33
01 Malya Wꞌankwana Muusaay dehaay,
<<Baruukwa oodehay Masree haay eetaneebwa oon whaash hooy giigaana.
Ani Ibraahiimwa Isehaagwa Yaaguubii dehaaywa halafooytii waadiyaayaneeb whaash beeti asti beena.
Ani bareeyooh dehaay,
<Oon barooh ani yꞌareekna iyaaw andi.>
diyaabi.
02 Ani suurook malak iifdig andi,
Ikanꞌaaniiwwa,
Yꞌamooraawwa,
Yhittaayiiwwa,
Ifarasaawwa,
Yhiiwiiwwa,
Iyaabuusiiwwa aree hooy giigsi andi.
03 Whaash aatwa awitwa kwaaniiniib beeti asti difna.
Laakiin ani geebookna giigi kaadi.
Baraakna amaag niyaatiibaanayt,
kwidhsatookna y'ani miyaadiib geebookna giigi kaadi.>>
idi.
04 Uudehay teen tehamiit kalma imaasiwnihoob,
gadabiyaaniit gaal han jawhar hoosooh hakwiraab kiiki.
05 Wꞌankwana Muusaay dehaay,
<<Yꞌisraaꞌiili sooya,
<Baraakna amaag niyaati dehayaana.
Ani shalikt midda han geebookna giiganiyeek kwidhsatookna y'ani.
Oontꞌa ijawharaayeekna firꞌana,
naan tidꞌaneeb aree ani iimkir andi.>
diyaabi.>>
idi.
06 Aflaay Yꞌisraaꞌiili ijawharaayeehna oorba Hooreeb hoosoohna farꞌiyaan.
Umajlisiit Tukheema
07 Oontꞌa Muusa kheemaat yakisiyaayt umꞌaskarii barraab isiisag gagasiyaayt,
<<Umajlisiit Kheema.>>
iisim.
Wꞌankwanaay naat yhiriwka aree Umajlisiit Tukheema umꞌaskarii barraab tiifiit iibi.
08 Muusa tukheema beeti iibiyeebka,
uudehay kassuuh firꞌatiit tikheemaatiyeehna dheefaayeeb ingidna.
Muusa tukheema shuumiyeeb ookiik aree iishbibna.
09 Muusa tukheema shuumiyeet midda,
bꞌaluuki aamuud yꞌeetiit tukheemaati dheefaay ingid.
Beenhoob Wꞌankwana Muusaab bhaliisami.
10 Uudehay ibꞌaluuki aamuud tukheemaati dheefaay gadee rhiyaaneebka,
kassaah asti gadtiit asjidiin.
Gaalka aree tukheemaatiyooh dheefaay asjidi.
11 Wꞌankwana Muusaay geeb fiir fiiree bhaliisami.
Ootak wꞌaraawooh bhaliisamiiniib tꞌiiteena bhaliisami.
Malya Muusa umꞌaskar beeti itꞌigir.
Laakiin ushamaamiigaayuuh w'oor uudis Jooshiwa Nuuni oor tukheemaatii kagiigiya.
Muusaawwa W'ankwanaay Umatuunwa
12 Bꞌeeb gaal Muusa Wꞌankwanaay dehaay,
<<Baruuk <Oon oodehay suurkinaama.>
tidiyaheeb.
Laakiin aab geebu giigsi tindiyeeb sooyaayu kitta.
Malya baruuk <Oosmii akteen hook,
aniib oorda tibariya.>
tidiya.
13 Ani sidik bariiyook oorda ahaab akatiyeek,
isalalaayeek sookinaheeb.
Aflaay daayiib iikan hook andi,
diimaab bariiyook oorda aree imaar andi.
Uun uudehay aree dehayook ikatiyeet toona shꞌaa.>>
idi.
14 Wꞌankwana dehaay igwibi,
<<Muusa ani uknaayu geebook giigi andi,
fiinsi hook andi.>>
idi.
15 Malya Muusa bariiyooh dehaay,
<<Baruuk geeboon bitgiigayeek,
oon oomhiinii baagiigsa hoon.
16 Baruuk geeboon bitgiigayeek,
aneebwa udehayookwa dehoon radaayaab tikatiyeet toona uudehay kassuuh kak iikan iyadna?
Aneebwa udehayookwa,
oodehay ooraaw tubuuti kehii eefeebwa naan tisfalli hoon?>>
idi.
17 Wꞌankwana Muusaay dehaay,
<<Toona baruuk raattaneet iiwari andi,
baruuk aniib oorda tibariya akay,
oosmiisook akteen hook.>>
idi.
18 Muusa han <<Umatuunook rhisaaheeb.>>
idi.
19 Wꞌankwana igwibi,
<<Kastooh aniit tudaayiinaay suurook hassi andi,
oosmu (W'ankwana) suurook sooyi andi.
Ani waasaniyeebka arhami andi,
aree dehaay n'akwmanaayi andi.
20 Laakiin baruuk aniib eefiir eekna irhiti ka'adgirta.
Aneeb rhiiniib gaal han kiidhhan.