6
01 Malya W'ankwana Muusaay dehaay,
<<Oont'a Far'uun kak awariyeeb rhi tindiya:
Aniib w'ayi w'akraanaay sabbii,
bareeh giigsi indi.
Aniib w'ayi w'akraanaay sabbii,
bareeh oon whaashii isaakw indi.>>
idi.
02 Ukwaasana masi Muusaay dehaay,
<<Ani Wꞌankwana akati.
03 Ibraahiimii dehaaywa,
Isehaagii dehaaywa,
Yaaguubii dehaaywa,
Ukwaasana Wꞌalyaanaayt dehaay lawan.
Laakiin oosmu umugaddas W'ankwana,
bareeh sookinaab kaaki.
04 Masi bareeyooh geeb galad adꞌi.
Been ugaladiib,
igirbaaneet hooy ikwiirneeb Kanꞌaani haash bareeh aniiweet toona waadiyaayan.
05 Masi aree,
Yꞌisraaꞌiilaayi aadhti amaasiw.
Imasri bareeh kishiyaab ikwaasna.
Ani bareeyooh geeb ad'iyeeb ugaladu sh'an.
06 Shaawti Yꞌisraaꞌiilaayee dehaay,
<Ani Wꞌankwana akati,
aree Imasri jasaayi andi,
tookshuushtii ishidhhin hookna andi.
Ani w'ayu w'akraanaaywa akra hukwimiiwwa ishidhhin hookna andi.
07 Aneeb ooknaayu dehay iikwasi hookna andi.
Aree ani Kwaasanaayookna iikti andi.
Malya been Masreeb w'amaag waraatii bareek isfadig aneeb Wꞌankwana Ukwaasanaayookna akatiyeet toona iikan tiyadna.
08 Ibraahiimwa,
Isehaagwa,
Yaaguubwa aniiw hookna adiit dehaay halafooyaneeb whaash istuub hookna andi.
Been whaash kinaameen iikwasi hookna andi.
Ani Wꞌankwana akati!>
diyaa!>>
idi.
09 Aflaay Muusa beet toona Yꞌisraaꞌiilaayee dehaay hadiidiya.
Laakiin tookshuushti wꞌamaag wari bareeh lhasiya akay,
barooh sinaakiraab kiikeen.
10 Malya Wꞌankwana Muusaay dehaay,
11 <<Farꞌuun Masreeb whadꞌa bayaa!
Yꞌisraaꞌiili whaashiisooh giigsiiniyeet toona sooya.>>
idi.
12 Laakiin Muusa W'ankwanaay dehaay,
<<Yꞌisraaꞌiili sinaakiraayi biikaayneek,
Far'uun kak isnaakiirheeb?
Ani aree hadiidanaab kaaki.>>
idi.
Muusaawwa Haaruuniiwwa Yhooba
13 Oont'a Wꞌankwana Muusaawwa Haaruunwa sooya,
<<Yꞌisraaꞌiiliiwwa Masreeb Whadꞌaawwa sooyaana.
Yꞌisraaꞌiili Masree tisfarꞌeet toona ani sooyani hook.>>
idi.
14 Aan baraah Israa'iileet tigabiilaati taas ikatiina:
Raaꞌoobiin Yaaguubi oor usuurkina fadhig ar iibri:
Haanookwa,
Falluuwwa,
Hasroonwa,
Karmiiwwa iiktiin.
Bareeyuuhna uutaas Raa'oobiineet tigabiila ikeen.
15 Simꞌoon asagwir ar iibri:
Yamuuꞌeelwa,
Yaamiinwa,
Oohadwa,
Yaakiinwa,
Soohaarwa,
tukan'aaniiti oor Shaaꞌuulwa ikatiin.
Bareeyuuhna uutaas aree Sim'ooniit tigabiila ikeen.
16 Laawi mhay ar iibri:
Geershoonwa,
Gahaatwa,
Maraariiwwa ittiyoodiin.
Bareeyuuhna uutaas aree Laawiit tigabiila ikeen.
Laawi sheebwa mhay tamuunwa asarama hawla ikwiri.
17 Geershoon malu ar iibri:
Libniiwwa,
Shim'iiwwa ittiyoodiin.
Baraah gaalka gabiilaat ikeen.
18 Gahaat fadhig ar iibri:
Amraamwa,
Yisehaarwa,
Habroonwa,
Ussii'eelwa ittiyoodiin.
Gahaat sheebwa mhay tamuunwa mhay hawla ikwiri.
19 Maraari malu ar iibri:
Maahliiwwa Muusheewwa ittiyoodiin.
Aan baraah Laawiit tigabiilaawwa tidirriyaaytoohwa ikatiin.
20 Amraam duuraatooh ubaabaayt kwa tiiktiit Yookaabad safiya.
Batiiyooh aree Haaruunwa Muusaawwa ifri.
Amraam sheebwa mhay tamuunwa asarama hawla ikwiri.
21 Yisehaar mhay ar iibri:
Goorahaawwa,
Nafagwa,
Sikriiwwa ittiyoodiin.
22 Ussii'seel han mhay ar iibri:
Mishaa'iilwa,
Alsaafaanwa,
Sitriiwwa ittiyoodiin.
23 Haaruun Alisheebaab Amiinadaabiit oot,
Naahshooniit tookwa idꞌir.
Batiiyooh aree Naadaabwa,
Abiihoowwa,
Alꞌasaarwa,
Itaamaarwa hooy ifri.
24 Gooraha mhay ar iibri:
Assiirwa,
Algaanaawwa,
Abiiꞌasaafwa ittiyoodiin.
Baraah aree Goorahaayt tigabiilaati hooba ikeen.
25 Alꞌasaar Haaruuni oor aree Fuutiiꞌeeliit arteeb gaat idꞌir.
Batiiyooh aree Finhaas hooy ifri.
Aan baraah aree Laawiit tigabiilaati dhiwaayi suurkina ikatiin.
26 Beenhoob W'ankwana Haaruunwa Muusaay dehaaywa,
<<Israaꞌiileet tigabiila dhiwaayeesoohna milhanaat Masree haay firꞌana.>>
idi.
27 Masreeb Whadꞌa Yꞌisraaꞌiili fandiigeet toona sooyaan aanda Muusaawwa Haaruunwa eekna ikatiin.
Muusaawwa Haaruunwa Whad'a Bhaliisamiyaan
28 Wꞌankwana Masreeb whaashiib Muusaab bhaliisamiyanihoob,
29 <<Ani Wꞌankwana akati.
Ani andiyeetook toona kastooh Masreeb Whadꞌa Far'uun sooya.>>
idi.
30 Laakiin Muusa W'ankwanaay dehaay,
<<Ani hadiidanaab baakaayeet toona baruuk tikteenna,
aflaay whadꞌa aneeb kak isnaakiirheeb?>>
idi.