Gayi Aweeyi Lha
34
Wꞌankwana Muusaay dehaay,
<<Malu aweeyi lha kat'a,
yꞌawi isuureeb tꞌiiteeb kwaasa.
Baruuk tikit'eeb eelha y'awwaliineeb katabt tikalma kehii iiktib andi.
2 Fajir maraat oorba Siinaay asti reewa.
Beentooy aree oorbaay mooyiib uknaayuuk miriyaheeb.
3 Gaal geebook biiyꞌay tari oorbaay kehii mhiin gaal han biilawayeet toonaati.
Taaya tari aashꞌa han oorbaay suurii kiikwiriina.>>
idi.
4 Aflaay Muusa yꞌawi isuuriib tꞌiiteena malu awi katꞌiyaayt,
oorba Siinaay karuumaab haay reewiya.
Wꞌankwana barooh sooyaneet toonaatiit,
yꞌaweeyi lha imalu ifiyakaayt oorba reewiya.
5 Malya Wꞌankwana bꞌaluukiib ikwibaraayt bariiyooh geeb beentooy ingad.
Wꞌankwana aree oosmooh ookna isim.
6 Baruuh Muusaay suuriisii hasamiyaayt sooya,
<<Wꞌankwana,
Wꞌankwana,
un'akwmanaayana urahiim,
diiseet gadabiiniib,
gwidaat shibootiibwa usidkiibwa,
7 tudaayiinaay y'alfa taas ookiik danbi.
Toomaagwa,
oofinaawwa idanuubwa afooyiini.
Laakiin toomaag gwanbiib jasaamaab baakaay kii'ish.
Baruuh yꞌarwa,
y'ari arwa ibaabeet maagnaaytii dehaay ootaas umhayaawwa ufadhigaawwa ookiik jasaayiini.>>
idi.
8 Muusa willa kuuramiyaayt asjidiya.
9 Baruuh <<Wꞌankwanaay,
bariiyook oorda amarriyeek,
aflaay Wꞌankwana geeboon bagiigi.
Uun uudehay akra girmaay ikatiin.
Laakiin baruuk tumaagtoonwa idanuubeenwa afooya,
aree bariiyook dehay kwaasa hoon.>>
idi.
10 Malya Wꞌankwana,
<<Ani galad geebook ahankwiir.
Kassooh udehayyook suurii ani mꞌuujisaat iikwasi andi.
Teen timꞌuujisa t'iiteet kastooh tuduniyaatiib haash gaalnaay han daamaat kiikeen.
11 Amsi ani andiyeet toona sinaakira.
Ani Yꞌamooraawwa,
Ikanꞌaaniiwwa,
Yhittaayiiwwa,
Ifarasiiwwa,
Yhiiwiiwwa,
Iyabuusiiwwa suurook isiikw andi.
12 Whaash ubaruuk teebiyeenaay ikweer oodehayi geeb galad baad'iya,
digwagwa.
Bak saktiniyeek,
baraah sharak hookna iiktiin iyadna.
13 Tikaraamaati mhiinaneehna katꞌaana,
y'aweeyeehna imugaddasa rhagwna,
tusanam Ashiiraay y'aamuuda kat'aana.
14 Weer kwaasana baaꞌabiidna.
Wꞌankwana oosmooh Ugiiraatiyaay ittiyoodiyayt,
Ukwaasana giiraati Kwaasana ikati.
15 Digwagwna,
baliib whaashiib ikweerni geeb galad baadꞌiina.
Baraah sanamaayi ankwana abidtiit karaamaat dehaay yheeriidna.
Malya bareeyooh geeb tamteeni jillaay waliikeen hookna.
Isanamaayeehna dehaay ifarꞌaneet timꞌari tamseen hookna.
16 Yꞌaraakna baliit teemꞌa tigirbaat eedꞌirna.
Bataah sanamaab y'abidna,
y'areekna han sanamaab s'abidtiit kwakwidhseen.
17 Sabbakama sanama baashagaamaana.
18 Ufatiiri Hadhiyi Iid iidaana.
Ani sooyaneetookna toonaatiit,
asarama bꞌi ootrig Abiibiib fitra hadhi tamaana.
