Idim'araay Laga
32
01 Uudehay Muusa oorbaay n'ati gadehamtiib idleeleet toona rhiyaanihoob,
Haaruunii dehaay immarraayna,
<<Mꞌaa!
Idabaayyoon sakeen kwaasana galib dehoon shagaama.
Oon Muusaab Masreeb whaashii isfar'oon naan dehaay tikayeeb nigam.>>
idiin.
02 Haaruun bareeyooh dehaay igwibi,
<<Timꞌateeyookwa,
yꞌareeyookwa,
tꞌarteeyookwa y'angwileeb eefeen idimꞌaraay tillal ahaanaat tooy haay mꞌaanaheeb!>>
idi.
03 Aflaay uudehay kassuuh idimꞌaraay tillal yꞌangwileesoohna farꞌiyaaniit Haaruunii dehaay haay eeyaan.
04 Malya Haaruun idimꞌara yakisiyaayt ikwit aree lagaayt hayꞌaatiit ilaawi.
Malya baraah <<Yaa Israaꞌiil,
uun baruuh kwaasanaayooku,
Masreeb whaashii isfarꞌa hook!>>
idiin.
05 Haaruun beet toona rhiyanihoob,
ulagaay suurii karaamaati mhiin shagaamiyaayt sooya,
<<Lhayt Wꞌankwanaay wꞌiid iikti indi!>>
idi.
06 Aflaay tooyin tooraaw uudehay iskarimniit atoolwaat karaamaawwa um'asgiit karaamaawwa yhaaridna.
Malya aduumaat id'iina,
gwꞌiyaana aree tamiyaan.
Askirtiib yakiyaana,
jikuuniib sakiyaan.
07 Wꞌankwana Muusaay dehaay,
<<Ashshigaa!
Oorba hooy gadehamaa!
Masreeb whaashii haay eetaneeb udehayuuk imagna.
08 Baraah ani waseeyaneet toonaatii fidnaab yakiyaana,
lagaayt hay'aati sanam iknaayee dehaay shagaamiyaan.
Baraah ulagaay dehaay asjidiyaana,
aree karaamaat dehaay yhaaridniit,
<Yaa Israa'iil,
uun baruuh ukwaasanaayook ubarook Masreeb whaashii isfar'a ikati.>
idiin.>>
idi.
09 Wꞌankwana Muusaay dehaay,
<<Ani oon oodehay rhan,
baraah akra girmaay dehaya.
10 Oontꞌa baruuk hoosu giigaa.
Aflaay aniib igadab bareeh iiliw iyadna.
Bareeh kwidhsi andi.
Malya barook akra dehay iikwasi hook andi.>>
idi.
11 Laakiin Muusa Wꞌankwana Ukwaasanaayooh shiboot yhariwaayt,
<<Yaa Wꞌankwanaay,
udehayiisook naanhooy gadabtiniya?
Bareeh Masree win matuuniiwwa akra ayiiwwa sifar'aab kitta han?
12 Imasri naanhooy bak iyadna,
<Baruuh bareeh amaagt niyaatii isfarꞌa,
irbaayeeb daartiit toobuuti kehiisii hantiyee dehaay isfarꞌa han?>
iyadna.
Igadabeek yꞌakraab hooy agara,
oodehayook gwirhaab kehii baad'iya.
13 Ikishiyaayeek Ibraahiimwa,
Isehaagwa,
Yaaguubwa shꞌaa!
Baruuk uknaayuuk bareeyooh dehaay halafoota,
<Yꞌareekna yhayikw itibreeteeb tꞌiiteena gwidaab iikwasi andi.
Utaasookna aree oon whaash ibareeyooh dehaay waadiyaayaneeb kassooh iyaaw andi.
Uun whaash diimaab bareetooh kwasa iikti indi.>
tidiya.>>
idi.
14 Malya Wꞌankwana tehasiyaay hooy yꞌagar,
udehayooh han baruuh haay ifikeeb igwirha kehii kwaasaab kiiki.
15 Muusa y'agaraayt oorbaay tikwiya,
tibadehaati y'aweeyi lha imalu w'ayyooh fiyakee haay gadehamiya.
Yꞌawi mhalleeh idaraayee suuriisiiwwa har'iisiiwwa katab hooy naggashamaaba.
16 Yꞌawi Ukwaasanaay ibhali iiktiin,
ikatab aree Ukwaasanaay katab iiktiin aree yꞌaweeyeeb naggashamaaba.
