Uudehay Tukheema Kak Shagaamiyaaneeb
40
01 Malya Wꞌankwana Muusaay dehaay:
02 <<Tukheema tikwikwa,
Umajlisiit Tukheema han tikwikwa,
ootrig w'awwaliinaay oomb'i w'awwaliinaay tikwikwa.
03 Ugaladi Sanduuk tiwasi titamin hooy eefeeneeb hooy daasaat tusitaara kehii hamiiya.
04 Tutarabeesa haay mꞌaa,
igadhꞌeeh aree kehii daasa.
Malya tulambaati m'abak haay mꞌaa,
tilambaateeh aree tikwikwa.
05 Oolbaaniit karaamaati mhiin dimꞌaraay daamaab,
Ugaladi Sanduuki suurii daasa.
Tusitaara aree tukheemaati dheefaay daasa.
06 Tikaraama t'atoolwaanaati mhiin aree tukheemaati dheefaay,
Umajlisiit Tukheemaati suurii daasa.
07 Ootash yam hooy d'iyaat Umajlisiit Tukheemaawwa tikaraamaati mhiinwa eebtik daasa.
08 Whoosh sitaaraat hooy kwilila.
Tusitaara aree whooshi dheefaay daasa.
09 Ushimuuti saliit yaksaat tukheema haay shimita,
tehooyteeb teefeena aree kastooh haay shimita.
Batooh atehara,
kasseeh igadhꞌeeh han atehara.
Shaawti batuuh mugaddast iikti tindi.
10 Malya tikaraama t'atoolwaanaati mhiinwa kasseeh igadhꞌeehwa shimita.
Tikaraamaati mhiin atehara,
winneet aree mugaddas iikti indi.
11 Ootashwa w'asaasoohwa shimita,
aree bareeh atehara.
12 Haaruunwa yꞌareehwa Umajlisiit Tukheemaati dheefaay haay mꞌaa.
Malya bareeh yamee shigwidha.
13 Malya Haaruun yhalaka imugaddasa sitookwa,
shimita aree atehara.
Aflaay baruuh fagiiriib akeetiit shagaami indi.
14 Yꞌareeh haay mꞌaa.
Bareeh han gamis sitookwa.
15 Bareeh ubaaboohna tishmiteeb ooshmuut shimita.
Aflaay baraah fagiiriyaab akeetiit aneeb shagaameen ikatiin.
Bareeyuuhna uushmuut taas taasii fagiiriyaayi shimuut iikti indi.>>
idi Wꞌankwana.
16 Muusa Wꞌankwana sooyaneet toona kastooh idꞌi.
17 Aflaay tukheema whawil umalyaay ootrig w'awwaliinaay,
oomb'i w'awwaliinaay itkwikw.
18 Muusa tukheema id'irihoob,
w'asaasooh yakisiya,
eelha y'aatim,
itaras shashuumisiya,
aree tikwil'iya y'aatim.
19 Malya Wꞌankwana sooyaab iiktiyeet toonaatiit,
tukheemaati kehii usagif ibrir,
barraay aree w'asseenaay kehii id'i.
20 Malya baruuh eelha iy'aweeyeeb imalu tiwasi titamin hooy iifiineeb Ugaladi Sanduukiib id'i.
Y'aamuuda Usanduuki fayeeb id'i,
w'asseenaay aree kehii daasiya.
21 Malya Usanduuk tukheemaatiib daasiya,
tusitaara aree ish'ag.
Ugaladi Sanduuk aree bak idbi.
Wꞌankwana barooh sooyaab iiktiyeet tehay'aatiit id'i.
22 Malya Muusa tutarabeesa Umajlisiit Tukheemaatiib,
tugiblaatiit tujhaatiib,
tusitaaraatii barraab daasiya.
23 Aflaay Wꞌankwana sooyaneet toonaatiit,
tikaraamaati hadhi Wꞌankwanaay suurii tutarabeesaati kehii daayiib dadaasiya.
24 Tulambaati m'abak Umajlisiit Tukheemaatiib tutarabeesaati fiireeb,
Oomhiin Umugaddasi us'iidiit tujhaatiib daasiya.
25 Malya Wꞌankwana barooh sooyaneet toonaatiit,
tilamba Wꞌankwanaay suurii daasiya.
26 Muusa idim'araay tikaraamaati mhiin Umajlisiit Tukheemaatiib tusitaaraati suurii daasiya.
27 Wꞌankwana barooh sooyaneet toonaatiit,
Muusa shikwaan libaan hooy iliw.
28 Malya baruuh tusitaara tukheemaati dheefaay ish'ag.
29 Umajlisiit Tukheemaati dheefaay dar atoolwaat karaamaati mhiin id'i.
Bariiyooh aree atoolwaat karaamaawwa harrooyt karaamaawwa hooy karramamiya.
Beet toona Wꞌankwana barooh sooyaab iiktiyeet tehay'aatiit id'i.
30 Baruuh ootash shagwadhi yam hooy id'iit,
Umajlisiit Tukheemaawwa tikaraamaati mhiinwa eebtik daasiya.
31 Muusaawwa Haaruunwa Yꞌaraahwa,
y'ayeehwa iragadaayeehwa haay iishgwidhna.
32 Baraah Umajlisiit Tukheema shuumiineebka tari tikaraamaati mhiin iidwilneebka ishtigwidhna.
Beet toona Wꞌankwana Muusaab sooyaab iiktiyeet tehay'aatiit id'iin.
33 Malya Muusa whoosh itkwikw,
tukheemaawwa tikaraamaati mhiinwa ikwilil whoosh id'i.
Whooshi dheefaay aree sitaaraat daasiya.
Aflaay Muusa ushaga faayisiya.
Wꞌankwanaay Umatuun
34 Malya ibꞌaluuk Umajlisiit Tukheema ikwibis.
Wꞌankwanaay umatuun aree tukheema itib.
35 Ibꞌaluuk beentooy kehii isꞌa akay,
Muusa Umajlisiit Tukheemaati ishuumti adgiraab kiiki.
Wꞌankwanaay umatuun aree tukheema itib.
36 Ibꞌaluuk tukheemaatii asti yakamiyeebka,
Y'israa'iili hantaayeetiit iibaabiin.
37 Laakiin ibꞌaluuk biiyakayeek,
baraah kabeeriyaan.
Ibꞌaluuk yakamiyeeb oomb'i ookiik umhiinoohna yhigitna.
38 Kassaah Y'israa'iili kasteeh t'iibabteeyoohna Wꞌankwanaay ibꞌaluuk oombꞌi tukheemaati kehii rhiina,
whawaad aree ibꞌaluuki tehooyteeb nꞌeet buubtiit rhiin.