Muusaayt T'alaama
4
01 Muusa Wꞌankwanaay dehaay igwibi,
<<Yꞌisraaꞌiili aneeb bii'aamanayneek,
tari ani andiyeet toona biisnaakiirneek,
aree <W'ankwana dehook lawaab kiiki.>
iyadneek,
kak awari?>>
idi.
02 Malya Wꞌankwana bariiyooh dehaay,
<<W'ayook naan hooy teefi?>>
idi.
Baruuh <<Kwoolayt>> idi.
03 Wꞌankwana <<Tukwoolay whaashiib gidaa.>>
idi.
Muusa tukwoolay whaashiib igidihoob,
batuuh kwakwar tiki.
Aree baruuh hooy ifoor.
04 Malya Wꞌankwana Muusaay dehaay,
<<W'ayook fidhidhaat barooh uniiwaay yaksaa.>>
idi.
Aflaay Muusa w'ayooh ifidhidhaayt ukwakwar yꞌabik,
aree masi kwoolayt t'agar.
05 Wꞌankwana <<Toon toona Yꞌisraaꞌiilaayi rhistiib dꞌiya.
Wꞌankwana,
bareeyooh yhoobaayi Ukwaasana,
Ibraahiimwa Isehaagiibwa,
Yaaguubiibwa Ukwaasana dehook lawiyaneet toonaati rhistiib beet toona dꞌiya.>>
idi.
06 Malya Wꞌankwana Muusaay dehaay,
<<Wꞌayook whalakiyook tehooyteeb daasa.>>
idi.
Muusa han wꞌayooh whalakiyooh tehooyteeb daasiya.
W'ayooh ifirꞌihoob,
galooyt lhanaayt lhaa rhiya,
eeraat kwindhibiya italij tꞌiiteet iki.
07 Malya Wꞌankwana,
<<Wꞌayook masi whalakiyook tehooyteeb daasa.>>
idi.
Aflaay baruuh w'ayooh whalakiyooh tehooyteeb daasiya,
aree w'ayooh ifir'ihoob,
w'ayi suureet y'agar,
aree ugarooyooh ooraaw tꞌiiteeb iikti.
08 Malya Wꞌankwana,
<<Baraah biiꞌaamanaynuuk tari tim'uujisaateet alaama tehankaaneet bii'aamanayneek,
kisib t'alaama tumalya aamaneen.
09 Laakiin teen t'alaama timalu bii'aamanayneek,
tari barook biisinaakiirneek,
shalik yam Ooniilii yaksaat balama haashiib fifaa.
Ubharii yakistaneeb aayam whaashiib booy iikti iyadna.>>
idi.
10 Laakiin Muusa Wꞌankwanaay dehaay,
<<Yaa Wꞌankwanaay,
ani hadiidanaab kaaki.
Ani masi han kahadiidan.
Suur hadiidanaab kaaki,
ukishiyaayook bhaliisamtaneekka oont'a ookiik han kaaki.
Ani diiseet hadiidani aree umiidalaabu hakwaaru.>>
idi.
11 Malya Wꞌankwana bariiyooh dehaay,
<<W'aadami aaw ooyaf iniiw?
Barooh angwileesiiniib tari gilluusiib ikwasiib aabu?
Barooh rhisiiniib tari hamasheesiiniib aabu?
Been baruuh,
aneeb W'ankwana kiiki han?
12 Oontꞌa giiga!
Bhaliitiniyihoob geebook daayi andi,
naan tindiyeeb mityaayi hook andi.>>
idi.
13 Laakiin Muusa igwibi,
<<Yaa Wꞌankwanaay,
anaahook toon toona sakiiniib weer diigwata.>>
idi.
14 Aflaay Wꞌankwana Muusaay yhasaayt,
bariiyooh dehaay,
<<Daayiitu!
Usanuuk Haaruun Ulaawi aree kaku?
Baruuh daayiib hadiidiiniyeet toona akteen.
Oontꞌa baruuh barook beeti sakiini,
imaar hook indi.
Eerheek winneet hooy afirhi indi.
