Ifagiiriyaayi Halaka
39
Baraah shagaamaab iiktiineeb ifagiiriyaayi halaka samaawiiwwa,
adaarhamaashwa,
kirkimiyaywa lilee daamaaba,
Oomhiin Umugaddasiib shagaamiinihoob aree iitkwiin.
Baraah masi Wꞌankwana Muusaab sooyaab iiktiyeet toonaatiit Haaruunii dehaay han halakaab shagaamiyaan.
W'eefood
2 Baraah w'eefood dim'araay shagaamiyaan.
Samaawiiwwa,
adaarhamaashwa,
kirkimiyaaywa nꞌakw naayloonii id'iin.
3 Baraah dimꞌaraay mibrara ikwitniit,
firkak ikwaasna.
Malya kanaaniiga d'iyaab iiktiyi samaawiiwwa,
adaarhamaashwa,
kirkimiyaaywa nꞌakw naaylooni lili bitik yhayidna.
4 Baraah eefoodi kehii malu harkaayi shaltit id'iiniit mhalleeh ifarda haay is'abikna.
Aflaay baruuh daayiib yhakwar.
5 Whaba eefoodi kit'ani gaalnaaywa dim'araaywa shagaamamiya.
Aree samaawiiwwa,
adaarhamaashwa,
kirkimiyaaywa nꞌakw naayloonii shagaamamiya.
W'ankwana Muusaab sooyaab iiktiyeet toonaatiit daamiya.
6 Baraah alya awi isoomirniit dimꞌaraay ikwililna.
Baraah yꞌawi ukhaatimiit naggashiyaaniit Israaꞌiileeb yꞌari sima hooy iktibna.
7 Malya een bareeh eefoodiib wharkaay iifiin ishaltiti kehii yhaakwirniit,
Israaꞌiileeb y'areet shꞌaniit iiktiin.
Wꞌankwana Muusaab sooyaab iiktiyeet toonaatiit id'iin.
Iginheet Sideeri
8 Baraah kanaaniiga d'iyaab iiktiyeet iginheet sideeri shagaamiyaan.
Eefoodiit id'iina:
dim'araaywa,
samaawiiwwa,
adaarhamaashwa,
kirkimiyaaywa n'akw naayloonii id'iin.
9 Tusideeri marabꞌa tꞌiiteetu,
22 santimitra gwimadtu,
22 santimitra marꞌa tiikti aree rakwikwti.
10 Malya batiiyooh kehii alya aweeyee fadhig safa idꞌiin.
Oosaf w'awwaliinaay yaaguutwa,
agiig adaroobwa,
luulaatwa iifiin.
11 Oosaf umalyaay bahramaanwa,
yaaguut hadalwa,
agiig eeraabwa iifiin.
12 Oosaf umhayaay soomiyaatwa,
alaatwa,
adaarhamash siigw'eebwa iifiin.
13 Oosaf ufadhigaay sabarjadwa,
jad'i aweewwa,
yashabwa hooy iifiin.
Aan baraah aree dimꞌaraay yay'amaaba.
14 Tamna malu awi iifiin,
aweebka aree Israaꞌiili ari simiib iikti.
Yꞌawi ukhaatimiit naggashamaaba aree Israa'iileet tigabiila titamna malu hooy naggashamaaba.
15 Iginheet sideeriitii dehaay tooyaaytiit ameeliwiyaat nhas dim'araayt shinshila shagaamiyaan.
16 Baraah malu dimꞌaraay mhakwaraawwa,
malu dimꞌaraay faywa idꞌiin.
Eefay imalu aree iginheet sideeriiti rikwina haay yhaakwirna.
17 Idimꞌaraayt shinshila timalu wharkaay kehii iifiin ishaltit w'eefoodiib suuriisii haay is'abikna.
18 Tishinshilaati agiya imalu eeraw aree wharkaay shaltit eefoodi kehii iifiin suuriisii haay is'abikna.
19 Baraah malu dimꞌaraay fay idꞌiiniit,
iginheet sideeri tehooyti ginnaal eefoodiib iifiinaayi rikwina imalu haay is'abikna.
20 Malya baraah masi malu dimꞌaraay fay idꞌiiniit,
eefoodi suurii wharkaay shaltit tehooytee haay is'abikna.
Eefoodiib imilbabi mhakwal tifarda dawil mhiin yhaakwirna.
21 Baraah iginheet sideeriiti fay eefoodiib ifayeeb yhakwirna.
Samaawi luulii yhakwirniit imilbab haay is'abikna.
