Atoolwaat Karaamaati Mhiin
38
Basal'iil atoolwaat karaamaati mhiin gabaati hindiyee idꞌir.
Uumhiin 2 mitraawwa 2 santimitir gwimadu,
2 mitraawwa 2 santimitir marꞌa iikti,
1 mitirwa 3 santimitir tageegaawwa iikti.
2 Baruuh fadhigee irikwnaayeeb dꞌaab hooy id'i.
Aflaay aad'aawwa tikaraamaati mhiinwa gaal kit'ani iiktiin.
Tikaraamaati mhiin aree baloob istookw.
3 Baruuh kasseeh tikaraamaati mhiini gadhꞌi balooy shagaamiya.
Igidraawwa,
titooriyaywa,
eekaswa,
tushaati mik'abaawwa,
tun'eeti gidraawwa kasseeh balooy shagaamiya.
4 Balooyt shabaka idꞌiit tikaraamaati mhiini ginnaaliib whii daasiya.
Aflaay batuuh tikaraamaati mhiini tarab asti tiiktim.
5 Baruuh y'aamuuda ibalooyt shabaka fadhigee irikwnaayee haay is'ibkee dehaay,
balooy fay sabbakamaab shagaamiya.
6 Gabaati hindiyi aamuudaab idꞌiit baloob istookw.
7 Baruuh yꞌaamuuda ifayeeb shuumisiya.
Aflaay haay itfayiikni jillaay tikaraamaati mhiini kwayaay daasiya.
Tikaraamaati mhiin ilhaayee shagaamiyaayt tehooytee harar ikwaas.
Shagwadhi Tasha
8 Baruuh ibalooy tashaawwa ibalooy daamaab w'asaasoohwa,
Umajlisiit Tukheemaati dheefaay shagaamiint tim'ateet siw'aaliyaatee idꞌi.
Tukheemaati Hoosh
9 Malya Basal'iil Tukheemaati hoosh idꞌi.
Whoosh nꞌakw naayloonii amhaydaat sitaara hooy idi.
Tisitaara us'iidii 46 mitra gwimad iiktiin.
10 Tagwuugw kwil'iyaawwa,
tagwuugw balooy asaaswa iibri.
Tisitaara balooyt allaagaawwa birragwa iibriin.
11 Tugiblaati dar han 46 mitra gwimad iikti.
Tagwuugw kwil'iyaawwa,
tagwuugw balooy asaaswa iibri,
ashteetiit allaagaawwa birragwa tikwil'iyaati kehii iifiin.
12 Uyindhibi dar tisitaara 23 mitra gwimad iiktiin.
Tamint kwil'iyaawwa tamin asaaswa iibri.
Tikwil'iyaati kehii balooyt allaagaawwa birragwa iifiin.
13 Uyintalawi dar tifooteet jha han 23 mitra gwimad iikti.
14 Udheefaay dar gaalnaay iifiint tisitaara 6 mitraawwa 9 santimitir gwimadt iiktiin.
Mhayt kwil'iyaateebwa mhay asaasiibwa sh'oogamaata.
15 Whooshi dheefaay dar ooraawiib iifiint tisitaara aree 6 mitraawwa 9 santimitra gwimadt iiktiin.
Tisitaara mhayt kwil'iyaateebwa mhay asaasi kehiiwwa sh'oogamaata.
16 Whooshiib iifiint tisitaara kastaah nꞌakw naayloonii amhaydaata.
17 Tikwil'iyaati asaas balooy daamaabi.
Tikwil'iyaati kehii iifiint t'allaagaawwa,
ibirragwa ashteetii shagaamamaaba.
Tikwil'iyaati girma ashteet akwaya.
Aflaay kastaah whooshiit kwil'iya ashteeti birrag iibriin.
18 Udheefaayt tusitaara kanaaniiga haaydi shagaamaab iiktiyi samaawiiwwa,
adaarhamaashwa,
kirkimiyaaywa nꞌakw naayloonii shagaamamaati.
Batuuh 9 mitra gwimad tiikti,
2 mitraawwa 3 santimitir tageegaat tiikti,
aree whooshiit tisitaara t'iiteeti.
19 Batooh fadhigt kwil'iyaawwa fadhig balooy asaasi kehiiwwa ish'ag.
T'allaagaataahwa ibirragaahwa aree ashteetii daamaaba.
Tikwil'iyaati girma ashteet akwaya.
20 Kassaah tukheemaati gasaneewwa whooshiit taaseewwa balooy daamaaba.
Igadh'i Haay Shagaamiyaaneeb
21 Taan taana tukheemaati shagaay daamaata.
Tibadehaateet kheemaatiib malu aweeyi lha tiwasi titamin hooy katab iiktiineeb iifiin.
Teen teena Muusa sooyaabu,
Ilaawi aree shagaamaaba.
Ilaawi aree Itaamar Haaruuni oori whii shagaamiin.
22 Basal'iil Uuri oor,
Huuri oori oor,
Yahuudaayt tugabiilaatii ikatiib,
Wꞌankwana Muusaab sooyaneet toona kastooh idꞌi.
23 Ushamaamiigaayuuh Oohoolya Akhiisaamaaki oor,
Daaniit tugabiilaatii ikati,
naggashanaabu aree ustaabi.
Baruuh kanaaniiga haaydi iikti,
samaawiiwwa,
adaarhamaashwa,
kirkimiyaaywa nꞌakw naayloon yhiiyad.
24 Kassuuh idimꞌara Tukheema Tumugaddastii dehaay Wꞌankwanaayt karaamaateeb firꞌaab iiktiini alifwa ay tamuuntwa mhayt kiiloot iikti.
Oomhiin Umugaddasiib iifiib wꞌabaarii awdinamaabi.
25 Uudehay dhigwiyaab iiktiineet t'ashti aree mhay alfaawwa fadhig sheewwa mhay tamuunt (3,430) kiiloot iikti.
Oomhiin Umugaddasiib iifiib wꞌabaarii aree awdinamaabi.
26 Uudehay y'atehassibaab w'imruuhna tagwuugw hawla tari imhakwal iiktiyeeb gaalka ay giramwa tarab (5.5 giram) ashteetiib ikwiisna.
Oomhiin Umugaddasi w'abaarii awadinamaati.
Uudehay y'atehassibaab kassaah asagwir sheewwa mhay alfaawwa ay sheewwa ay tamuunwa (603,550) da iiktiin.
27 Tukheemaati sheeb asaaswa tisitaaraawwa haay id'iineet t'ashti mhay alfaawwa fadhig shi (3,400) kiiloot tiikti.
Asaas gaalnaay dehaayka 34 kiiloot ashteet daamiyaan.
28 T'ashteeti baagi imhiyaab aree 20 kiiloot iiktiib tikwil'iyaawwa t'allaagaawwa haay daamiyaan.
Tikwil'iyaati girmaawwa,
ibirragwa aree haay daamiyaan.
29 Uudehay fir'aab iiktiineet ibalooyt karaama aree malu alfaawwa fadhig sheewwa asaramaat (2,407) kiiloot iiktiin.
30 Been ibalooy aree Umajlisiit Tukheemaati dheefaay asaas haay daamiya.
Ibalooyt karaamaati mhiin,
ibalooyt shabakaatiisoohwa,
kassaah tikaraamaati mhiini gadhꞌiiwwa,
31 whooshiit tiseeti asaaswa,
whooshi dheefaawwa,
kassaah tukheemaati gasaneewwa,
whooshiit tiseeteeb iifiin igasaneewwa haay daamiyaan.