15 Barooh bhaliisama,
ibhali bariiyooh uyafiib dꞌiya.
Hadiidteenihoob,
mhalleekna geebookna daayi andi,
naan tidꞌaneeb aree mityaayi hookna andi.
16 Haaruun oodehay dehook bhaliisami indi.
Yaf dehook iikti indi,
baruuk aree Ukwaasanaay mhiin bariiyooh kehii iikti tindiya.
Baruuh naan indiyeeb sooyi tindiya.
17 Laakiin toon tukwoolay w'ayyook teefeet geebook yaksaa.
Aflaay ani rhisaneeteek timꞌuujisaateet alaama haay kwaasa.>>
idi.
Muusa Masir Beeti Y'agar
18 Malya Muusa Yatruun whamooh beeti yꞌagaraayt,
bariiyooh dehaay,
<<Aneeb Masreeb eefeen oodehayu beeti giigsaaheeb,
baraah masi dhhaniib ikatiineet toona idaal andi.>>
idi.
Yatruun <<Um'asgiib giiga!>>
idi.
19 Muusa masi Miidiyaaneeb haayee,
Wꞌankwana bariiyooh dehaay,
<<Masir beeti agara,
aanda bariiyeek imadar yhiriw kassaah ayaaba.>>
idi.
20 Aflaay Muusa tootakatoohwa yꞌareehwa yakisiya.
Bareeh meek isꞌamaayt Masir ookiik haay y'agar.
Ukwaasanaayt tukwoolay han yakisiya.
21 Wꞌankwana Muusaay dehaay,
<<Baruuk Masir beeti titꞌagiirihoob,
tim'uujisaati d'uuyi akrir ani hiiyyaayeek akatiyeeb kasseeh whadꞌaay suurii kwaasa.
Laakiin ani bariiyooh oogin'i is'ikir andi.
Aflaay baruuh oodehay giigsi kiidi.
22 Malya ibakii barooh sooya,
Wꞌankwana bak indi hook:
<Israaꞌiil aniib wꞌoor usuurkina ikati.
23 Aniib wꞌoor giigsa.
Baruuh shaawti aneeb anbiid ikati.
Laakiin baruuk igiigisti tiriba.
Aflaay ani wꞌoorook usuurkina idaar andi.>
indi hook.>>
idi.
24 Masir eebiib usalaliib um'askari mhiiniib,
Wꞌankwana Muusaab imriit madar jarrabiya.
25 Laakiin Malya Saffuura tutakatuuh hasi awi tiyhaayt wꞌoorooh tikwishib.
Been ugalu aree Muusaay iragada haay tehita,
<<Baruuk anii dehaay booyi dooba tikatiya.>>
tidi.
26 Aflaay Wꞌankwana barooh y'ish.
Malya Saffuura <<Baruuk oon ukwishuubi sabbii tidhhana.>>
tidi.
27 Wꞌankwana Haaruunii dehaay,
<<Baruuk Muusaab anshiishi jillaay,
umingaay bayaa.>>
idi.
Aflaay baruuh Ukwaasanaay oorbaay Muusaab imriit shoobiya.
28 Malya Muusa W'ankwana sooya diyaab iiktiyeena kastooh Haaruun sooya,
aree Wꞌankwana kwaasa diyaab iiktiyeet timꞌuujisaateet alaama kasteeh han barooh sooya.
29 Shaawti Muusaawwa Haaruunwa Yꞌisraaꞌiilaayi suurkina kasseeh ismarriina.
30 Haaruun kastooh toona Wꞌankwana Muusaab sooyaneet bareeh sooya.
Muusa aree bareeyooh suurii timꞌuujisaateet alaama idꞌi.
31 Aflaay Yꞌisraaꞌiili aamaniyaan.
Wꞌankwana bareeyooh dehaay nꞌakwmanaayaab ikatiyeet toonaawwa,
igwirhaayeehna rhaab ikatiyeet toonaawwa imaasiwnihoob,
whaashi kehii dhibiyaaniit asjidiyaan.