Toosabti Gaanuun
35
Muusa kasseeh Yꞌisraaꞌiili idbilaayt,
<<Teen teena tid'aneet toona Wꞌankwana waseeya hookna:
2 Ishaga asagwir bꞌi daamiini,
laakiin oomb'i wꞌasarama mugaddas bꞌeeyookna ikati.
Tuusab Wꞌankwanaayt fiinaniiteet yint tikati.
Toosab naat han shagaamiiniibka ibakii itoodiir.
3 Tusabtiit yint igawaayeekna n'eet hooy baatalawsaana.>>
idi.
Tukheemaatii Dehaay Gadh'i Miyaaw
4 Muusa kasseeh Yꞌisraaꞌiili dehayii dehaay,
<<Toon toona Wꞌankwana haay waseeyaabu:
5 Titibariineetii Wꞌankwanaay dehaay karaamaat firꞌana.
Wꞌankwanaay dehaay dimꞌaraawwa,
ashteetwa,
baloobwa karaamaati firꞌa harriiwka,
6 samaawiibwa,
adaarhamaashwa,
kirkimiyaay nꞌakw naayloonwa,
yaati hamoowwa,
7 hakoob arginiib adaru sibaakiib takwaywa,
nꞌakw galoowwa,
gabaati hindiiwwa,
8 tilambaati saytuuni saliitwa,
shimuutiit shakwiinaawwa,
shikwaan libaanwa,
9 alya aweewwa,
wari jawharaawwa aree eefoodwa iginheet sideeriitii kehiiwwa daameen haay m'aana.
10 Baliin y'ista geebookna eefeen kassaah yꞌeetiit Wꞌankwana waseeyaneet teena kasteeh idꞌaneet toonaati:
11 tukheema tumugaddas tehooywa tusaraadti asseenaaywa,
im'abakaawwa,
tikwiluuliiwwa,
itaraswa,
tikwil'iyaawwa y'asaaseehwa,
12 Ugaladi Sanduuk aamuudaayeesoohwa,
ugaladi sanduuki asseenaaywa,
tusitaara barooh kwanbiiswa,
13 tutarabeesa aamuudaayeesoohwa,
kasseeh igadhꞌeehwa,
Ukwaasanaayt karaamaati hadhiiwwa,
14 tulamba gadhꞌeesoohwa isaliitwa,
15 oolbaaniit karaamaati mhiin aamuudaayeesoohwa,
shimuuti saliitwa shikwaan libaanwa,
tukheemaati dheefaay daamtiniit tusitaaraawwa,
16 atoolwaat karaamaati mhiin ibalooy shabakiisoohwa yꞌaamuudaayeehwa kasseeh igadhꞌeehwa,
ibalooy shagwadhi tash w'asaasiisoohwa,
17 whooshiit sitaara tikwil'iyaateesoohwa w'asaasiisoohwa,
whooshi dheefaay daameent whooshiit sitaaraawwa,
18 tukheemaati gasaneewwa,
whooshi gasaneewwa tiyayteehwa,
19 Haaruun ufagiiriiwwa Yꞌaraahwa oomhiin Umugaddasiib shagaameenihoob eetkwiineeb yhalaka imugaddasaawwa,
y'ista id'aneet toonaati.>>
idi.
20 Malya kassaah Yꞌisraaꞌiili dehay Muusaab y'ishni giigiyaan.
21 Malya baliin Umajlisiit Tukheemaati shagaamti jillaay W'ankwanaay dehaay karaamaati mhalti yhariw kassaah karaamaat haay eeyaan.
Baraah ibaadaati jillaay ateharriwaana kastooh haay eeyaana,
yhalaka imugaddasaayi shagaamtii dehaay han naatka haay eeyaan.
22 Aandaawwa taamꞌatwa kassaah tikaraamaati mhalti yhariw eeyaaniit,
dimꞌaraay jawhara kasseeh ijinsaayeesooh haay eeyaan.
Giweeshaawwa,
tillalwa,
khaatimaawwa,
miskataatwa haay eeyaan.
Kassooh idimꞌaraayoohna haay eeyaaniit,
Wꞌankwanaay dehaay karramamiyaan.
23 Gaalka samaawiibwa,
adaarhamaashwa tari kirkimiyaay nꞌakw naayloonwa,
tari yaati hamoowwa,
argini haku sabbakamaabwa,
tari nꞌakw galoowwa haay eeyaan.
24 Baliin ashteetiit tari balooyt karaama mhaliin aree tikaraama Wꞌankwanaay dehaay haay eeyaan.
Baliin gabaati hindi naatka haay iitkwikwneeb iibriin han haay eeyaan.
25 Taamꞌa t'ista yꞌayeesoohna isidna aree toona tehayshaat iiktiineet haay eeyaan.
Bataah samaawiibwa,
adaarhamaashwa tari kirkimiyay lilee hayshaat iiktiineenaawwa,
tari nꞌakw naayloonwa haay eeyaan.
26 Taamꞌa kastaah whayuudiit kanaan iibriint,
afirhaa yaati hamooyee lil shagaamiyaan.
27 Isuurkina alya aweebwa wari jawharaawwa haay eeyaaniit eefoodwa iginheet sideeriitiibwa yhaayidna.
28 Baraah masi shakwiinaatwa,
saytuuni saliit tilambaatee dehaaywa,
shimuuti saliitwa,
shikwaan libaanwa haay eeyaan.
29 Kassaah Yꞌisraaꞌiili aandaawwa taam'atwa Wꞌankwanaay dehaay karaamaat mhaltiib yhiriw baliin tikaraamaateehna haay eeyaan.
Wꞌankwana Muusaay geebii bareeh sooyaab iiktiyeeb ushaga kassooh shagaamiini jillaay,
baraah fadaagt niyaatii fir'aab iiktiineet tikaraamaateehna haay eeyaan.
Basal'iilwa Oohoolyaawwa
30 Malya Muusa Yꞌisraaꞌiilee dehaay,
<<Shibibna,
Wꞌankwana Basal'iil Uuri oor,
Huuri oor,
Yahuudaayt tugabiilaatii ikatiib waasiya.
31 Barooh aree Ukwaasanaay Ishuukee itib,
kanaantwa,
taadwa,
kassooh inaggashti shagaayt fhamaawwa itib.
32 Dim'araaywa,
ashteetiiwwa,
balooywa shagaamiit eetkwiikwi naggashtiiwwa,
33 aweeb kitꞌatiit taktaki dadaasiiniyi jillaaywa,
yhindi hashtiiwwa,
kasteeh tinaateeb ustaab ikwaas.
34 Baroohwa Oohoolyaab Ahiisamaashi oor,
Daaniit tugabiilaatii ikatiibwa,
mhalleehna oodehay ooraaw haay allameeni taad yhii.
35 Whashtiiwwa,
inaggashtiiwwa,
whayuudwa kassooh ushagaayt kanaant bareeh itib.
Samaawiibwa,
adaarhamaashwa,
kirkimiyaay nꞌakw naaylooni whayuudiibwa,
kasteeh tinaateeb bareeh istaabwa kanaaniigaabwa ikwaas.