Muusaawwa Haaruunwa Farꞌuun Bhaliisamiyaan
5
01 Malya Muusaawwa Haaruunwa giigiyaaniit Farꞌuunii dehaay,
<<Wꞌankwana,
Israa'iileeb Ukwaasana bak indi:
<Aniib oodehay giigsa.
Aflaay baraah umingaayiib anii jillaay ba'afirhiin.>
indi.>>
idi.
02 Farꞌuun <<Wꞌankwana aree aabuuyt ibakii barooh asnaakiir aree Yꞌisraaꞌiili giigsani?
Wꞌankwana kaakan,
Yꞌisraaꞌiili han giigsi kaadi.>>
idi.
03 Malya baraah,
<<Yꞌibriyaayi Ukwaasana uukna dehoon lawiya.
Shaawti mhayt yinaateet iibaabt umingaay beeti niibi.
Malya Wꞌankwana Ukwaasanaayoon dehaay karaamaat niifrꞌa.
Een binweeriyeek aree baruuh lhanaaytii tari bꞌadhdhii iith'a hoon indi.>>
idiin.
04 Laakiin Masreeb whad'a bareeyooh dehaay,
<<Muusaawwa Haaruunwa,
naanhooy oodehay ishanhiisoohna fidnaab giigisteena?
Ishanhookna beeti agarna!>>
idi.
05 Malya Far'uun,
<<Shibibna,
whaashi dehay oont'a guudiyaana,
aree een bareeh ishanhiisoohna tisingiidna han!>>
idi.
06 Beet tooyin tookna Far'uun ikishiya isuurkinaawwa oodehayi kehii suurkinaamaab eendaawwa bak sooya:
07 <<Oodehay toobi shagaamti jillaay gallab baahiina.
Bareeh giigsaana aakna gallabeehna bayhiriwna.
08 Laakiin bareeh suureet been ootoob ooknaay haddiib toob hooy hariwna,
ootoob hooy baasinakwisna.
Baraah hasraaba.
Oon usabbii baraah waliikeena,
<Yakaana,
Ukwaasanaayoon dehaay karaamaat niifr'a.>
iyadna.
09 Een bareeh ishaga winneet dehaay s'akirna.
Aflaay baraah diimaab shagaameena aree gwisir haay isnaakiirni daman kiidꞌiin.>>
idi.
10 Ikishiya isuurkinaawwa Yꞌisraaꞌiilaayi kehii suurkinaamaab aandaawwa giigiyaaniit,
udehayii dehaay,
<<Far'uun bak indi hookna:
<Shaawti weer gallaab iyaaw hookna kaadi.
11 Difna,
timeerni mhiiniika gallabeekna hariwna.
Laakiin ishagaayuukna iinkwis kiidi.>
indi.>>
idiin.
12 Aflaay uudehay kastooh Masreeb ibrarniit gallab yhariwna.
13 Ikishiya isuurkina bareeh winneet itirna,
<< B'eebka hookna iteharriiw ishagaayookna faaysaana.
Suur igallab tiibriinihoob daatiineeb ishaga daayaana.>>
idiin.
14 Far'uuniib ikishiya isuurkina baliib Yꞌisraaꞌiilaayi kehii suurkinaab ikwaasneeb eenda jasaayaaniit raatiyaana,
<<Baraakna amsi tari iru shagaamtiineeb ootoobi haddi toob naanhooy kitdꞌiina,
suureet naanhooy kashagaamtaana?>>
idiin.
15 Malya Y'israa'iilaayi kehii suurkinaamaab aanda Far'uun ibeeniit ashkiimiyaana,
<<Whadꞌaay,
ikishiyaayeek naanhooy bak amaag tiweera?
16 Ikishiyaayaak gallab attiyeewiyaab kiikeena,
laakiin <Toob shagaamaana!>
nittiyoodi.
Ikishiyaayaak jasaameena,
laakiin udehayuuk aakna shhagwaaba.>>
idiin.
17 Far'uun <<Baraak hasraabaana,
ishaga teeribna.
Oon usabbii aree baraak,
<Wꞌankwanaay dehaay karaamaat nifarꞌi jillaay,
giigsa hoon.>
tiyadna.
18 Oontꞌa agarnaat shagaamaana,
gallaab han ittiyiw kitdiina.
Laakiin baraak ibakii masi been ootoob ooknaay haddi toob shagaamteena.>>
idi.
19 Yꞌisraa'iilaayi kehii suurkinaamaab aanda een soomamiyaanihoob,
gwirhaayeeb eefeeneet toona ikanna,
<<Bꞌeebka hookna iteharriiw utoobi adad ibakii baasinakwisna.>>
ittiyoodaayna.
20 Baraah Far'uunii giigiyaanihoob,
Muusaawwa Haaruunwa imriina.
Baraah han bareeh yhigitna.
21 Baraah Muusaawwa Haaruunii dehaaywa,
<<Wꞌankwana baraakna tidꞌiineet toona rhiya.
Whadꞌaawwa idaabtaayaahwa hinin eerib tikwaasnayt,
Wꞌankwana jasaayi hookna indi.
Hinin haay eedirni b'adhadh bareeyooh w'ayiib daastaana.>>
idiin.
Muusa Midhhan Waadiyaaya