Muusaawwa Yhindi Y'itooliiwwa
3
01 Bꞌeeb gaal Muusa whamooh Miidiyaani fagiiri Yatruuni reew dirmi.
Ooreew umingaayiib sagi dar beeti haay iyhaayt,
Ukwaasanaay oorba Hooreeb ookiik eeya.
02 Beentooy gaalhoob Wꞌankwanaay malak yhindiyi bitik balool tꞌiiteeb akay bariiyooh dehaay lawiya.
Muusa yhindi baloolee rhiya,
laakiin tuun'i hindiib gaal han liwaat kitti.
03 Aflaay Muusa ikwin,
<<Ani difiit toon toona t'ajiibi iishbib andi!
Aan yhindi naanhooy kiilawna?>>
idi.
4 Wꞌankwana shaawti Muusa iishbibi jillaay giigiyaneet toona rhiyihoob,
Ukwaasana yhindiyi bitikeesii waliikiyaayt,
<<Muusa!
Muusa!>>
idi.
Muusa <<Ani tooy eefi!>>
idi.
5 Ukwaasana <<Masi tooy beeti baadiwila,
uumhiin kehii tingadiyi mugaddasuuyt,
tigidhꞌaateek nashꞌaa!>>
idi.
6 Malya baruuh,
<<Ani hoobeeyook Ukwaasana akati,
Ibraahiimiib Ukwaasana,
Isehaagiib Ukwaasana,
Yaaguubiib Ukwaasana.>>
idi.
Muusa een imaasiwihoob,
Ukwaasanaay ooshbuub iriikwuuyt ifiireeh ikwibis.
07 Malya Wꞌankwana bariiyooh dehaay,
<<Ani udehayu igwirha Masreeb winneet rhan.
Ikishiya bareeh amaag iweerneet toonaati sabbii,
bareeh waawee amaasiw.
Kasteeh tilhanayteehna han akteen.
08 Shaawti ani bareeh Imasriyi ayee ashidhhiini jillaay,
Masree sifarꞌiit daayi haash mar'a,
aatwa awitwa kwaaniiniib beeti istuub andi.
Been whaash Kanꞌaaniiwwa,
Yhiitiiwwa,
Yꞌamooraawwa,
Ifarasiiwwa,
Yhiiwiiwwa,
Iyabuusiiwwa hooy ikweerna.
09 Aree oont'a Y'israa'iilaayeet tuuwaaw tiktimheeb.
Imasri bareeh kak amaag iweerneeb rhan.
10 Aflaay oontꞌa,
giigaa!
Barook Farꞌuun beeti diigwati hook andi.
Oodehayu ibakii Masree tisfar'eet toonaati.>>
idi.
11 Laakiin Muusa Ukwaasanaay dehaay,
<<Ani aabuuyt Farꞌuun eebi?
Ani aabuuyt Yꞌisraaꞌiili Masree mhalani?>>
idi.
12 Ukwaasana aree igwibi,
<<Geebook daayi andi.
Tuun batuuh aree ani diigwataayook akatiyeet toona sootniit alaamaatu.
Oodehay Masree tisifarꞌihoob,
oon oorbaay kehii Ukwaasana y'ibid tiyadna.>>
idi.
13 Muusa Ukwaasanaay dehaay,
<<Yꞌisraaꞌiili bayiit bareeyooh dehaay,
<Ukwaasana yhoobeeyookna bareek beeti diigwatiyaheeb> andiyeek,
baraah <Oosmooh aab iyadna?>
diit raatiheeb iyadna.
Malya bareeh naan andi?>>
idi.
14 Ukwaasana Muusaay dehaay,
<<Ani aneebu,
Yꞌisraaꞌiili ibakii bak sooya:
<Ani Been Aneebu ikatiib dehookna diigwatiyaheeb.>
diyaa!>>
idi.
15 Ukwaasana masi Muusaay dehaay,
<<Een bareeh Yꞌisraaꞌiili sooya:
<Wꞌankwana,
yhoobeeyookna Ukwaasana,
Ibraahiimiib Ukwaasana,
Isehaagiib Ukwaasana,
Yaaguubiib Ukwaasana dehookna diigwatiyaheeb.>
diyaa.
Uun baruuh aniib oosim udaayimu,
uusmu taas taasii sh'ami indi.
16 Giiga,
Yꞌisraaꞌiili suurkina simarriyaat bareeh sooya,
<W'ankwana,
hoobeeyookna Ukwaasana,
Ibraahiimwa,
Isehaagwa Yaaguubiiwwa Ukwaasana akatiyeet toona sooya.
Ani dehook lawaneet toona sooya.
Ani bareekna agw'ad hookna.
Imasri bareekna iweerneet toona rhan.
17 Ani bareekna Masreeb igwirhaayee asfarꞌeet toona waadiyaayan.
Ikanꞌaaniiwwa,
Yꞌamooraawwa,
Ifarasiiwwa,
Yhiiwiiwwa,
Iyaabuusiiwwa haash beeti istuub hookna andiyeet toona waadiyaayan.
Been whaash aatwa awitwa kwaaniini.>
diyaa.
18 Israa'iileeb isuurkina isniikar hook iyadna.
Malya baruukwa isuurkinaawwa ibakii Masreeb Whadꞌa beenaat sooyaana,
<Wꞌankwana Yꞌibriyi Ukwaasana uukna dehoon lawiya.
Oontꞌa umingaay beeti mhayt yinaateet iibaabt iibaabsa hoon,
beentooy Wꞌankwana Ukwaasanaayoon dehaay karaamaat niifrꞌa niyad.>
diina.
19 Laakiin Masreeb Whadꞌa akra ayi kehii daami biidiyeek,
iifdig hookna kiidi,
akteen.
20 Aflaay w'ayu fidhidhtiit Imasri gwidaat m'uujisa eebtik kwaastiit bareeh iith'a andi.
Beenaay har'ii,
baruuh giigsi hookna indi.
21 Ani Imasri bareekna hamooyseen iikwasi andi.
Aflaays aniib uudehay giigeenihoob harar ayee giigi kiidiin.
22 Yꞌisraaꞌiileet taamꞌa kastaah tishawawteehna timasri iibi iyadna,
tari bateeyooh geeb ikweert timasri kasteeh raati iyadna.
Halakaawwa dimꞌaraawwa ashteeti gadh'iiwwa raati iyadna.
Yꞌisraaꞌiili teen teena yꞌareehwa tꞌarteehwa istuukw iyadna.
Aflaay baraah Imasri iislab iyadna.>>
idi.