Been ootrig baraakna Masree tifr'ana.
19 W'awwal firaayi ar kassaah aniib ikatiin.
Ureewiisook w'awwal firaayiib iraba han aniib ikatiin.
20 Laakiin imaki awwal firaay arginii dilba tiniina.
Bitdaliibeek aree tꞌala kitꞌa.
Yꞌareekna isuurkina kasseeh dilibna ahaana.
Anii suurii aree gaal han harar ayee biilawayeet toonaati.
21 Ishagaayookna hooy tidꞌaneeb asagwir bꞌi eefeen.
Laakiin oombꞌi wꞌasarama fiinaana.
Wꞌaduuyi door tari uwaaki door ikatiyeek han ibakii fiinaana.
22 T'asaramaati W'iid aree igamhii atoowkaab igangara y'awwaliinee iidaana.
Dibuuli Iid aree whawli agiyaay iidaana.
23 Kassaah aanda whawliib mhay doora Wꞌankwana Israaꞌiileeb Ukwaasanaay suurii ibakii laweeneet toonaati.
24 Ani idehaya suurookna sikwiitiit whaashookna ismirꞌa andi.
Whawliib mhay doora Wꞌankwana Ukwaasanaayookna suurii lawteeni jillaay giigteenihoob,
whaashookna gaal han yꞌibik kiidi.
25 Tikaraamaati booy anii dehaay tifarꞌanihoob,
hamiir tibariina han geeb baafirꞌana.
Whasamti Iidiit karaama aree fajir ookiik naat han hooy baa'iishna.
26 Hawilka aree tidir'aatiisook igangara y'awwaliib idaayiinee Wꞌankwana Ukwaasanaayook oogaw beeti haay mꞌaa.
Abat tari ab aree tundeetiit aateeb baatikwiya.>>
idi.
27 Malya Wꞌankwana Muusaay dehaay,
<<Een ibhali kitiba,
een ibhaliyee aree ani barookwa Yꞌisraaꞌiili geebwa galad d'iyaabi.>>
idi.
28 Muusa beentooy Wꞌankwanaay geeb fadhig tamuun bꞌeewwa fadhig tamuun hawadwa mꞌariit tamaab baakaay tari yam gwꞌaab baakaay yhagit.
Ugaladiit kalma tiwasi titamin aree yꞌaweeyi lhaayi kehii iktib.
Muusaab Aafiir Buubeen
29 Muusa eelha imalu Itibadehaateeb iyhaayt oorba Siinaayee tikwiyanihoob,
baruuh Wꞌankwana bhaliisamaabuuyt ifiiraah buubiyaan.
Laakiin baruuh beet toona kanaab kiiki.
30 Haaruunwa Yꞌisraaꞌiili kassaahwa Muusaab rhiyaanihoob,
ifiiraah buubee rhiyaan.
Barooh iidwilneet toona aree irkwiin.
31 Laakiin Muusa bareeh waliikiya.
Aflaay Haaruunwa kassaah oodehayi suurkinaawwa barooh beeti yꞌagarna.
Baruuh han bareeh bhaliisamiya.
32 Malya Yꞌisraaꞌiili kassaah barooh beeti eeyaan.
Baruuh han Wꞌankwana oorba Siinaayeeb sooyaneet tiwasi kasteeh bareeh yhii.
33 Muusa bareeh ibhaliisamti faayisiyanihoob,
ifiireeh halak kehii daasiya.
34 Laakiin baruuh Wꞌankwanaay ibhaliisamti jillaay bariiyooh suurii ingideebka,
itfirꞌeeb ookiik whalak hoosooh giigsi.
Baruuh itfirꞌihoob aree Yꞌisraaꞌiili tiwasi tiwaseemaab iiktiyeet sooya.
35 Baraah iishbibnihoob bariiyeeh eefiir buubee rhiyaan.
Aflaay Muusa ifiireeh whalakii ikwibis.
Wꞌankwanaay ibhaliisamtiib giigiyeebka ifiireesooh whalak giigsi.