyaan.
Ani wha yaksanaayt whad'a nuunan.
Ani suur bariiyooh suurii door han hasaay kaaki.
2 Aflaay whad'a raatiyaheeb,
<<Baruuk lhaab na bitkaayeek,
naanhooy ifiireek gadabaa rhani?
Tuun tuuna weena kitti laakiin ugin'i gadab ikatiin.>>
idiheeb.
Ani winneet arkwi.
3 Laakiin ani whad'aay dehaay,
<<Whad'a diimaab kwarriib ba'iikti!
Tumadiina hoobaan hooy atoobsaab ikatiineet kat'amtaneek,
aree idheefaayaah n'eetii itoolaawneek,
aniib aafiir kak kagadabiyaana?>>
adi.
4 Whad'a anii dehaay,
<<Baruuk naan harriiwa?>>
idi.
Malya ani aree Ukwaasana itibreeteenaay dehaay siileelan.
5 Malya whad'aay dehaay agwibi,
<<Tuun tuuna whad'a afirhistiniyeek,
ukishiyaayuuk aree bariiyook suurii shiboot marriyeek,
Yahuudaay teefeet tumadiina ookiik fidigaheeb.
Beet tumadiina hoobaan hooy atoobsaab ikatiineet masi iid'ir andi.>>
adi.
6 Aflaay whad'a tutakatuuh bariiyooh dar s'ee aneeb raatiya,
<<T'iibaabtuuk nhoob ookiik iikti tindi?
Naadoor aree it'igir tindiya?>>
idi.
Whad'a aneeb iifdigeet toona hooy imdhadh,
aflaay ani waadiyaab abik.
7 Ani masi bariiyooh dehaay,
<<Tuun tuuna whad'a afirhistiniyeek,
Furaati yindhibi haashi haakim ookiik jawaab tiniiwheeba?
Aflaay baraah ani Yahuudaab akantiimeeb ookiik hassiheeb iyadna.
8 Aasaaf whad'aay dhawi gw'aadiiga ookiik aree jawaab tiniiwheeba?
Aflaay baruuh khashab iyaawheeb indi.
Ukhashab udiini gawi idheefa haay iitkwikw andi.
Tumadiinaati kirra haay iitkwikw andi,
gaw hooy akwarriyeeb aree haay iitkwikw andi.>>
adi.
Ukwaasanaayt barakaati ayi anii kehii iifi akay,
whad'a toona hooy ahariweet itkwikw.
9 Shaawti ani Furaati yindhibi haashi haakma abaayt,
whad'aay ijawab bareeh nuunan.
Whad'a han dheeshi daabtaawwa hatay ama kajarwa isoorimheeb.
10 Sanbalaat Whooraanaayiiwwa Toobya Y'ammoonaayi daabitwa beet toona imaasiwnihoob,
baraah winneet arbishamiyaan.
Tak gaal Y'israa'iilyeet daayiinaayt harriiw y'iiniyeet toona iribna.
Niheemiya Alguduseeb ikirra shagaasiisiya
11 Ani Algudus abaayt,
beentooy mhay b'i ahagit har'ii,
12 Whawaadi door shalik da geebu yaksan.
Ukwaasanaayu aniib oogin'iib id'iit,
ani Algudusee dehaay iitkwikw andiyeet toona gaal han sooyaab kaaki.
Ani suur amaab iiktiyeeb whari nuun hareeb weer geebu kiihaay.
13 Whawaad aree T'abaati Dheefaay geebii adif,
Tudhhaniitiit Ri beetiiwwa,
W'andhooy Dheefa beetiiwwa adif.
Alguduseeb ikirra ikat'amaabwa,
idheefa tuun'i day'aat tiiktiyeebwa ashbib.
14 Malya Uthawi Dheefaawwa Whad'aay Hoodhwa beeti hantaayan.
Laakiin beentooy aniib whari hassi mhiin kiihaay.
15 Aflaay whawaad t'aba ansi,
aree ikirra ashbib.
Aakhir aree agaraayt T'abaati Dheefaay geebii masi shuuman.
16 Idaabta ani naad abayeet toona kanaab kiikeen.
Tari ani naan iid'eet toona kanaab kiikeen.
Masi aree ani Iyahuudi naat han sooyaab kaaki.
Tari ifagiiriya tari isuurkina tari idaabta tari baliin Iyahuudi eeraw ushaga shagaamiin han sooyaab kaaki.
17 Malya ani bareeyooh dehaay,
<<Hinin gwirhaayeeb neefiyeet toona baraak rhiteena:
Algudus kat'amta,
idheefaayaah n'eetii itoolaawna.
M'aana,
Alguduseeb ikirra niitkwikw,
shaawti sikw'i hoon daayi kiidi.>>
adi.
18 Ani masi bareeh sooyan,
Ukwaasanaayu tin'imaati ayi anii kehii eefiyeet toona sooyan.
Whad'a aree anii dehaay naan idiyeet toona bareeh sooyan.
Baraah igwibiina,
<<Yakaana ikirra masi niid'ir.>>
idiin.
Aflaay baraah oon ushaga udaayiib badooyaan.
19 Laakiin Sanbalaat Whoorooniiwwa,
Toobya Y'ammoonaayi daabitwa,
Jashim W'arabiiwwa aree beet toona imaasiwnihoob,
baraah haay kashiyaan hoon aree neewiyaan hoon.
Baraah raatiyaan hoon,
<<Tuun naanaatu,
naan daateena?
Baraak whad'a timgwashiishna han?>>
idiin.
20 Ani bareeyooh dehaay agwibi,
<<Tibreeti Ukwaasana ansiri hoon indi.
Hinin bariiyeeh kishiya nikati,
ood'uur masi badooni niyad.
Laakiin baraak Alguduseeb adhidh kitbariina tari kinaamtiib kitbariina tari taariikhi hag han kitbariina.>>
adi.