17 Jooshiwa oodehay kwakwinhee,
bhaliiyee imaasiwihoob,
Muusaay dehaay,
<<Oon umꞌaskariib finaay hiss eefi.>>
idi.
18 Muusa dehaay igwibi:
<<Uun baruuh nasraati hiss kiiki,
migreebti hiss kiiki,
ani kafaati hiss eemsiiw.>>
idi.
19 Muusa umꞌaskar idwilihoob,
lagaabwa dehay hawaayiibwa rhiya.
Baruuh yhasaayt yꞌaweeyi lha yꞌayeesooh fidnaab igidaayt,
oorbaay whii firkak ikeen.
20 Baruuh ulaga baraah shagaamiyaaneeb yakisiyaayt nꞌeetiib iliw.
Malya barooh huugiyaayt iyameeb isbidaayt Yꞌisraaꞌiili hooy gwꞌasiya.
21 Baruuh Haaruunii dehaay,
<<Uun uudehay naan hook idꞌiiniit bak tꞌiiteet akraat maagnaayt beeti tistooba?>>
idi.
22 Haaruun igwibi,
<<Baahasaya wꞌankwanaayu,
uun uudehay toomaag yhariwneet toona tikteena.
23 Baraah anii dehaay,
<Hinin kwaasanaab idabaayyoon sakeen dehoon d'iya.
Uun Muusa hinin Masree isfar'a hoon,
oontꞌa naan dehaay tikayeeb kinkan.>
idiin.
24 Aflaay ani bareeh sooyan,
<Dimꞌaraay jawhar ibariibka,
mhalaana.>
adi.
Malya baraah idimꞌara yhiinheeb.
Ani idimꞌara toonꞌeetiib agidehoob,
oon ulaga ikaayt eeya!>>
idi.
25 Muusa uudehay kwidhiib eefeeneet toona rhiya.
Haaruun aree bareeh itꞌabiik baakay ikwaaseet toona rhiya.
Aflaay baraah yꞌashooyeehna hoosoohna isfaayidna.
26 Aflaay baruuh umꞌaskari dheefaay ingadaayt,
<<Wꞌankwanaay ikatiibka aneeb beeti mꞌaana.>>
idi.
Kassaah Ilaawi aree barooh beeti idbalna.
27 Malya baruuh bareeyooh dehaay,
<<Toon toona Wꞌankwana Israaꞌiileeb Ukwaasana indi:
<Gaalka bꞌadhadh yaksaanaat,
umꞌaskariib hantataayaana,
gidehoohwa dasoohwa sakaana,
fardaab gaalnaay ufarda ooraaw ookiik sakaana.
Gaalka usanoohwa wꞌaraawoohwa ushawwoohwa indiir.>
indi.>>
idi.
28 Ilaawi Muusa sooyaneet toona idꞌiin.
Beet tooyin aree mhay alfa iiktiin dehay itoodaarna.
29 Malya Muusa,
<<Baraak yꞌareekwa isanaayeekwa eekna timoomaagnayt,
amsi Wꞌankwanaay dehaay waasamtaana.
Amsi baruuh baarakiya hookna.>>
idi.
30 Tooyin tooraaw Muusa oodehayii dehaay,
<<Baraak akra danuub tikwaasna.
Laakiin oontꞌa ani Wꞌankwana beeti asti reeweetiit kisib afoob dehookna imaar andi.>>
idi.
31 Aflaay Muusa Wꞌankwana beeti yꞌagaraayt,
<<Uun uudehay akra danuub ikwaasna.
Baraah igarooyeehna dehaay dimꞌaraay sanama shagaamiyaan.
32 Laakiin oontꞌa anaahook idanuubeehna afooya.
Laakiin bit'afooyayeek,
aflaay ooktaabiib tiktibeeb ismaayee aniib oosim hatiya.>>
idi.
33 Wꞌankwana Muusaay dehaay igwibi,
<<Anii kehii danuub ikwasiibka,
oosmooh uktaabiisu giigsi andi.
34 Oontꞌa difaat oodehay ani sooyaneeyook oomhiin beeti milha,
aniib umalak suurook saki indi.
Laakiin aniib ujasaay door ikatiyihoob,
bareeh idanuubeehna dehaay jasaayi andi.>>
idi.
35 Baraah Haaruun isidꞌiineeb idimꞌaraay lagaay sabbii,
Wꞌankwana oodehay nasiibeetee ithꞌa.