Aflaay tusideeri eefoodii fataakt kitti.
Taan taana W'ankwana Muusaab sooyaab iiktiyeet tehay'aatiit daamiyaan.
Wari Fagiiriyaayi Halaka
22 Baraah eefoodiib tehooyti halak kassooh kanaaniiga shagaamaab iiktiyi samaawi halakii idꞌiin.
23 Whalak tehooyteeb tilꞌiit hooy tiifii,
tꞌalaati halakiit tilꞌi aree tꞌiiteeti.
Aflaay whalak biishitaati jillaay,
Tutil'iiti darag aree hayaada.
24 Baraah samaawiiwwa,
adaarhamaashwa,
kirkimiyaaywa n'akw naayloonii shagaamamaat rummaanaat whalaki farda idhoomaanaay ikwililna.
25 Aree nhas dimꞌaraay kal'a shagaamiyaaniit,
whalaki fardaay tirummaanaati bitik ish'agna.
26 Ikal'aawwa tirummaanaawwa whalaki farda idhoomaanaay daamiyaana,
aree yhalaka ifagiiriya shagaamiinihoob iitkwiina.
Beet tuuna Wꞌankwana Muusaab sooyaab iiktiyeet tehay'aatii daamta.
27 Baraah Haaruunwa yꞌareeyoohwa dehaay kanaaniiga d'iyaab iiktiyi gamis nꞌakw naayloonii shagaamiyaan.
28 Ooshaalwa,
tikoofiyaywa,
isirwalwa han n'akw naayloonii idꞌiin.
29 Imilbabi shaash aree kanaaniiga d'iyaab iiktiyi samaawiiwwa,
adaarhamaashwa,
kirkimiyaaywa nꞌakw naayloonii daamiya.
Beet toona Wꞌankwana Muusaab sooyaab iiktiyeet tehay'aatiit id'iin.
30 Baraah ootaaj umugaddasi shhaan nhas dimꞌaraay shagaamiyaaniit,
ukhaatimiit kehii naggashiyaan:
<<W'ankwanaay dehaay mugaddasu>> miyaad kehii naggashiyaan.
31 Malya baraah samaawi luul hooy yhakwirniit ushaashiib isꞌabikna.
Beet toona Wꞌankwana Muusaab sooyaab iiktiyeet tehay'aatiit id'iin.
Muusa Tukheemaati Dꞌuur Igwꞌad
32 Aflaay kassuuh ushaga tukheemaatiib iifiibwa,
Umajlisiit Tukheemaawwa faayamiyaan.
Yꞌisraaꞌiili Wꞌankwana Muusaab sooyaab iiktiyeet tehay'aatii naatka idꞌiin.
33 Malya Tukheema Muusaay dehaay haay eeyaan:
tukheemaawwa kasseeh igadhꞌeehwa,
yhindiiwwa,
itaraswa,
tikwilꞌiyaawwa,
wꞌasaaswa,
34 sabbakama argini hakooy daamaab usagifwa,
n'akw hakooy daamaab usagifwa,
tehooyteet sitaaraawwa,
35 Ugaladi Sanduuk y'aamuudeesoohwa w'asseenaayoohwa,
36 tutarabeesa kasseeh igadhꞌeesoohwa,
tikaraamaati hadhiiwwa,
37 nhas dimꞌaraayt lambaati m'abaka,
tilambaati safaawwa kasseeh igadh'eesoohwa,
tilambaati saliitwa,
38 idimꞌaraay karaamaati mhiinwa,
ushimuuti saliitwa,
oolbaan ooshikwaanwa,
tukheemaati dheefaayt sitaaraawwa,
39 ibalooyt karaamaati mhiinwa ibalooyt shabakaateehwa,
yꞌaamuudeehwa,
kasseeh igadhꞌeehwa,
ootashwa w'asaasoohwa,
40 whooshiit sitaaraawwa tikwilꞌiyaateehwa wꞌasaasoohwa,
whooshi dheefaayt sitaaraawwa,
teeyaywa tikheemaati gasani whooshiiwwa,
kasseeh tukheemaati gadhꞌiiwwa,
Umajlisiit Tukheemaawwa,
41 ifagiiriyaayi halaka idaawriib Oomhiin Umugaddasiib itookwkwiinwa,
ifagiiramti shaga shagaameenihoob eetkwiineeb Haaruun ufagiiriib yhalaka imugaddasaawwa,
yꞌareeyeeh yhalaka imugaddasaawwa id'iin.