36
Aflaay Basal'iilwa,
Oohoolyaawwa,
ikanaaniiga aaraw Wꞌankwana Tukheema tumugaddasti dꞌuuri taadwa kanaantwa sookinaab iiktiyeebwa kassaah,
Wꞌankwana sooyaab iiktiyeet tehayꞌaatiit shagaameena.>>
idi Muusa.
2 Malya Muusa Basal'iilwa Oohoolyaawwa,
ikanaaniiga kasseeh Wꞌankwana ootaad hiiyyaab iiktiyeebwa,
baliin y'eetiit ishagaay shagaamti yhiriw bareeh waliikiya.
3 Yꞌisraaꞌiili Tukheema tumugaddasti dꞌuuri jillaay haay yꞌaab iiktiineet tikaraama kasteeh Muusaay nuunamiyaan.
Uudehay aree iknaayeet niyaatii fajir-fajir karaamaat haay eeyaan.
4 Aflaay kassaah y'ista kassooh ushaga tukheema tumugaddastiib shagaamiin baliin ushagaayoohna yꞌishniit,
5 Muusaay dehaay,
<<Uudehay Wꞌankwana sooyaab iiktiyeet toonaatiika gwidakaana ushagaay dehaay haay y'een.>>
idiin.
6 Malya Muusa,
<<Aanda tari taam'a,
Tukheema tumugaddastii dehaay gaal han weena karaamaat haay baam'aana.>>
idiit oodehay sooya,
aree baraah han een ibhali kassooh umꞌaskariib hadiidiyaan.
Aflaay uudehay weena haay yꞌaab kiikeen.
7 Baraah suur iibriineet tuuna kassooh ushagaay faaysitii dehaay mhaatu aree gwidakaana tiifi.
Tukheema
8 Tukheemaati shagaamanaayeeb aanda y'ista gwidakaab iiktiin.
Baraah tukheemaatiit sitaara n'akw naayloonii shagaamiyaan.
Samaawiiwwa,
adaarhamaashwa,
kirkimiyaaywa hibraayee id'iin.
Kanaaniiga haaydi d'iyaab iiktiyi karoobiim hooy arsimiyaana.
9 Tisitaara kastaah nadiir iiktiin,
12 mitra gwimad iiktiin,
2 mitra marꞌa iiktiin.
10 Baraah ayt sitaara taktakeeb yhayidna,
tisitaara t'ay teeraw han bak id'iin.
11 Malya baraah yhalaka eengalneeb tusitaaraati agiyaay dar gaalnaay ginnaaliib samaawiit sh'oogi id'iin.
Yhalaka iraweeb han tusitaaraati agiyaay bak t'iiteena id'iin.
12 Baraah masi ayt tamuun sh'oogiyaat sitaaraat gaanaatiib id'iina,
yhalaka iraweeb han tusitaaraati agiyaay ayt tamuun sh'oogiya id'iin.
Tish'oogiya taktaki fiireeb id'iin.
13 Malya baraah ay tamuun dimꞌaraay birrag idꞌiiniit,
tisitaaraateet majmuu'a mhalliteeh taktak haay isꞌabikna.
Aflaay tukheema gaana tiki.
14 Baraah Tukheemaati asseenaayii dehaay tamna gwirt sitaara yaati hamooyee shagaamiyaan.
15 Tisitaara titamna gwir kastaah nadiira,
13 mitra gwimad iiktiin,
2 mitra marꞌa iiktiin.
16 Ayt sitaara gaat majmuuꞌaatiib ishaawawiina,
teeraw tꞌasagwir aree weet majmuuꞌaatiib ishaawawiin.
17 Malya baraah ayt tamuun sh'oogi tusitaaraati agiyaay ginnaaliib majmuuꞌaat gaanaatiib id'iin.
Tumajmuu'a turaawtiib han tusitaaraati agiyaay ginnaaliib bak id'iin.
18 Baraah tukheema haakwirtiit gaat iikwsiini jillaay,
ay tamuun balooy birrag idꞌiin.
19 Malya baraah argini haku sabbakamaanaay tukheemaatii dehaay asseenaay shagaamiyaan.
Bariiyooh mhakwal barraay asseenaay n'akw galooy id'iin.
20 Baraah tukheemaati kirra gabaati hindi lhaayee y'aatimna.
21 Uulha gaalka 4 mitra gwimad iikti,
66 santimitra marꞌa iikti.
22 Oolha gaalnaay kwayaayka malu gasani daamiyaan.
Baraah tukheemaati lha kasseeh bak id'irna.
23 Tukheemaati sꞌiidiib tagwuugw lha hooy idꞌiin.
24 Aree fadhig tamuun ashteeti asaas eelhaayi whii idꞌiin.
Oolha oongaalka malu asaas dehaay id'iina,
igasani w'asaasiib daayiib shashuumisiyaan.
25 Oodar ooraaw aree,
tukheemaatiit giblaatiib han tagwuugw lha idꞌiin.
26 Fadhig tamuun ashteeti asaas hooy idꞌiina,
oolha gaalnaay whiika malu asaas idꞌiin.
27 Baraah tukheemaati farda w'agiyaay dehaay,
uyindhibiit jhaatiib asagwir lha idꞌiin.
28 Tukheemaati fardaay irikwinaayee dehaay malu lha id'iin.
29 Een irikwina imalooyeeb aree aalha whiisii imhakwal ookiik maloob-maloob iiktiina aree gaat kwiluuliitiib shuumiyaan.
Irikwina mhallaah gaalka bak daamiyaan.
30 Aflaay beentooy asimhay lhaawwa,
tamna asagwir ashteeti asaaswa iifiin.
Oolha gaalnaay whiika malu asaas iifiin.
31 Baraah masi gabaati hindiyee taras shagaamiyaan.
Ay taras tukheemaati dar gaalnaay iifiin ilhaayee dehaaywa,
32 ay wari aree oodar ooraawii dehaaywa,
tukheemaati farda usagiinaay uyindhibiib iifiin ilhaayee dehaaywa,
aree ay taras shagaamiyaan.
33 Baraah utaraas ibitkeenaay idꞌiin.
Aflaay baruuh ufarda oongaalnaay ooraaw ookiik ilhaayi bitik daamiya.
34 Baraah eelha dim'araab istookwna.
Dim'araay fay itaras kaleeween id'iin.
Itaras han dim'araab istookwna.
35 Baraah samaawiitwa,
adaarhamaashwa,
kirkimiyaaywa n'akw naayloonii sitaaraat shagaamiyaan.
Kanaaniiga haaydi shagaamaab iiktiyi Karoobiim hooy arsimiyaan.
36 Fadhig gabaati hindiit kwilꞌiya dehaay idꞌiin.
Bateeh dimꞌaraab istookwna.
Dimꞌaraayt allaaga dehaay id'iiniit fadhig ashteeti asaas kehii yakisiyaan.
37 Tukheemaati dheefaay dehaay aree kanaaniiga haaydi shagaamaab iiktiyeet sitaaraat samaawiiwwa,
adaarhamaashwa,
kirkimiyaaywa daayiib amhayda n'akw naayloonii shagaamiyaan.
38 Toon tusitaaraatii dehaay aree ayt kwilꞌiya allaagaat iibriint shagaamiyaan.
Tikwilꞌiyaati girmaawwa eefaywa dimꞌaraab istookwna,
ay balooy asaas aree dehaay idꞌiin.