2
01 Been oodoor,
tak Laawiit tugabiilaatii takat Laawiit id'ir.
02 Tutakat tinkwiit oor tifri.
Batuuh wꞌoori gibil rhitanihoob,
barooh mhay tirga tikwibis.
03 Laakiin masi ookwibuus adgirat tiribihoob,
aggaay sanduuk tid'iit,
kwitraan kehii liikta.
Malya Wꞌoor usanduukiib tikwisitaayt,
wꞌaggaay bitik Ooniili dar daasta.
04 Wꞌooriit kwa tisgiit tingad,
aflaay wꞌoor naan dehaay tiiktiyeeb tishbib.
05 Farꞌuuniit oot yhimti harawaay eeyam tikwta,
aree tikishiyaataah oobhari daraag sakiin.
Batuuh usanduuk wꞌaggaay bitik rhitanihoob,
barooh haay eetiyi jillaay tukishiyaatooh tistoob.
06 Batuuh usanduuk tingil aree unisrik rhita.
Baruuh waawi aree batuuh winneet dehaay nꞌakwmanaataayt,
<<Uun baruuh Yꞌibraayi nisrikaayee gaal ikati.>>
tidi.
07 Malya w'ooriit kwa whad'aayt ootii dehaay,
<<Ani giigiit Yꞌibraayeet mꞌateeb takat gaat unisrik dehook kadhshitniit waliikanii?>>
tidi.
08 Whad'aayt oot tigwibi,
<<Awooh,
bayii!>>
tidi.
Shaawti tꞌoor giigtaayt w'ooriit di waliikta.
09 Whad'aayt oot w'ooriit deetii dehaay,
<<Oon w'oor yaksiit anii dehaay kadhshii,
ikadhshiti kiraay ikwaas hook andi.>>
tidi.
Aflaay tutakat unisrik tiyhaayt kadhshita.
10 Shaawti wꞌoor iwinihoob,
batuuh Farꞌuuniit ootii dehaay haay eeta aree baruuh batiiyooh oor iki.
Whad'aayt oot barooh Muusaab tiisim,
<<Barooh iyamee mhalan!>>
miyaadi.
Muusa Miidiyaan Beeti Ifoor
11 B'eeb gaal,
Muusa iwini har'ii,
baruuh udehayuuh aakna iifiineeb oomhiin beeti giigiya,
aree bareeh kak amaag shagaasiisiineeb rhiya.
Baruuh Masri gaal tak Ibriib thaab'ee rhiya.
Uutak Muusaab ooknaay oodehayii iikti.
12 Baruuh nanakamiyaayt,
gaal han rhaab biikaayeet toona ikanihoob,
Muusa ootak Umasri idiraayt tꞌisseeteeb ikwibis.
13 Oombꞌi ooraaw,
masi Muusa ifirꞌihoob,
malu da Ibriib finaasamee rhiya.
Muusa ootak ishhagwaab raatiya,
<<Wꞌaraawook W'ibri naanhooy tinthꞌiya?>>
idi.
14 Uutak <<Aaw haakimwa gaadiibwa kehoon ikwaas hook?
Umasri tidireet toonaatiit aneeb madar tinkwiina han?>>
idi.
Malya Muusa irkwi aree,
<<Ani adꞌiyeet tuuna ibakii atookakinaatu!>>
idiit ikwin.
15 Malya Farꞌuun been toona imaasiwihoob,
Muusaay madar jarrabiya.
Laakiin Muusa Farꞌuunii ifooriit Miidiyaani haashiib ikwiiri jillaay giigiya.
Beentooy reeti daraag is'a.
16 Oont'a Miidiyaani fagiiri asaramaat arit iibri iifi.
Bataah yam iiglilni jillaaywa,
idirkwa tibiit baabiiteehna tꞌanoowwa teeyaawwa gw'asiini jillaaywa eeyaan.
17 Laakiin reewkina gali eeyaaniit bateeh iskwiin.
Malya Muusa bateeh it'iwi jillaay eeyaayt ureewoohna dehaay gwꞌasiya.
18 T'arit baaboohna Ra'uu'iil beeti yꞌagarnihoob,
baruuh bateeh raatiya,
<<Amsi naanhooy willa tꞌagarna?>>
idi.
19 Bataah igwibiina,
<<Masri gaal ureew kinaayee ishidhhan hoon.
Baruuh masi eeyam dehoon igaalil,
aree ooreew dehoon gwꞌasiya.>>
idiin.
20 Baruuh tꞌarteeh raatiya,
<<Aree baruuh naad eefi?
Ootak naanhooy beentooy tꞌishna?
Difnaat barooh waliikaana mꞌariit geeboon batami.>>
idi.
21 Aflaay Muusa beentooy ikwiireet toona agbiliya.
Baruuh tꞌootooh Saffuuraab barooh isidꞌir.
22 Saffuura barooh oor dehaay tifri.
Muusa barooh <<Geershoom>> isim.
Baruuh <<Ani girba haashiib girba tak aki.>>
idi.
23 Gwida hawla hasamiyaana,
Masreeb whadꞌa han iya.
Yꞌisraaꞌiili laakiin tookshuushti gwirhaayee masi aadhiyaan.
Baraah shamaamti harawaay winneet waawiyaan.
Tuwaawtuuhna aree Ukwaasana beeti reewta.
24 Ukwaasana igwirhaayeehna imaasiw.
Malya Ibraahiimi geebwa,
Isehaagi geebwa,
Yaaguubi geebwa dꞌiyaab iiktiyeeb ugaladooh shꞌiya.
25 Aflaay Ukwaasana Yꞌisraaꞌiili ishbibihoob,
bareeh dehaay n'akwmanaaya.