Ugaladi Sanduuk
37
Basal'iil gabaati hindiyee Ugaladi Sanduuk shagaamiya,
110 santimitra gwimad iikti,
66 santimitra marꞌa iikti,
66 santimitra tageegaab iikti.
2 Baruuh Usanduuk nhas dimꞌaraay tehooywa tisaradwa ikwibis,
aree dimꞌaraayt silt hooy ikwilil.
3 Fadhig haay itfayiikni fay dehaay sabbakiyaayt,
fadhigee iragadaayeeb aree yhaakwir.
Malu fay daraag gaalnaay id'i,
imalu fay eeraw oodar uraawiib id'i.
4 Malya gabaati hindi id'iit dim'araab istookw.
5 Y'aamuuda Usanduuk haay itfiyikni jillaay,
Usanduuki darageeb iifiin ifayeeb shashuumisiya.
6 Nhas dim'araay asseenaay id'i.
Wꞌasseenaay 110 santimitra gwimad iikti,
66 santimitra marꞌa iikti.
7 Malya malu Karoobiima dim'araay ikwitaayt w'asseenaayi fardaay id'i.
8 Karoobiim gaal fardaab gaalnaay id'i,
Ukaroobiim umalya aree ufarda uraawiib id'i.
Mhalleeh ifarda w'asseenaayiib gal ikwaas.
9 Ikaroobiim y'anbireehna asti birraaba,
wꞌasseenaay l'andalaasaaba.
Ikaroobiim taktaki fiiireeb iifiina,
aree w'asseenaay beeti nakamaaba.
Tutarabeesa
10 Baruuh tutarabeesa gabaati hindiyee shagaamiya,
88 santimitra gwimadwa,
44 santimitra marꞌaawwa,
66 santimitra tageegaawwa ikwaas.
11 Malya batooh nhas dimꞌaraay ikwibis,
dimꞌaraayt silt aree hooy ikwilil.
12 Masi silt hooy idꞌi.
Tuusil 75 millimitra marꞌa tiikti,
dimꞌaraayt sarraami aree hooy kwalaalti.
13 Tutarabeesaatii dehaay fadhig dimꞌaraay fay sabbakiya.
Tutarabeesaati ragada ifadhigeeb,
fadhigee irikwnaayeeb eefay yhaakwir.
14 Y'aamuuda tutarabeesa haay itfiyikneeb kaleewti jillaay eefay toosil isdawilaayt daasiya.
15 Yꞌaamuuda tutarabeesa haay yakisiineeb gabaati hindiyee daamaaba,
aree dimꞌaraab kwabala.
16 Tutarabeesaati gadhꞌi aree nhas dimꞌaraay shagaamiya.
Eeshhanwa,
oogdirwa,
tikwibbaywa,
eekas wha haay gw'iineebwa kasseeh nhas dimꞌaraay shagaamiya.
Tulambaati M'abak
17 Tulambaati m'abak atookwita dim'ara nhasnaay shagaamiya.
Tulambaati m'abak kassooh gaal kit'anii daawrariisiya.
W'assaasuuhwa ting'ataahwa,
ikasaahwa,
itadhayaahwa,
ufaaruuhwa kassaah gaanaatiib daamaaba.
18 Tulambaati m'abak asagwir l'id iibriina.
Mhay l'id dar gaalnaay iifiina,
aree mhay wari oodar uraawiib iifiin.
19 Mhay kas loosi faari shakil tꞌiiteeba,
tadhaytwa faarwa lꞌiid gaalnaay kehii iifiin.
Mhay oolꞌiid uraawiib iifiin.
Kassaah aalꞌid yꞌasagwir aree tulambaati m'abakaayee yakaaba.
20 Tulambaati m'abaki kehii fadhig kas iifiin.
Baraah loosi faari shakil tꞌiiteeba,
tadhaytwa faarwa aree kehii iifiin.
21 Tadhaayt gaat eel'id imalu isuuriini whii tiifi,
tulambaati m'abakii aree yakaabi.
Tutadhaay tumalya eel'id imalu irawi whii tiifi.
Tutadhaay tumhaya aree oolꞌiid umhayaay whii tiifi,
kassaah aree asagwir l'id iiktiin.
22 Titadhaywa aalꞌidwa kassaah tulambaati m'abakiib gaal kit'ani iiktiina,
nꞌakw dimꞌaraay aree atookwitaaba.
23 Baruuh asaramaat lamba dehaay shagaamiya.
Tulambaati gadh'i han nhas dimꞌaraay shagaamiya.
24 Baruuh tulambaawwa kasseeh igadhꞌeehwa 35 kiiloot nhas dimꞌaraay shagaamiya.
Oolbaaniit Karaamaati Mhiin
25 Baruuh oolbaaniit tikaraamaati mhiin gabaati hindiyee shagaamiya.
Uumhiin marabꞌat tꞌiiteebu,
45 santimitra gwimadwa,
45 santimitra marꞌaawwa,
90 santimitra tageegaawwa iikti.
Aad'a fadhigee irikwnaayeeb iifiin bariiyooh gaal kit'ani iiktiin.
26 Baruuh umhakwalwa kasseeh idaragwa eedꞌaawwa nhas dimꞌaraay shagaamiya,
dim'araayt silt aree hooy ikwilil.
27 Malya baruuh malu dim'araay fay shagaamiyaayt toosilti whii id'i.
Baliib haay itfiyikneeb Y'aamuuda is'ibki jillaay,
taktaki fiireeb iifiin idarageebka malu fay id'i.
28 Baruuh gabaati hindiyee aamuudaab idꞌiit dimꞌaraab istookw.
29 Baruuh masi ushimuuti saliit umugaddaswa,
nhas libaan shikwaan,
shakwiinaati kanaaniiga shagaamaab iiktiyeebwa idꞌi.